فكرة الشجار بين الراجل والمرأة من المساحات المميزة لخلق كوميديا، لأن هذه قضية تقريبا موجودة في كل البيوت، سواء كنت متجوز فانت جزء منها،وإن لم تكن متزوج فوالديك جزء منها.
الفكرة دي لما بتتعمل بشكل لطيف بيكون فيها نوع مميزة من الكوميديا بيخلي كتير من الناس يضحك من قلبه.. ومن أفضل الأعمال اللي اتعملت في السكة دي كان مسلسل «مذكرات زوج»
الأول خلينا نكون متفقين إن مذكرات زوج اتعمل منه مسلسلين واحد منهم كان سنة 1990 وده كان بطولة الفنان محمود ياسين، والفنانة فردوس عبدالحميد، وواحد تاني اللي بيتعرض السنة دي في موسم رمضان وهو بطولة الفنان طارق لطفي والفنانة عائشة بن أحمد.
المسلسلين متاخدين من كتاب بنفس الاسم للكاتب الكبير أحمد بهجت، ولكن المعالجة مختلفة بين العملين، إنما في النهاية القضية الرئيسية واحدة، وهي علاقة بين زوج وزوجته، والخلافات اللي ما بينهم أما السياق الدرامي بتاع الأحداث فمش هيغير كتير، لأن الأفكار والأدوار الرئيسية في العملين موجودة زي ما هي.
مذكرات زوج نسخة الفنان محمود ياسين والفنانة فردوس عبدالحميد، فكرته إنه زوج بيعاني من القهر في ظل حياته مع ست مسيطرة ومتحكمة في حياته، فبيحصل بينهم خناقة وبتطرده من البيت، وبيروح لواحد من أصدقائه واللي بينصحه إنه ينهي حيتها، وبالفعل رجع الزوج «رؤوف» البيت ومعاه أداة الجريمة، ودخل على زوجته اللي مكنتش مقتنعه بإنه ممكن يعملها ولكن خرجت منه طلقة بالغلط وراحت زوجته شيرين فيها، وبعدين اكتشف إن كل ده حلم، ولكن تأكد إن عنده مشكلة، وبعدين هيبدأ رؤوف يروح لدكتور نفسي، وهيتمرد ويرجع لعلاقة حب قديمة، وزوجته هتروح لدجالين، والأحداث هتستمر وفي النهاية هيحاول إنه يطلقها لكن هي مش هتسمحله.
أما نسخة طارق لطفي وعائشة بن أحمد، فدي نفس الفكرة إنه زوج موظف بيعاني من حياة رتيبة ومفيش أي جديد، لحد ما يجي عليه وقت يكتشف إنه مبقاش عنده أحلام، ولا شغف ولا حياة، وعايش مع زوجه شديدة برغم حياته اللي من برة تبان كويسة، فبيقرر يتمرد، وبيروح باردو لدكتور نفسي، ولكن في المسلسل ده بقى هيبقى لايف كوتش، وهيبدأ باردو يفتح علاقات قديمة ويدخل في علاقات جديدة، وهتبدأ الزوجة تتجنن من تصرفاته.
زي ما قولنا الفكرة الرئيسية في العملين واحدة تقريبا، ولكن الاختلاف في المعالجة، كمان الملاحظ إن نسخة 1990 فيها أفورة أكتر سواء في مستوى الأداء التمثيلي أو الأفكار، أو حتى على مستوى الكوميديا اللي واخدة مساحة أكبر، مش ماشية مع سير الأحداث بشكل طبيعي ولكن مصطنعة.
على جانب تاني فريق عمل 1990 بيضم مجموعة كبيرة من الممثلين التقال أوي زي حسن حسني وعبدالله فرغلي والمنتصر بالله وحسن مصطفى إلى جانب طبعا الأبطال محمود ياسين وفردوس عبدالحميد.
النسخة بتاعة 2023 هادية اكتر، مفيش محاولة افتعال للإفيهات أو الكوميديا، الضحك بيعتمد على الزوج المقهور اللي قرر يغير حياته والمواقف اللي بيتعرض ليها، لكن بشكل عام هو لايت كوميدي مش كوميدي صرف، في أفورة بسيطة في الأداء من بعض الممثلين، ولكن بشكل عام العمل هادي.
نسخة 2023 بتضم كاست تمثيل كويس جدا، ولكن الكفة هنا أرجح لصالح نسخة 1990، لأن كل محاور العمل كانت بتضم كاركترات تقيلة على مستوى التمثيل.
بشكل عام النسختين مميزين، ولكن لما نحط كل واحدة فيهم في سياقها الزمني، لأن النسخة بتاعة 1990، كانت دي طبيعة التمثيل وأسلوب الكوميديا والدراما، وحتى لغة الحوار، أما نسخة 2023 هنلاقي التمثيل بيكون طبيعي أكتر بعيدا عن الأداء المسرحي العالي، وحتى لما بيكون في عمل فني فيه شوية أفورة، بنلاقي نفسنا على طول بننتقده.
