مازالت قضية وفاء مكي تتصدر التريند، وكل يوم يحدث مفاجأة جديدة رغم ان الكل مقتنع ان وفاء تحاول تضرب كرسي في الكلوب ، لكنها تفتح على نفسها ابواب كثير وتورط معها ناس اكثر ، حتى أن برنامج ريهام سعيد تم وقفه بسببها..فماذا حدث؟
خلال الايام اللي فاتت، ريهام سعيد دخلت في قضية وفاء مكي عشان تريند بقى وبدأت تنكش في الدفاتر القديمة وتجيب من هنا ومن هنا، وطبعا هي بتحب الكلام ده اوي، وبتحب تعمل فرقعة اعلامية كدا، فمكنش قدامها فرصة غير قضية وفاء مكي بقى اللي مليانة تفاصيل لحد ما اتورطت و اتوقف برنامجها انهاردة لمدة اسبوع.
ريهام سعيد من كام يوم قالت انها وصلها معلومات عن تورط نجمين في قضية وفاء مكي ، وانهم شهدوا زور واتحكم عليهم حبس سنة مع وقف التنفيذ ، والنجمين دول هما احمد راتب و ممدوح وافي الله يرحمهم.
وأول ما ريهام قالت كدا، الدنيا اتقلبت و اسرة النجمين بدأوا يهددوها برفع قضية تشهير ، وانها كدابة والمعلومات دي مش صحيحة ، وايه الدليل اللي يثبت الكلام ده ؟ وهنا بدأ الموضوع يكبر وكل ده بسبب وفاء مكي
بنت احمد راتب مسكتتش وهددتها انها تجيب دليل يثبت ان ابوها الفنان الله يرحمه شهد زور في القضية دي ، وقالتها قدامك 48 ساعة تثبتي او هرفع قضية تشهير.
ريهام سعيد حست انها غلطت والدنيا اتقلبت عليها، والفرقعة اللي عملتها في القضية فرقعت في وشها هي ، فلحقت نفسها وطلعت اعتذرت لأسرة احمد راتب و ممدوح وافي.
وقالت انها غلطت لما قالت الكلام ده بدون دليل ومستند، وحاولت تلم الموضوع بشكل ودي عشان متتجرجرش في المحاكم تاني.
وطلعت ريهام ع الهوا وقالت : أنا بعتذر لعائلة الأستاذ أحمد راتب مش علشان التهديدات إنما علشان أنا غلطت فعلا إني ما اتأكدتش بمستند، بالرغم أن المعلومة اللي وصلت ليا كان المصدر متأكد منها إلا أن غلطتي إن ما كانش معايا مستند وده لصعوبة العثور على مستند من 23 سنة.
لحد هنا القصة مخلصتش،لكن بالعكس الموضوع كبر اكتر رغم اعتذار ريهام سعيد، إلا اننا كلنا ااتفاجئنا انهاردة بوقف برنامج ريهام على قناة الشمس لمدة اسبوع، وكدا تقدر تفهم ايه اللي حصل من نفسك.
العك اللي قالته ريهام سعيد زي ماهي متعودة من زمان عملها مشكلة كبيرة، بعد ما فتحت قضية وفاء مكي من تاني و بدأت تنخرب فيها و بتشوف هل فعلا وفاء بريئة ولا مدانة زي ما هي عمالة تقول بقالها فترة.
لكن المحاولات دي ورطت ريهام سعيد وبدل ما تعمل فرقعة اعلامية كبيرة باسم القضية ،ادي البرنامج بتاعها اتوقف اسبوع، ومش عارفين هيرجع فعلا ولا دي البداية.
ريهام طلعت بنفسها واعلنت انهاردة الكلام ده ، وكتبت : “أنا بعتذر عن الظهور في حلقاتي الأسبوع ده لدواعي صحية، حاجه تانيه مالهاش علاقه بالمرض أقسم بالله أنا عمري ما قصدت أبدا إن حد يتضايق مني ودائما بتكلم من قلبي.
واعتذرت تاني وقالت : أنا بعتذر لأسر الفنان ممدوح وافي والفنان أحمد راتب رحمهم الله عما أذيع في البرنامج، بالرغم من أن المصدر مصر على الخبر حتى وقتنا الحالي إلا أن أكيد أسر الفنانين يعرفوا أكثر.
وقالت على الفيسبوك : عمري ما قلت خبر من غير مستند لكن العثور على مستند من ٢٣ سنة كان شبه مستحيل، أنا آسفة أنا أكن كل الاحترام لكل فنان زميل ولم أقصد الإساءة أبداً باذاعة هذه الأخبار”.
وقالت كمان : “طبيعي إن الفنانين يقفوا جنب بعض في الأزمات لكن إذا الخبر غير صحيح فأنا بعتذر مليون مرة و الأهم من أي حاجة إن محدش محترم يكون زعلان مني أبداً وسيتم الاعتذار على الهواء لأن هذه أصول المهنة مش علشان أي سبب تاني لو ربنا أراد وشفاني”.
