هبستك ازاي وانتي مش بستاني، واضح اننا سنظل فترة طويلة مع هذا التريند، حيث أن الموضوع تحول من مشكلة خاصة بين حسن شاكوش وزوجته لحرب تريند على السوشيال ميديا.
فبعد ما حسن كان مولع الدنيا وطرد مراته ريم طارق من البيت بعد ماكتشف انها كانت متجوزة واحد قبله وهو ميعرفش ، بقى دلوقتي هو اللي بيستغل الموقف لصالحه ومبسوط اوي انه تريند.
من شوية اتنشر فيديو جديد لحسن شاكوش مع بلوجر صديقة ليه اسمها رحمة عادل على تيك توك ، طلعوا هما الاتنين يهزروا ويستخدموا الكلمة المشهورة بتاعت حسن عشان بس يفضلوا تريند ويعملوا شوية مشاهدات.
حسن ورحمة صوروا الفيديو سوا وهما بيحضروا سبوع ابن عللا غزلان وفرح شعبان ، ونشرت رحمة الفيديو عندها على تيك توك ، وظهروا وهما بيتريقوا على قصته مع ريم.
رحمة سألته .. حسن انت المفروض تعملي كل حاجة وتسعدني ،، وهنا رد حسن بصوته بقى وهو بيقرا الجملة زي ما كانت مكتوبة في الشات ” هبستك ازاي وانتي مش بستاني”.
طبعا استغلال واضح للتريند، فبدل ما نقرا الجملة مكتوبة لا حسن قرر يسمعهالنا بصوته كمان والفيديو انتشر بشكل كبييير على صفحات السوشيال.
حسن حب يلحق نفسه وكتب كلمتين عنده على فيسبوك وقال : الحمد الله والشكر ليك يارب علي كل حال الحقيقة الفترة اللي فاتت شاركنا معاكم مشاكل كثيرة مكنش ينفع اننا نشاركها معاكم لأن محدش يعلم شئ طلاما محدش شاف حاجة وانا برضو هفضل عند قراري مش هتكلم في اي تفاصيل حتي مهما سمعت اي تجريح.
بس حقيقي كل شخص هيتسأل قدام ربنا عن كلامة بس الحمد الله وانا حابب اعتذر لكل اهل بيتي وجميع افراد ادارة اعمالي وكل فرد في فرقتي علي الاساءة اللي بيتعرضولها يوميا من خلال السوشيال ميديا وخارج السوشيال ميديا واسف تاني لكل اهل بيت في مصر وبرا مصر علي الاساءة اللي حصلت علي السوشيال ميديا.
وكمل حسن وقال : حابب اشارك معاكم التريند بطريقة كوميدية وفيديو ترفيهي علي التيك توك بدون الاساءة في اي شخص ربنا يعلم انها حاجه ترفيهيه فقط وربنا يهدي حال الجميع والحمد الله علي كل شئ وانتظروا شغل جديد الفترة اللي جاية دعواتكم.
انتقادات كتير اتوجهت لحسن شاكوش بعد الفيديو ده ، على اعتبار انه راجل واقع في مشكلة كبيرة مع مراته وللأسف فضحوا بعض وسيرتهم على كل لسان ، وهو سايب كل ده ورايح يتريق ويصور فيديو ويهزر.
حسن استغل الموقف وعجبته اللعبة وكمل فيها ، المهم يبقى هو التريند، وده اسلوب عمله كتير من مطربين المهرجانات عشان يتشهروا ، كان منهم حمو بيكا اللي كان بيخلي صحابه يصوروه وهو بيسجل اغنية ومش عارف يقول الكلام صخ ، فالناس تضحك وتتريق وهو يركب التريند ويتشهر اكتر.
وهو ده اللي حسن شاكوش عمله ، وخلى الناس كلها ملهاش سيرته والافيه بتاعه المشهور ، اتعمل عليه كوميكس كتير جدا ودي طبيعة السوشيال ميديا اللي بتضخم الامور وبتسيب الحدث نفسه ونمسك في حاجة صغيرة نكبرها ونعملها قيمة.
كمان حسن امبارح نشر صورة جديدة على حسابه ، وكتب عليها الحمدلله دائما وابدا ،، وكانت حركة منه برضه عشان يخلي الناس تفضل تتكلم عليه ويقوله انه عايش حياته وبينزل صور ومبسوط ، وتفضل الناس فاكرة اسمه ومشكلته حتى لو على حساب حياته الخاصة.
ممكن تكون مش مقصودة لكن اللعبة نجحت وحسن شاكوش متصدر التريند بقاله ايام ، تقريبا داخلين في اسبوع من وقت ما ريم مراته راحت عملتله محضر وقالت انه طردها وخد شبكتها وفلوسها.
وفضلوا يفضحوا بعض على الملأ وعلى عينك يا تاجر ، وكل واحد يقول للتاني كلمتين ويكتبهم في الستوري ، لحد ماريم نشرت شات بينها وبين جوزها حسن ، وكان بيقولها فيه ” هبستك ازاي وانتي مش بستاني” ومن هنا وادينا كلنا ماشين نقول لبعض هبسطك ازاااااي .. ياترى مخبي ايه تاني ياحسن.
