العروسة أهدتهم الرقصة الأولى..فيديو لـ أب وأم فى فرح ابنتهم يبهر الجميع

لم يحالفهم الحظ علمل حفل زفاف عند زواجهم، فبنتهم فى فرحها عيشتهم الأجواء ورجعوا شقاوة زمان وقالوا للزمان ارجع يا زمان .اكلو الجو بلطافتهم وخفتهم وروحهم الحلوة وطاقتهم الإيجابية .

ده اللى عملته بنت فى فرحها لأبوها وأمها .. وظهروا فى فيديو بيرقصوا كإنهم فى العشرينات فياترى ايه الكواليس وإزاى عملوا كده وبنتهم عروسة؟ وليه الكل منبهر بهم كده

فيديو إنتشر الساعات اللى فاتت لعروسة وعريس وهو واقفين جنب بعض وهى ماسكة المايك وعايزة تقول كلمة للمعازيم وكتير عرايس بيعملوا كده فى الأفراح الفترة الأخيرة لكن العروسة دى غير ..

فى البداية كانت بتتكلم بالإنجليزى وبتحاول تهدى الناس اللى حواليها علشان تعرف تتكلم والكل يكون سامعها كويس وبعدين قالت وهى بتضحك وبتهزر..هحاول أقول اللي عايزة أقوله بالعربي فمحدش يضحك عليا أنا بابايا ومامتى معملوش فرح فقررت إن أفرحهم وأخليهم يرقصوا..

العروسة خدت العريس من ايده ونزلوا وقفوا حوالين أبوها وامها وهم مبسوطين وفرحانين وبيرقصوا واول ما بدأوا يرقصوا الأب قال للأم بعض الكلمات اللى مكانتش واضحة خلتها ضحكت علشان هى كانت مكسوفة لكن بمجرد ظهورهم ونسيوا إن فرح بنتهم وعاشوا الأجواء كإنهم هم العرسان .. وأكلوا الجو من العروسة اللى فرحتها وهى شايفة الفرحة فى عيون امها بالدنيا وما فيها .

خاصة إن أم العروسة لما شافتها بالفستان الأبيض وقت تصوير الفوتو سيشن مع العروسة والعريس اتاخد للأب والأم بعض اللقطات اللى أثرت فى كل الناس وكانت بتعيط والأب كان متاثر وبيحضنها ويبوسها من راسها وفى نفس الوقت الإبتسامة على وشهم ومش مصدقين إنهم كبروا مع بعض لحد اللحظة دى ماا جت وبيجوزوا بنتهم.

رقصة الأب والأم رغم إنها عادى يتحصل فى كل الأفراح إنهم يرقصوا مع بعض ،ولكن رقصتهم دى كانت مختلفة يمكن لإن بنتهم هى اللى قدمتهم يطلعوا ويرقصوا مع بعض رغم إنها المفروض تكون فقرتها هى وعريسها ولكن أختارت تكون أمها هى عروسة الليلة وأبوها العريس.

ويمكن كمان علشان روحهم كانت خفيفة وهو بيرقصوا وشكلهم كان حلو وحركاتهم سلسة ومناسبة إلى حد ما لسنهم كأب وأم ، ولكن لو محدش يعرف إنهم أب وأم العروسة كانوا قالوا صحابهم ومتجوزين جديد على الحب والرومانسية والإنسجام اللى كانوا فيه.

رقصوا على أغنية حسين الجسمى والكل اتفاجئ بإنهم حافظين الكلمات وبيقولوا مع الأغنية. وبقيت أم العروسة ترقص.. كمان إطلالتهم جذبت الجمهور لهم ورغم أن أم العروسة كانت لابسة فستان أسود بسيط خالص ولكن كانت فى منتهى الشياكة.. وكان بأكمام طويلة للأرض فأبو العروسة اتحزم بالأكمام ورقص معاها فى أجواء كلها فرحة مش طبيعية ..

الكل عارف إن الأب والام فى أى فرح بيكونوا منشغلين بالمعازيم والترحيب بهم . دول أكيد عملوا كده ولكن ده ممنعهمش أنهم يرقصوا حتى وسط الناس ويهيصوا معاهم ..

لما انتشر الفيديو ده عمل حالة جدل كبير ومفيش حد اتفرج علي فيديوهاتهم مرة إلا ورجع اتفرج تانى كتير من حلاوتهم ورحهم الخفيفة ..

إنتوا رأيكوا ايه فى اللى عملته العروسة لأبوها وأمها فى فرحها وكمان فى فرحة ورقص الأب والام اللى كله حب ورومانسية؟ شاركونا فى التعليقات.