من منا لا يعرف محلات التوحيد والنور التي تنتشر فروعها في كل مكان،لكن أنت تعرف إن صاحب هذه المحلات قبض عليه من سنة 2020، و تم الإفراج عنه من منذ أيام فقط.
لكن يا ترا هو اتسجن ليه؟ وإيه حكايته مع تعدد الزوجات؟ وليه صدر قرار بقفل محل من محلات التوحيد و النور؟ خلال الساعات الأخيرة تم إصدار قرار بالإفراج عن سيد السويركي مؤسس سلسلة محلات التوحيد والنور، وده بعد ما قضى 3 سنين داخل السجن
بس السؤال هنا: هو رجب السويركي اتقبض عليه ليه ؟
شوف يا سيدي، بحسب موقع فيتو، سنة 2020 قررت جهات التحقيق المعنية حبس سيد السويركي رجل الأعمال ومالك محلات التوحيد والنور، 15 يوم على ذمة التحقيقات ووجهت ليه النيابة كتير من التهم اللي كانت أهمها قضية تمس أمن الدولة بغرض الدعوة لتعطيل أحكام الدستور و القوانين ومنع مؤسسات الدولة والسلطات العامة من ممارسة أعمالهم
ومش بس كده ده كمان سنة 2021 يعني بعد ما تم القبض عليه في قضية أمن الدولة اتحكم عليه في قضية تانية خاصة بالنشاط بتاعه
بس إيه حكاية القضية دي؟
حسب جريدة الوطن، السويركي خالف عدد من القوانين الخاصة بالحماية المدنية لتأمين المباني والمصانع والمرافق و المنشأت العامة، ومخالفته لقانون المحلات العامة اللي تم إصداره سنة 2019
وده لأن المعاينة الميدانية لنشاط التوحيد و النور اكتشفت في أحد فروعه عدم وجود ترخيص، وعدم وجود عمالة مدربة على أعمال الإطفاء بالإضافة لعدم توافر اشتراطات الوقاية من المخاطر
عشان كده محكمة حلوان أصدرت حكم بغلق فرع التوحيد والنور المخالف، وغرامة مالية قيمتها 30 ألف جنيه، عشان تم إنشاء المبنى والفرع التجاري من غير ترخيص، كمان ألزمت المحكمة المتهم بالمصاريف الجنائية عن تهمة إدارة منشأة تجارية دون ترخيص
ومش بس كده دي كمان المحكمة قررت حبس سيد السويركي 3 شهور مع دفع كفالة 5 آلاف جنيه عن تهمة عدم اتخاذ الاحتياطات والاشتراطات اللازمة للوقاية من المخاطر ، وعدم وجود عمالة مدربة وده هيعرض المواطنين للخطر
وعلى فكرة مش قضية أمن الدولة والمحل الغير مرخص قضايا السويركي بس لأ دي البداية كانت سنة 2002، لما تم أتهمه في قضية تعدد الزوجات وده لأنه جميع بين 5 زوجات في وقت واحد كان من ضمنهم بنت قاصر، وده حسب موقع الدستور
وفي نفس السنة تم اتهمه في قضية تزوير محضر رسمي، وده لأنه زور أوراق جوازه من فتاة قاصر في وقت عدة طلقيته الرابعة، عشان كده اتحكم عليه بـ 7 سنين لاتهامه بتزوير قسايم الطلاق و الجواز بمساعدة مأذونين شرعيين
وحسب موقع العربية، أن خلال التحقيقات اكتشفوا أنه اتجوز 30 سيدة أغلبهم كانوا من العاملات بمحلاته، عشان كده قالوا عليه شهريار مصر
لكن عموما هو تم تخفيف الحكم بعد استئناف السويركي لـ 3 سنين
أما بقى في سنة 2014، تم إحالته لمحكمة الجنح بسبب إهانة علم مصر وده بعد ما المحامي سمير صبري قدم بلاغ ضده للنائب العام، لأن السويركي كان بيعرض أحذية عليها علم مصر
بس هو إيه مصير محلات التوحيد والنور دلوقتي؟
بص يا سيدي حسب جريدة الوطن، بعد القبض على السويركي والحكم عليه تم إصدار قرار من لجنة التحفظ على الأموال بإغلاق بعض فروع التوحيد والنور، وبالفعل تم تصفية بعض الفروع وإغلاقها
لكن على جانب تاني في بعض الفروع لسه شغالة بشكل طبيعي
ودلوقتي قولنا تعرف إيه تاني عن سيد السويركي؟
