هل تتذكروا موضوع المرأة ملزمة وغير ملزمة وإن الرجل ملزم يعمل كذا وغير ملزم بكذا ؟ هذا الموضوع وصل إن بقى يبقى بين الأب وبيته ليس هذا فقط، ليصل للمحاكم والبنت تجرجر أبيها فى هذا السن والسبب صدمة!
مش هتصدق عملت إيه فى أبوها علشان يجهزها للجواز! الموضوع بين مؤيد ومعارض وناس مع البنت وناس مع أبوها ،تابع الفيديو للأخر علشان تقولنا إنت مع مين؟ وشايف تصرف البنت إزاى؟ ودار الإفتاء حسمت الموضوع خلاص
هو فى حاجة ممكن تمشى بين الزوج والزوجة والأبناء بالإلزام والمحاكم؟ هل لما تحتاج حاجة من زوجتك او البنت تحتاج حاجة من أبوها أيا كانت يبقى بالإجبار؟ كل حاجة لازم تتم بالتراضى والحب والعطاء يبقى متبادل ..
لكن اللى حصل وشوفناها الساعات اللى فاتت بيقول غير كده خالص ،إتفاجئنا إن بنت رفعت دعوى على أبوها علشان يجهزها للجواز،والكل بقى يسأل طيب ليه عملت كده؟ هل هو رفض؟ طيب فى أب ممكن يرفض يجهز بنته؟طيب هل هى من الباب للطاق كده رفعت عليه قضية؟إيه اللى يخلى العلاقة بين أب وبنته توصل لكده؟
كل الحكاية إن المستشاؤة القانونية دينا المقدم،نشرت بوست على صفحتها وقالت الحكم ده مش خاص بمكتبنا ،وإحنا مش بنستقبل قضايا فيها خلافات تكون نتيجتها قطع صلة الرحم، ونشرت مجموعة من الصور فيها حكم من المحكمة بإلزام أب يتجهيز بنته اللى رفعت عليه قضية هى وامها بيطالبوه بدفع 133346 جنيه قيمة مصاريف جهاز بنتهم وإلزامه بالمصاريف والأتعاب.
وخلى بالك إن الأب دخله ثابت وحوالى 3 ألاف جنيه ،فالأب رفض يجهز بنته وإتحجج إن مرتبه قليل ومكفيهم بالعافية هيجيب منين؟
وطبعا إحنا شايفين ناس مرتباتهم زيه وأقل منه وبيعملوا مجهود جبار علشان ميكسروش بفرحة بناتهم وبيجيبوا كل حاجة وبزيادة كمان أنا بتكلم عن اللى بيدبر أموره بطرق سليمة مش يبقى مديون لا.
البنت بعد محاولات معاه مكانش قدامها حل واضطرت ترفع ضد أبوها دعوى بإلزامه بتجهيزها، لأن هى كمان فقيرة وغير قادرة على تجهيز نفسها.
وعلشان نكون منصفين بردوا فى بنات ب100 راجل فعلا متكفلة بنفسها من كل حاجة ومن صغرهم شايلين مسئولية نفسهم ومتحملين مصاريفهم الشخصية حتى مصاريف تجهيزهم وتلاقيهم بيشتغلوا وينحتوا فى الصخر علشان يخففوا الحمل عن أبائهم .
المهم إن لما البنت رفعت الدعوى ،والمحكمة أول درجة قضت برفض الدعوى،وإن تجهيز الأب لبنته ده نوع من أنواع الهبة ،وهو موعدهاش وأخلى بوعده ومش ملزم بتجهيزها ،وإن الأصل العام إن الزوج هو اللى يجهز زوجته.
البنت تسكت وتلم الموضوع وتعمل حساب إنه أبوها؟ لا طبعا صممت تاخد حقها بالقانون والمحاكم و بعد رفض الدعوى، اضطرت لاستئناف الحكم أمام محكمة تانى درجة لأسباب مخالفة الشرع بأن تجهيز البنت لزوجها من أقدس واجبات الأب.
محكمة الإستنئناف تانى درجة أصدرت حكم بالغاء حكم اول درجة وقضت بالزام الاب بتجهيز ابنته وقالت كلام مهم جدا فى حيثيات الحكم، عن موضوع الاستئناف..
المحكمة حكمت طبعا أولا بقبول الاستئناف شكلًا ثانيًا: وفى الموضوع: بإلغاء الحكم المستأنف والقضاء مجددًا بإلزام المستأنف ضده بأن يؤدى للمستأنفتين مبلغ ( ٦٠٠٠٠ جنيه ) مصاريف جهاز المسابقة الثانية وألزمت المستأنف ضده بالمصاريف عن الدرجتين ومبلغ 100 جنيه مقابل أتعاب المحاماة.
وعن موضوع الإستئناف ده أوضحت دار الإفتاء أن تجهيز منزل الزوجية ليس واجب على الزوجة لأن مهرها حق خالص لها، ليس لزوجها أو غيره أن يطالبها منه بشئ، إلا لو الزوج كان قدم لها فلوس زيادة عن المهر بغرض إعداد جهاز الزوجة، وأن الأب مش ملزم شرعا بتجهيز ابنته والزوج هو المكلف بتكوين مسكن الزوجية، لأنه هو الملزم شرعا بنفقات زوجته ومنها مسكن الزوجية وملحقاته.
وأنه إذا كانت أم الزوجة دفعت شيئا من ده فده يعتبر تبرع، وملهاش إنها تتطالب والد الزوجة ، ولكن قد يلزم القاضي الأب بتجهيز ابنته لو كبرت فى السن والجواز هيفوتها وخايفة على نفسها من العنوسة ، ومعهاش فلوس تجهز تتجهز بها،ويكون أبوها فى نفس الوقت ميسور الحال ويقدر على تجهيزها بأقل ما يمكنها أن تتزوج به من غير إسراف ولا تزيد فوق العادة.
وكان الثابت من التحري إلى دخله حوالي ٣ آلاف جنيها بمبلغ في حدود يساره شهريًا، ومن ثم تقضى المحكمة بإلغاء الحكم المستانف والقضاء بإلزامه بمبلغ في حدود يساره، اللى هو 60 ألف جنيه
إنتوا رأيكوا إيه هل مع كلام دار الإفتاء،وممكن الموضوع ده يتعمم؟ ولا شايفين إن الأب فعلا ملزم يجهز بنته ضناه اللى رباها طول عمره بيصرف عليها هيجى على وهو بيطمن عليها وبيفرح بها يتخلى عنها؟قد إيه كان بيعد الأيام والليالى علشان اللحظة دى يقوم يوصل بهم الحال للمحاكم؟ هل ممكن الإنفصال بين الأب والأم يكون السبب فى إن الموضوع يوصل لكده؟ شاركونا برأيكوا فى التعليقات .
