طبعا كلنا صدمنا من المشهد بين مهرة أبو الليل وجابر عندما رفعوا السلاح على بعض في حلقة مسلسل ضرب نار، حيث أن أحداثه تغيرت تماما بعد أن تخيل الناس أنهم سيروا قصة حب جديدة بين ياسمين عبد العزيز وأحمد العوضي.
الكلام اختلف أحداث مسلسل ضرب نار رجعت تاني أقوى من الأول بعد ما عدى حلقتين كده قضاهم جابر أبو شديد في السجن واتجوزت فيهم مهرة أبو الليل، فتاة شبرا القوية من زيدان بيه، الجمهور مكنش مبسوط أوي.
وعلى طريقة براد بيت وأنجلينا جولي في فيلم مستر أند ميس سميث.. قابلت ياسمين عبد العزيز أحمد العوضى تاني في المسلسل بعد ما خرج من السجن.. ولما حاول يهددها ورفع عليها السلاح عشان يقولها إنه مش هيسيب حقه.. فاجئته هي وقالتله مهرة اتغيرت يا جابر.
لو فاكرين فيلم مستر أند ميس سميث.. ده اللي قدمه براد بيت مع أنجلينا جولي وكان ساعتها متجوز جينيفر أنيستون.. وبعدها على طول انفصل عن مراته جميلة جميلات هوليوود.. عشان يرتبط بجميلة جميلات الأكشن في هوليوود.
وفي الفيلم اللي قربهم من بعض ده كانوا متجوزين واتفاجئوا إنهم ميعرفوش حاجة عن بعض.. وطلعوا هما الاتنين قتلة مأجورين.. ومطلوب منهم يخلصوا على بعض.. وبعد ما حاولوا الحب حماهم.. وقدر إنه يخليهم يتجاوزوا أوامر رؤسائهم .. ويرجعوا لبعض تاني.
وتقريبا ده اللي هيحصل بين مهرة أبو الليل وجابر أبو شديد في الحلقات الجاية.. خصوصا إنه لسه ميعرفش إن ابنها منه.. وكل واحد فيهم فاكر إن التاني غدر بيه.. وضحك عليه.. زي ما ولاد الحلال وصلوا لهم.
في الحلقات الجاية من مسلسل ضرب نار هيحاول جابر إنه ينتقم خصوصا إن مهرة مديتلوش فرصة في التسامح.. وهيبدأ يدور على قريبه اللي ورطه في السجن وكمان وقع بينه وبين مراته وكان سبب في إنها خلعته.
مش صعب علاقة مهرة وجابر ترجع تاني.. أولا مش ياسمين عبد العزيز وأحمد العوضي اللي هيعملوا مسلسل مع بعض عشان يبعدوا عن بعض.. دول كل مرة يقدموا قصة حب أقوى وأعمق من اللي قبلها.
ثانيا إن علاقة مهرة وزيدان بيه أصلا متوترة خصوصا إنها مش عاوزه تخلف منه عشان خاطر ابنها حسن.. وكمان شاكة في شغله وفي فلوسه وفي أخته اللي واقفة لها ع الواحدة.
الحلقات اللي جاية هتبقى ضرب نار فعلا واسم على مسمى.. ومش بعيد نلاقي جابر ومهرة رجعوا لبعض تاني عشان يقفوا في وش كل اللي عاملين لهم مشاكل وفرقوهم.
بنت شبرا الجدعة مش هتتخلى عن أبو ابنها الصعيدي اللي حبته من أول نظرة.. مهما كانت الظروف اللي فرقت بينهم.. وهنشوف.
