الأميرة سلمى بنت الملك عبدالله الثاني والملكة رانيا العبدالله، جميلة الأردن من صغرها وهي كوكتيل مواهب ولذلك فإن والدها ووالدتها قرروا يدعموها بكل طاقتهم حتى أصبحت أصغر طيارة في الأردن.. إزاي وصلت لحلمها ده وليه كانت خايفة تكمل الطريق وإزاي الملك عبدالله وقف جنبها وليه سافر ليها أمريكا؟.. وهل فعلًا هي شبه مامتها الملكة رانيا؟.. خليكوا معايا في الفيديو ده هقولكم أسرار مثيرة في حياة الأميرة سلمى.
بيقولوا عليها دي هبة من ربنا لباباها ومامتها وهي مكدبتش خبر وعلطول رافعة راسهم والملك عبدالله والملكة رانيا بيعتبروها مش مجرد بنت ليهم بس عشان هي نموذج للإصرار والتحدي وقدرت تلتحق بالأكاديمية العسكرية في لندن وتبقى أصغر طيارة أردنية لدرجة إنها بتكون في مناسبات نيابة عن باباها الملك عبدالله.
إزاي وصلت لكل ده وهي لسه عندها 23 سنة هتعرفوا كل التفاصيل والأسرار معايا وكمان هتشوفوا إن اللي بيكون عنده إصرار على النجاح ويلاقي اللي يقف في ضهره ويآمن بيه بيعدي الحدود ويكون نموذج ناجح في بلده.
دراستها
الأميرة سلمى خلصت دراستها الثانوية بعد ما اتخرجت من أكاديمية عُمان الدولية سنة 2014 واتخرجت معاه في نفس السنة بنت عمتها الأميرة عائشة.. ووقت التخرج خدت جايزتين واحدة في علوم الرياضة والتانية في مبحث العلاقات الدولية وده عشان هي من المتفوقات في دفعتها ووقتها قرر الملك عبدالله والملكة رانيا يدعموها وحضروا حفل تخرجها ومعاهم باقي العائلة الملكية.
بعدها دخلت الأميرة جامعة تاون في العاصمة الأمريكية واشنطن ودي نفس الجامعة اللي اتخرج منها أخوها ولي العهد الأمير الحسين بن عبدالله وسنة 2018 اتخرجت الأميرة سلمى من دورة تدريبية في أكاديمية ساندهيرست العسكرية.. وبالمناسبة هي مش أول أميرة أردنية تتخرج من الأكاديمية العسكرية الملكية في لندن.. دي عمتها الأميرة عائشة بنت الحسين كانت أول امرأة عربية تتخرج من نفس الأكاديمية وده كان سنة 1987 وخدمت بعدها في سلاح القوات الخاصة الأردنية وكمان عمتها التانية الأميرة إيمان بنت الحسين اتخرجت من نفس الأكاديمية سنة 2003.
أصغر طيارة
بعد ما الأميرة سلمى بنت عبد الله الثاني اتخرجت من الأكاديمية دي سنة 2018 بقت أول امرأة أردنية تعدي مراحل التدريب الأساسية وتبقى طيار على طائرات الجناح الثابث في قصر الحسينية في عُمان واتقلدت المنصب من باباها وده سنة 2020 .. وقتها قالت إنها خايفة من الطيران في البداية بس الملك عبدالله اقترح عليها تاخد دروس عشان تنتصر على خوفها ده وبسبب تشجيعه ليها عشان تكمل قدرت تكون أصغر طيارة في الأردن.
الملك سافرلها أمريكا
واتخرجت الأميرة سلمى من جامعة كاليفورنيا الجنوبية في أمريكا والملك عبدالله سافرلها أمريكا في زيارة قصيرة عشان يدعمها في نجاحها الكبير ده.. ومن وقتها بقت ملازم أول في القوات الجوية الأردنية وحصلت على لقب شيهانة وشاركت في حفل افتتاح مركز تدريب المرأة العسكرية في الزرقاء نيابة عن باباها وده تم إنشاؤه بالتعاون مع القوات المسلحة الأردنية والجيش العربي وحلف شمال الأطلسي الناتو في يونيو 2021.
كوكتيل مواهب
من المواهب اللي الجمهور ممكن ميعرفهاش عن الأميرة سلمى إنها موهوبة في الموسيقى وكانت الملكة رانيا نشرت فيديو ليها مع أخوها ولي العهد وهي بتعزف على الجيتار.. وناس كتير بتشوف إنها بتمتاز بالهدوء زي باباها وخدت من مامتها الملكة رانيا نفس الملامح والجمال اللي علطول بتظهر بيها وكلنا عارفين إن الملكة رانيا أنيقة وجميلة وبتعرف تلبس أفضل الماركات العالمية.
ولادتها ونشأتها
والأميرة سلمى اتولدت يوم 26 سبتمبر سنة 2000 وهي الابنة التانية للملك عبدالله الثاني وترتيبها التالتة بين اخواتها بعد الأمير الحسين بن عبدالله ولي العهد والأميرة إيمان وقبل الأمير هاشم اللي يعتبر آخر العنقود.
