اسمه لمع خلال موسم رمضان الحالي، وهذا بسبب مشاركته في العمل الأبرز في الموسم، طبعا مسلسل جعفر العمدة، هو مثل الغائب الحاضر طول الوقت، مع إن دوره مشاهده ليست كثيرة، ولكن طول الوقت هو محوري في الأحداث ومهم وكلنا نحفظ اسمه ونبحث عنه لكي نسلمه لجعفر العمدة ليعيد ابنه المخطوف من 19 سنة، طبعا عرفتوا هو بلال شامة.. أو الفنان مجدي بدر.
الفنان مجدي بدر بقى عنده مشكلة كبيرة في حياته دلوقتي، وده بسبب نجاح مسلسل جعفر العمدة ودوره في المسلسل، واللي بيعب شخصية بلال شامة، وده واحد هربان ومعاه سر خطير مبيخليش جعفر ينام، وهو: مين خطف ابنه وهو عايش ولالأ؟ وده سببل لمجدي بدر مشكلة إن الناس في الشارع بقت بتجري وراه وتقوله هنسلمك لجعفر العمدة.
بلال شامة اللي بيقدم دوره الفنان مجدي بدر من ساعة ما عمل عملته خلع وجعفر مش عارف يوصله، قلب عليه طوب الأرض ولف عليه في كل مكان ومقدرش يوصل لحاجة، لحد ما بدأت الخيوط تقرب، لما بلال نفسه ظهر عشان عايز فلوس وقرر يبدأ يعمل شوية نصب.
كل ما جعفر يقرب، بلال يهرب، وهو عامل دور واد خبيث كدة، عليه كمية نظرات لؤم مش طبيعية، مش ممكن تكون تمثيل، ده أكيد شخصية الفنان مجدي بدر الحقيقية كدة، عشان يقدر يعمل النظرات دي، وكل ظهور ليه بسبب مشاكل لكل حواليه، وهو معندوش أي مشاعر ولا ومبادئ ولا أخلاق، ميعرفش حاجة غير إنه عايز فلوس مهما كان التمن.
ولكن بعيدا عن المسلسل فالفنان مجدي بدر صاحب تاريخ طويل، بدأ مسيرته في التسعينات، وهو مدرسش تمثيل، ولكنه واخدها بالخبرة وبحب المهنة من زمان، شارك في عدد من الأفلام منها «عبده موته، الحرامي والعبيط، القشاش، علمني الحب، أنا مش معاهم، حوش اللي وقع منك، وبعد الطوفان، لمح البصر، الثمن» وفي الدراما شارك في مسلسلات منها «سر الأرض، ان فاتك الميري، ساكن قصادي، الدوغري 90، زيزينيا، حديث الصباح والمساء»، وغيرهم.
معظم أدوار الفنان مجدي بدر بيكون طالع لئيم وشرير، وغالبا ده بسبب نظام القوالب اللي بيتحط فيها النجوم خصوصا في مرحلة معينة بيكون لسة معندهمش القدرة إنه ميرفضوا لأنهم محتاجين الانتشار ويشتغلوا أي حاجة.
وفي جعفر العمدة بلال شامة عامل دور شرير شرير يعني، وبيقول إن محمد سامي شربه الدور، لأنه هو المخرج وكمان مشارك في التأليف.
الفنان مجدي بدر يمكن حياته الشخصية مش معروفة أوي، ولكن هو متجوز من الفنانة سامية عاطف، والجواز ده كان سنة 2009، وهما في بداية الزواج مكنش معاهم فلوس وكانت الدنيا معام ضيقة شوية، لدرجة إن الزوجة بتقول اتجوزنا في شقة إيجار وجيبنا اللي محتاجينه بس، وكمان عفش قديم، وبعد سنة بقى نقلوا لشقة تمليك.
ولكن القصة المؤثرة فعلا، إن الفنان مجدي بدر وزوجته الفنانة سامية عاطف، انتظروا بعد الجواز لمدة 8 سنين، عشان تشرف مولودتهم الأولى وده بسبب مشاكل في الإنجاب واجهتهم وكانوا بيعالجوها، عشان تيجي داليدا بنتهم الأولى والوحيدة سنة 2017، واللي بكى من الفرحة أول ما شافها عشان نعرف إن مجدي بدر عنده قلب مش زي بلال شامة ولا حاجة، فياريت يا جماعة تبطلوا تطاردوه في الشارع.
