نشرت الإعلامية ريهام سعيد عبلا حسابها الشخصي على موقع التواصل الاجتماعي «فيسبوك»، مقطع فيديو أعلنت من خلاله اعتزال الإعلام والفن، وذلك بعد حالة الجدل الكبيرة الذي أحدثتها بكلامها عن أصحاب الوزن الزائد والتجريح والتنمر الذي أُخذ عليها.
وقالت ريهام سعيد في الفيديو بعد قرار إيقاف برنامجها: «بما إن هناك حملة ممنهجة من خلال المواقع اللي بتنزل كل ٣ دقائق حاجة من الصبح تقوّم بيها الناس عليّ، فمجرد أن يقرأ أحد أنني أهنت الناس البدنية ومرضى السمنة، وبما إننا شعب بيكسل يقرأ ويشوف، فبيصدق على طول ويزيط مع الزيطة ومش مهم بقى الست دي حالها وعيالها».
وتابعت ريهام عما ستفعله بعد الاعتزال أنها ستتفرغ لأبنائها، موضحةً: «جاء الوقت اللي أرتاح فيه وأقعد مع أولادي وأخلي بالي منهم وأقعد مع جوزي ونقرب من ربنا. ١٦ سنة بخدم الناس بس ونايمة بفكر مين عايز فلوس.. مين عايز كيس دم، ومعملتش فلوس وكانت نيتي خالصة لله سبحانه وتعالى، عمري ما تربحت مرة ولا أخدت فلوس مرة. عشت بضمير حي وراس مرفوعة».
وأضافت: «كفاية بهدلة بقا.. الواحد لازم يعيش بكرامة، وإحساس الظلم ده وحش قوي، كفاية بقا تعبت، خلاص بقا».
وكانت ريهام قالت في حلقة برنامجها «صبايا»، مؤخراً:» الناس التخينة ذات الوزن الزائد ميتة، عبء على أهلها وعلى الدولة، ويشوهون المنظر العام».
