ناس كثيرة كانت تنتقد الشيف بوراك التركي بسبب مبالغته في فيديوهات الأكل، والصواني والكميات الكبيرة المشهور بيها، ولكنه بدأ يجذب مشاهير كثيرين على مستوى العالم، يذهبوا لمطعمه ويعملوا إعلانات، ويحضر لهم هدايا على كل شكل ولون، لكن بمثل أي شخص مشهور ظهر عنده جانب إنساني أكبر مما كنا نتخيل.
الشيف بوراك التركي من ساعة الزلزال اللي ضرب تركيا وسوريا.. وسبب خساير كبيرة جدا في الأرواح والأموال.. وناس اتشردت من بيتها.. سايب شغله وحياته.. ومخصص كل وقته لعمل الخير.. والتبرع بنفسه.. ولم تبرعات لصالح الضحايا وأسرهم
ومش لوحده الحقيقة.. كل مشاهير تركيا والممثلين اللي حبيناهم واتعلقنا بيهم.. ضربوا مثل قوي جدا في الدعم.. وخصصوا كل وقتهم لجمع تبرعات.. وإعانة المحتاجين خلال الفترة اللي فاتت.. ملحمة خير وإنسانية مكنش حد يتوقعها
بوراك لوحده مدخل لتركيا في اليومين اللي فاتوا دول ملايين الليرات كان آبرزها المزاد اللي عمله على قمصان الكرة الشهيرة. اللي كان محتفظ بيها خصوصا قميص ميسي ورنالدينيو اللي موقعين منهم شخصيا ماهو مشهور بقى والناس دي كلها كانت بتروح تزوره.
بوراك قرر يستخدم الحاجات اللي عنده دي.. وباي القميصين اللي عليهم إمضة ميسي ورونالدينيو.. بحوالي مليون و200 ألف ليرة تركية.. واتبرع بالفلوس دي كلها للمتضررين من الزلزال اللي ضرب تركيا يوم 6 فبراير.
ونشر بوراك صورته الأخيرة مع تي شيرت البرازيل والأرجنتين على انستجرام.. في لحظة وداع مؤثرة وفي نفس الوقت ملهمة وبعدها سلمهم للمشترين بس مرضيش يقول هما مين ومن باب الشفافية أكتر.. نشر صور الإيداعات البنكية اللي بتأكد بيع القمصان وطبعا قميص ميسي هو اللي كان تمنه مليون ليرة.
ومش بس كده الشيف بوراك نزل بنفسه للمناطق المتضررة ووزع إعانات ولبس وغطا وأكل وشرب على الضحايا اللي وصل عددهم لـ 45 ألف وأكتر ده وقف بنفسه في كرافانات متنقلة يطبخ للأطفال في المناطق المتضررة من الزلزال
الشيف بوراك من أول يوم وهو في حالة صدمة وذهول للي حصل في بلده.. وحاول يساعد بكل الطرق الممكنة.. كان بيشيل الكلاب قبل البني آدمين من تحت الأنقاض.. ويطبخ لعمال الإنقاذ.. واتبرع بفلوس.. وطالب الناس تتبرع بفلوس عشان نقلل من حجم الكارثة الإنسانية اللي عاشتها بلده
الشيف بوراك اللي عنده 30 سنة.. مش جديد عليه عمل الخير ومساعدة الناس.. وهو على قد ما كان مشهور وفيديوهات الفيسبوك بتجيب له دعاية وإعلانات كبيرة.. إلا إنه دايما بيساعد الفقراء والمحتاجين.. وكان دايما بيتبرع بأضحيات بشكل متواصل طول السنة.. ومش بس كده.. كان مخصص وقت كبير من حياته وتبرعاته للاجئين من دول كتير جدا.. وعشان كده عنده شعبية طاغية سواء جوه ولا بره بلده.
