ليلة قاسية عاشها عشاق ريال مدريد، بعدما خطف برشلونة لقب كأس ملك إسبانيا بنتيجة 3-2 في نهائي درامي، سيظل عالقًا في أذهان عشاق الكرة.
جول كوندي كان بطل اللحظة الحاسمة، لما قطع الكرة وانطلق بها قبل ما يسدد صاروخية في الدقيقة 116 استقرت في شباك تيبو كورتوا، عشان يهدي برشلونة اللقب ويترك الريال في حالة ذهول وخيبة أمل.
الريال حاول يعدّل النتيجة في الدقايق الباقية، لكن محاولاتهم راحت عالفاضي، وانتهى الماتش بفوز مستحق للكتالونيين.
لكن اللي حصل بعد المباراة كان أكتر إثارة من النهائي نفسه.
حسب تقارير صحيفة “ديفينسا سنترال” الإسبانية، كارلو أنشيلوتي كان في حالة هياج غير مسبوقة بعد الخسارة، وسط شائعات إن دي كانت آخر مباراة له مع الريال.
أنشيلوتي حط اللوم كله على ثلاثي الفريق: براهيم دياز، أنطونيو روديجر، وتيبو كورتوا، بسبب الأخطاء الفردية اللي ساعدت برشلونة على حسم اللقب.
الراجل كان منهار وعصبي زيادة عن اللزوم، وبيقول للثلاثي ده:
“ما كنتش أتخيل إنكم تخذلوني بالشكل ده!”
وما اكتفاش بكده، لكنه زاد الجرعة وقالهم:
“خلّص وقتكم مع الريال للأبد، هتترموا برا الفريق بعد ما أمشي!”
الأزمة ما وقفتش عند الثلاثي ده.
أنشيلوتي كمان كان زعلان جدًا من أداء الثنائي رودريغو وفينيسيوس جونيور، اللي كانوا بعيدين كل البعد عن مستواهم.
قالهم بعصبية:
“لما احتجتكم تنقذوا الموقف، ما عملتوش حاجة!”
الجماهير كانت متوقعة إن الثنائي ده هيبقى سلاح الريال لكسر هيمنة برشلونة، لكن رودريغو كان غايب تمامًا، وفينيسيوس ضيّع فرص كان ممكن تغيّر مجرى الماتش.
في تطور صادم، فلورنتينو بيريز، رئيس الريال، نزل بنفسه لغرفة الملابس بعد مراسم التتويج، وفتح النار على أنشيلوتي، محمله مسؤولية الخسارة.
بيريز فاجأ الجميع لما أعلن إقالة أنشيلوتي قدام اللاعبين، وكشف إن الأرجنتيني سانتياغو سولاري هيبقى المدرب المؤقت لحد نهاية الموسم، وكمان في كأس العالم للأندية، على أساس إنهم هيختاروا مدرب جديد بعد كده.
بيريز كمان كان غاضب من لوكا مودريتش وبراهيم دياز، اللي قدموا الكأس لبرشلونة على طبق من ذهب بسبب خطأ فادح قبل هدف كوندي القاتل.
لكن في لفتة إنسانية، بيريز حاول يواسي جود بيلينغهام، اللي كان النجم الوحيد اللي ما يستاهلش الهزيمة، وقاله:
“لو الكل لعب بنفس شغفك وروحك القتالية، كان الوضع هيبقى مختلف تمامًا.”
الخسارة دي مش بس خسارة لقب، لكنها كشفت عن أزمات داخلية عميقة في الريال.
مع إقالة أنشيلوتي وتوقعات برحيل لاعبين زي براهيم وغيره، النادي الملكي دلوقتي في مفترق طرق.
السؤال اللي بيطرح نفسه: هيقدر سولاري يلم الفريق ويحقق نتايج في الفترة الجاية؟
ومين هيبقى المدرب الجديد اللي هيقود الريال لاستعادة مجده؟
