هم يبكي وهم يفرح، في ليبيا وبعد الاعصار فوجئوا بكميات مهولة من الدهب تحت الأنقاض، اللى يمد إيده كان بيطلع دهب، كله محفوظ بالشكل اللى اتساب عليه، مش معروف ليه صاحب ولا الكمية كلها على بعضها قد ايه.
المشهد غريب ومؤثر يمكن اول مره نشوفه تماما، الدهب بيتلاقى تحت الأرض وبكميات كبيرة ومهولة، الحكاية باختصار أن الدهب ده اتلاقى تحت الأنقاض اللى تسبب فيها إعصار دانيال في ليبيا الحبيبة.
فوجئ رجال الإنقاذ وقت محاولتهم المستمرة لإنقاذ ماتبقى من مدينة درنة المنكوبة، فوجئوا بكميات كبيرة من الدهب، أشكال وأحجام مختلفة، اوزان الدهب تتجاوز الكيلوات وكله دهب جديد وتقريبا لسه مصنع من فترة قليلة.
مين هما أصحاب الدهب ؟
وضح رجال الإنقاذ أن الدهب ده احتمال كبير يكون بتاع محلات دهب كانت فاتحه في المنطقة من فتره قبل ما يحصل إعصار دانيال ولما حصل الاعصار المحلات دى اتساوت تماما بالأرض والدهب اللى فيها فضل تحت أنقاض الاعصار.
ولأن المنطقة دي كان فيها مصريين كتير، فا الكلام دلوقتي ان الدهب ده ممكن يكون تبع حد من المصريين هناك، واحتمال برضوا يكون لغير المصريين.
السؤال دلوقتى: هما أصحاب الدهب الحقيقيين لما يظهروا يقدروا ياخدو الدهب أزاى ؟
السؤال ده جاوب عليه رجال الإنقاذ نفسهم في الفيديو الأصلى للواقعة وحكوا أن الدهب هيكون موجود عندهم في الأمانات لحد ما أصحاب الدهب الحقيقين يظهروا ويسألوا عليه بنفسهم، مع العلم أن احتمال ظهور أصحاب الدهب الحقيقيين صعب جدا زى ما حكى الناس في التعليقات على الفيديو الأصلى للواقعة، يقال ان فيه مفقودين كتير نتيجة إعصار دانيال، ويقال أيضا أن فيه عدد كبير من أهل مدينة درنة الليبية انتهت حياتهم نتيجة الإعصار، الأرقام والعدد كله لسه مش معروف بالتحديد، بس يقال أنهم تقريبا 11 ألف شخص انتهت حياتهم في ليبيا، والمفقودين تقريبا 20 ألف شخص.
المحزن جدا بقى أن الصليب الأحمر الليبى كشف في بيان ليه أن فيه تقريبا 2000 واحد مفقودين في البحر، الـ 2000 كلهم انتهت حياتهم وأخدهم البحر نتيجة الإعصار والسيول اللى نتجت عنه، ومن ضمن الأشياء المحزنة والبشعة اللى تسبب فيها الأعصار أنه أنهى حياة 250 مواطن مصري كانوا موجودين في ليبيا وقت الاعصار، وده وفقا للمنظمة الدولية للهجرة.
من ضمن المصريين دول كان فيه 90 شاب من أهل محافظة بنى سويف والاعداد كل شويه بتزيد يعنى أول مرة تم الإعلان أنهم 74 واحد، ودلوقتى تم الإعلان أنهم 90 تقريبا، مع العلم أن أول مرة سيارات الإسعاف اللى نزلت محافظة بنى سويف با جساد المصريين دول كانت بتنادى في الناس بأسماء اللى معاه، يعنى من كتر الأعداد مكانوش عارفين يعملوا ايه غير انهم ينادوا عليهم بالشكل ده.
في النهاية بنطلب منكم تدعوا لأهل ليبيا ولأهل المصريين اللى كانوا هناك، ادعوا ليهم ربنا يصبرهم على اللى هما فيه ويقويهم، وكمان لو تعرفوا مين هما أصحاب الدهب اللى لاقوه ده ياريت تكتبوا في التعليقات وتشيروا الفيديو ده عشان الناس تشوفه.
