سوق النجومية ، هذا هو الشئ الوحيد الذي يتحكم في الفنانين، فمن في فترة يتخلي الفنان عن استايله وشكل شعره وملابسه من أجل القيام بتمثيل دور معين، وبعض الفنانيين يغيرون أسمائهم لان الشهرة تتطلب ذلك.
حياة الفنانين دائما مختلفة عن أي حد تاني أو شخص عادي .. و النجومية و الشهرة دايما بتفرض عليهم حاجات مختلفة .. يعني بيتكلموا بطريقة معينة و بيتعاملوا في حياتهم العادية بطريقة معينة .. و ممكن كمان يغيروا اسمهم علشان ينفع في السوق .. لكن في فنانين غيروا اسمهم لاسباب تانية … و اللخبطة بس بتحصل عند الجمهور ..
يعني مثلا من فترة ميس حمدان أما اتسألت ليه هي اسمها ميس حمدان .. و دانا حمدان .. ومي هي اللي غيرت اسمها و بقت مي سليم .. و كانت اجابتها ان مي باعت اسمها بالفلوس .. علشان شركة الانتاج اللي كانت بتشتغل معاها مي أول ما ظهرت هي اللي طلبت من مي تغير اسمها .. وحصل و هتفضل كده مي سليم لانها اتعرفت بالاسم ده …
الكلام ده بردو كان موجود زمان .. فنانين الزمن الجميل قليل أوي اللي هيكون الإسم اللي اتعرف بيه هو اسمه الحقيقي .. زي مثلا الفنانة مديحة يسري .. و اللي اسمها الحقيقي هنومة حبيب خليل ..
وفضلت باسم هنومة لحد أول فيلم ليها .. اللي هو “ممنوع الحب ” و كان مع الفنان محمد عبد الوهاب .. و هي بتمثل دورها في الفيلم .. الفنان محمد أمين قالها ان لازم تغير اسمها .. لان هنومة مش هينفع في السينما .. و بدأو يختاروا اسم .. لحد ما وصلوا ل مديحة يسري .. و بعد كده أخدت لقب سمراء النيل و فضلت معروفة باسم مديحة يسري لحد دلوقتي حتى بعد رحيلها في ٢٠١٨.
و في كمان الفنانة الجميلة هدى سلطان .. واللي كانت عندها تنوع في كل حاجة بتقدمها في التمثيل و الغنا .. و جمهورها كبير وفي كل البلاد .. و اللي من أول ما طلت على الشاشة و هي هدى سلطان .. محدش كان يعرف ان اسمها جمالات بهيجة حبس عبدالسلام عبدالعال العو .
و هي أخت الفنان الراحل محمد فوزي .. و اما اتسألت عن سبب انها غيرت اسمها .. قالت “مش أنا اللي كنت عاوزة أغير اسمي .. بس المحامية بتاعتي هي اللي اقترحت عليا اسم هدى .. و قالتلها ان اسم هدى هو اللي يليق عليها .
أما سلطان جيه الاسم بالصدفة .. لان وانا عندها اتصل واحد صاحبها اسمه سلطان .. فبقى اسمي هدى سلطان “..
اما الفنانة نادية لطفي .. فكانت في سهرة مع المنتج رمسيس نجيب .. و كانت لسه مدخلتش عالم الفن بشكل كبير .. و شاف فيها انها هتكون بطلة فيلمه الجديد “سلطان ” و كانت هتبقى البطلة قدام وحش الشاشة فريد شوقي .. بس أول ما سمع اسمها ” بولا محمد شفيق” ..
قالها ان لازم تغير اسمها لانه هيكون غريب و مش كل الناس هتعرف تقوله وقتها .. و بعد ما دوروا اختار ليها اسم “نادية لطفي” و ده كان اسم البطلة في رواية “لا أنام ” للكاتب احسان عبد القدوس .. و اللي اتعملت فيلم بعد كده و كانت البطلة فاتن حمامة .
في بقى اللي غيرت اسمها من قبل ما تفكر تدخل في قصص التمثيل .. أو الأزياء .. الفنانة رجاء الجداوي .. واسمها الحقيقي “نجاة علي حسن الجداوي”.. و قصة تغيير اسمها كان بسبب المدرسة بتاعتها ..
وده لانها كانت في مدرسة داخلية .. و المُدرسة اللي كانت بتعلمها مكنتش عارفة تقول نجاة .. و نطقها بالنسبة ليها كان بيقلب على رجاء.. و ابقى اسمها في المدرسة رجاء .. و مامتها اكتشفت بالصدفة ان اسمها اتغير ..
و ده بعد موقف حصل انها فضلت تنادي عليها مردتش .. علشان كانت اتعودت على رجاء ..و قالتلها وقتها انه اسمها اتغير ..
وفضلت قصة تغيير الأسامي ديه لحد وقتنا ده .. و في فنانين مش مصريين اسمهم كان مختلف عن اللي معروف ليه دلوقتي. زي الفنان كاظم الساهر .. و اللي غير اسمه بسبب موقف أثر فيه .. وحس فيه بالاهانة .
هو اسمه الحقيقي كاظم جبار إبراهيم.. و بعد أول أغنية ليه .. جيه واحد و قاله اسمك كاظم جبار .. ده ينفع اسم لبياع عصير .. و وقتها قرر كاظم انه يغير اسمه ل كاظم الساهر .. و من كام سنة بس عرف يغير اسمه في الأوراق الرسمية .. و بقى كاظم الساهر رسمي .
