من عامل نظافة لأحد المشاهير الأغنياء، طول الساعات الماضية لا يوجد حديث على السوشيال ميديا إلا عن عامل النظاقة محمد صاحب واقعة كشرى التحرير، لا تقل عامل نظافة مع كامل أحترامنا وتقديرنا لمهنة عامل النظافة بالتأكيد.
بس غريبة يقب على وش الدنيا مرة واحدة كده فى زمن قياسى ،فين مكنش لاقى اللضا وفجاة عايش فى فيلا؟ ما تيجوا نعرف من أين لك هذا يا محمد؟ وتفاصيل عن مشاريعه الجاية امال إنت فاكر إيه؟،ده بقى رجل أعمال من الدرجة الأولى…
شغال دكتور دلوقتى وفاتح عيادة، والنبى متتخضش أهدى كده، محمد لما إتسأل فى عزاء الإعلامى مفيد فوزى، إنت شغال إيه دلوقتى؟ قالهم زى ما سمعت كده دكتورلا وكمان فاتح عيادة. وبان كإنه بيتريق وبيستفز الجمهور، زى ما إستفزهم بأفعال كتير الفترة اللى فاتت.
بعض النظر عن إن مرواحه ملهوش لازمة،يعنى لو مراحش، الإعلام مش هيتقلب عليه ويقولوا ليه محمد غاب عن العزاء ومعملش الواجب،بس ظهوره فى التوقيت ده تحديدا لفت الأنظار سواء وجوده نفسه أو هيئته والبدلة اللى لابسها وعلى سنجة عشرة، ولما شافوه بقوا يقولوا محمد مين؟ محمد عامل النظافة بتاع كشرى التحرير؟
قالهم إنسوا عامل النظافة،وكشرى مين ،إنتو هتشوفوا واحد تانى الأيام الجاية،دلوقتى الناس بينادونى ب يانجم ويا فنان ،محمد قال إنه جاب فيلا فى الشيخ زايد أيوة زى ما سمعت، وطبعا حب ياخد اللقطة،ويكوش على الجو كالعادة ودخل بعربية لانسر أحدث موديل فى عزاء الإعلامى مفيد فوزى وبالظبط زى ماعمل فى عزا المحامى فريد الديب،و لا كان فريد الديب يعرفه ولا فى علاقة بينه وبين مفيد فوزى لا من قريب ولا من بعيد.
ده حتى وهو داخل عزاء مفيد فوزى قابل صاحبه من أيام لما كان عامل نظافة ها ،والحقيقة سلم عليه وبالأحضان، وسأله وزى ما يكون ميعرفش ولا عمره جرب،ها إيه الأخبار انت بتاخد كام؟ فرد عليه وقاله 50 جنية قاله لا إزاى المفروض 100 جنية وكأنه بيتريق عليه ونبرة سخرية فى كلامه كده .
الجمهور إتقلب عليه الفترة اللى فاتت،بعد ما كان متعاطف معاه زى الفنان أحمد العوضى ويمكن أكتركمان،وبقوا ضده وبينتقدوا أفعاله وقالوا ده اللى يتقال عليه شبع من بعد جوع.
الغريب إنه إستغل تعاطف الناس ده، وزى ما يكون خطوة علشان يتصدر التريند،والحقيقة هو نجح فى ده وفى قد إيه؟ شهرين بالتمام الكمال ، أتبرى من مهنته الأساسية اللى هى عامل النظافة اللى قبلها أصلا كان شغال سواق نقل،لما العوضى ساعده يطلعله الرخصة وشغله سواق فى المطعم اللى عزمه فيه على أكلة السمك إياها،فاكرين؟
محمد بيقول هو ده خسارة فيا؟أنا راجل فنان كبير..وأهم حاجة إن بحترم الناس،ياترى محمد شايف إحترام الناس إزاى؟
الحقيقة مش عيب أبدأ إن يحاول يحسن من مستواه،ويشتغل أكتر من شغلانة، ويكسب رزقه بالحلال، لكن مش بالطريقة دى ويقول بحترم الناس.
مخلاش وراه ورا عزاء يروح،لوكيشن تصوير وماله،تجمعات فنانيين ياريت،لقاءات صحفية وبرامج تليفزيونية ده المطلوب لا وإيه بقى يتشرط على أجره مش هيظهر لله وللوطن لا.
لا الغريب بقى لما بيطرد،وهو طبعا حقق رقم فياسى فى طرده من أول كشرى التحرير ولحد وقتنا ده ،بيعمل إيه بيظهر للناس بالراجل المظلوم اللى الناس والدنيا جاييين عليه وتلاقى ده بيطبطب ودع بيدلع، وده بياخد بإيده ويقف جنبه لا وهيعمل أغانى معاه زى عصام شعبان عبد الرحيم.
محمد حسابها صح وبقى التريند يجيب تريندات،ودخل الدايرة دى ومش ناوى يخرج منها،وبقى يدور على المشاهير اللى يقدر يتشهر من خلالهم وفى نفس الوقت قريبين من الناس وبيقولوا عليهم جدعان وولاد بلد.
محمد بالنسباله الطرد ده حاجة عادية، تهاجمه فده يبسطه اكتر، وحب الموضوع أوى، ماهو طالما التريند شغال عليه فهاجم كمان وميهمكش.
المفاجأة بقى اللى كشفها محمد الساعات اللى فاتت إنه هيشارك فى مسلسلين الأيام الجاية ولكن مصرحش بأى تفاصيل تفتكروا ده حقيقى ،ولا مجرد شائعات طلعها على نفسه علشان التريند يبقى فى جيبه،ويكوش عليه كالعادة يعنى؟
