هل هذا رجل أم امرأة بعضلات؟ الكل مستغرب وبيسأل ماذا تركت للرجال؟ بعضلات وجسم ضخم ظهرت للجمهور! وبمبدأ العضلات للجدعان مش شرط للرجالة فقط قدرت تكتسح التريند وبفيديو لا يتعدى الثوانى كسرت الدنيا الأيام الماضية دون ان تقصد!
فاطيما النمر اللى بنظرة منها تجيبك الأرض من شكلها ، صاحبة أضخم عضلات بالنسبة للبنات،اللى غيرت الفكرة وخلت الناس تقول فعلا البنت زى الولد مجاتش على العضلات يعنى!
مين فاطيما النمر؟ وإزاى حولت شكلها لكده؟إيه اللى يخلى بنت المفروض الدلع كله تبقى بالخشونة الرجالى دة؟ مش هتصدق عملت كده ليه؟ ورد فعل الرجالة غريب !قالولها لما نقوم نشوف قنوات الطبخ بيطبخوا إيه!
سخرية تعرضت لها فاطيما النمر بسبب المحتوى اللى بتقدمه فى فيديوهاتها..فاطيما يتطلع للجمهور فاردة عضلاتها وماشية ولا أجدعها بادى بلدينج وزى زيهم بالظبط!وده يمكن خلى ناس كتير تشمئز منها خاصة إن دى حاجة غريبة عن طبيعة البنات!
فاطيما بدأت تتعرف على السوشيال ميديا من 4 شهور بالظبط! قدرت خلال الفترة القصيرة دى تعمل قلق كبير على التيك توك بفيدوهاتها من الجيم ،والغريب إن أول فيديو نشرته كان محتواه مختلف تماما عن المحتوى اللى بتقدمه دلوقتى .
فاطيما نشرت فيديو وهى بتركب البرسينج فى خدها ..وبتشرح للبنات إزاى يستخدموه ،والغريب متكلمتش طول الفيديو ولا كلمة! فجأة الفيديو حقق نسب مشاهدة كبيرة وقلب التيك توك! ومن هنا طاقة القدر إتفتحت لفاطيما فاجئت الناس بالتقيل بقى برسينج إيه التوتو ده إحنا ندخل بالعضلات!
كل المستور إتكشف ،وفاطيما قررت تظهر للجمهور بشخصيتها الحقيقة ،وهى إنها شغالة مدربة فى جيم! ومش أى مدربة!وعندها 23 سنة!
فاطيما قررت تقعد مدربين رجالة كتير فى البيت! وبقيت زيهم فى الشكل ويمكن أكتر كمان! وقدرت تعمل اللى رجالة كتير مش قادرين يعملوه وخلت جسمها منحوت بطريقة غريبة!
الحقيقة إن فاطيما قدرت توصل للناس إن البنات تقدر تعمل كل حاجة وأى حاجة! فى الجيم ولا أجدعها مدرب ..ولما تلبس الفستان ليدى من الدرجة الأولى ..ومحدش يقدر يقول تلت التلاتة كام على إطلالتها!
طبعا عينك ما تشوف إلا النور ..كم هجوم غير طبيعى حصل الشهور اللى فاتت من بداية ظهور فاطيما ،والكل رافض إن بنت تعمل فى شكلها كده وتغير فى طبيعة جسمها !
وفى اللى قالها إن ده تشبه بالرجالة وطبعا ده فى الدين حرام!وإنهم مش ضد إن البنت تحافظ على جسمها وتهتم بلياقتها لكن مش بالعضلات!
رد فعل فاطيما على الهجوم ده بيكون غيروا منى وولعوا!وإنهم متغاظين منها وإنها مطلبتش رأى حد وهى مبسوطة كده!
السؤال بقى اللى حير كل الناس! إيه اللى خلى فاطيما تعمل كده فى نفسها!خاصة إن ملامحها جميلة،وقالوا إنها حادة شوية وده اللى ساعدها فى اللوك الرجالى ده!
يقال إنها إتعرضت لمعاكسات ومضايقات كتير فى الشارع،فقررت إنها تتعلم تحمى نفسها أو إنهم أصلا لما يشوفوها كده ممكن يخافوا وميقربوش منها خالص! لكن هى أكدت إنها عملت كده علشان تبقى زى البنات الأجانب..اللى كانت دايما من صغرها بتشوفهم فى المصارعة!
المفاجأة بقى اللى حولتها كده ،وكانت صدمة لكل الناس..هى إن فاطيما إتعرضت لموقف من 5 سنين ،.قلب حياتها رأس على عقب!فاطيما فقدت أختها ودخلت فى حالة نفسية صعبة جدا ,,حد عزيز عليها نصحها تروح الجيم وتطلع كل طاقتها وفعلا عملت كده وواضح إن الللى كان جوااها كان كبير علشان يكون نتيجة طاقتها شكلها بالعضلات دى، وشايفة أن البنات لازم يرحوا الجيم ويبنوا عضلات.
إنتوا بقى شايفين شكلها إزاى؟ هل هى حرة تعمل اللى يبسطها ولا ذنب الناس إيه تشوف بنت بالشكل ده! والرجالة هل توافق ترتبط ببنت زى فاطيما كده ولا تخاف على نفسك؟ شاركونا فى التعليقات.
