له طلة مختلفة وكاريزما قليل ما تجدها في فنان، فى التراجيدى جبار، الدراماليس له مثيل، الكوميديا متميز، فهل تتذكروا دوره مع أحمد حلمى فى ظرف طارق؟ ضحكته كانت مختلفة ،بمجرد سماع صوته تعرف إنه الفنان يوسف فوزى على الفور، ولكن ماذا قال عن اعتزاله ؟ وهل فعلا الزعيم عادل إمام كان السبب؟وما حكاية ضربه لأحمد ذكى ؟ تفاصيل كثيرة سنععرفها من خلال التالي:
فنان محترم وقدير عملت معاه أجمل الأعمال وكان مثال للإلتزام، فهو فنان ميتعوضش.. ده أكيد كلامى وكلام كل الناس، ولكن بالتأكيد ده كلام نادية الجندى عن يوسف فوزى لما نشرت صورة لهم على حسابها الشخصى إنستجرام بعد أزمته الصحية.
الحقيقة إن كلام نادية الجندى ميختلفش عليه إتنين وده شوفناه فى الأعمال اللى جمعت بينهم من أفلام كتير ومسلسلات زى مشوار إمرأة.
الفنان يوسف فوزى فى لقاءه مع الإعلامى عمرو الليثي، إتكلم عن مرضه وسبب إعتزاله ووضح إزاى الزعيم إتسبب فى بعده عن الفنان، وقال إنه خلاص خد كفايته من التمثيل وكان نفسه بس يقوم بدور لعبد اللطيف أبو هيف ،وده لإنه كان بطل سباحة وملاكمة وإنه كان بيحب محمد على كلاى، وإنه بالصدفة إتصاب بنفس المرض زيه “الشلل الرعاش” تفتكروا الملاكمة هى السبب؟
وعن شائعات إن الزعيم هو السبب فى إعتزاله بعد إصابته ،نفى ده وقال بالعكس الزعيم مطلبش منه كده، وكان بيشجعه يرجع للتمثيل وحكى موقف جمع بينهم وهم بيصوروا مسلسل أستاذ ورئيس قسم، وكان قاعد جنبه وعادل إمام حس بالرعشة فى إيده فسأله : فى حاجة يا جو ؟ إنت كويس؟ فقاله حقيقة مرضه فعادل إمام تعاطف معاه جدا وقاله أنا حاسس بيك ، وأكد إنه أبدا عمره ما طلب منه الاعتزال.
وكعادة الزعيم فى مواقف الجد بيحاول يهون وياخد الموضوع بهزار فيوسف فوزى قال إنه غير الموضوع وقاله هو إحنا نعرف بعض بقالنا كام سنة. طبعا هم يعرفوا بعض أكتر من 34 سنة .
متهزش إيدك ثبتها .. دى الجملة اللى كانت ورا اعتزال يوسف فوزى، وده لما كان بيصور مسلسل ولى العهد ، فالمخرج محمد النقلى قاله كده ، فطبعا يوسف فوزى اتحرج وخده على جنب وفهمه إن ده أخر مسلسل له.. وبكل حزن قال إن لما بيكون بيمثل بفكر فى وضع وحركة أيده أكتر ما بيركز فى السيناريو.
زيه زى فنانين كتير بيمثلوا أدوار وميكونش فى دماغهم إن فى يوم من الأيام ممكن يتحطوا فى الموقف ده ولكن حصل بعد 16 سنة من تمثيله لدور مريض شلل رعاش التمثيل بقة حقيقة.
وعن حقيقة ضربه للفنان أحمد ذكى قال إنه ضربه بالقلم لدرجة إنه نزف ،وده كان عن دوره فى فيلم النمر الأسود مع أحمد ذكى.
وبما إننا جبنا سيرة أحمد ذكى مش هننسى شبيه زى ما بيقولوا محمد رمضان ، الحقيقة إن يوسف فوزى تسائل ليه الناس بتهاجمه؟هو مقالش عمره على نفسه مطرب هو مؤدى ،وإنه بيحبه وبيعجبه تمثيله، وإن محمد رمضان مش متأثر بأحمد ذكى ولا حاجة، وإن عنده ثقة عمياء فى نفسه ودى حاجة كل فنان محتاجها علشان ميقعش بسهولة.
شاركونا فى التعليقات إيه رأيكو فى كلامه عن محمد رمضان ؟ وهل عايزينه يرجع يمثل تانى؟ ولو رجع هل هيكون له أدوار محدودة ومناسبة لحالته ؟ هل هو ممكن يوافق على كده ولا لا؟
