اكلفت 200 مليون جنيه وفيها 120 كيلو ذهب، هذا حجم تكلفة كسوة الكعبة الجديدة بعد ما تم استبدال الثوب القديم بالجديد خلال الساعات الأخيرة، طبعا هذا رقم صادم بالنسبة لناس كثير لذلك أطلقوا عليه أغلى ثوب في العالم.
بس ياترى ليه اتكلفت كل المبلغ ده؟ والدهب ده كله موجود فين على الكسوة؟ وياترى الكسوة القديمة مصيرها ايه؟
الساعات الأخيرة السلطات السعودية بدلت كسوة الكعبة الشريفة بكسوة جديدة وده كان وسط حضور كبير من زوار بيت الله الحرام، وده يجي بالتزامن مع بدء العام الهجري الجديد 1445
وطبعا ده مش حدث جديد وبيحصل كل سنة عادي، لكن الجديد بقى كانت في تكلفة كسوة الكعبة وده لأن السنة دي تكلفتها زادت، بس ياترى كسوة الكعبة اتكلفت كام؟
بص يا سيدي، حسب قناة العربية، فتكلفة الكعبة السنة دي اتكلفت 25 مليون ريال سعودي بدل من 20 مليون ريال اللي كان حجم تكلفتها السنة اللي فاتت، يعني تقريبا أكتر من 200 مليون جنيه مصري، عشان كده قالوا عليه أنه أغلى ثوب في العالم
ويرجع سبب تكلفته العالية دي لأنه مصنوع من أجود أنواع الحرير الطبيعي وأطرز بأفضل أنواع الخيوط، وحسب الرئاسة العام العامة لشئون المسجد الحرام، إن عدد المذهبات في كسوة الكعبة وصل لـ 53 قطعة منها 16 قطعة للحزام الأمامي و7 قطع تحت الحزام، وقالوا كمان ان الكعبة بتضم 17 قنديل
وقالوا أن كان فيه حوالي 114 صانع حرفي بيشتغل على الكسوة دي عشان ينتجوا 56 قطعة مذهبة على الكسوة وبكده وصل حجم الدهب الموجود على الكعبة لـ 120 كيلو جرام من الدهب، و100 كيلو من الفضة.
وقالوا إن جميع الأعمال اللي على كسوة الكعبة مصنوعة بشكل يدوي، وأن العمل على القطعة المذهبة الواحدة بتستغرق بين 60 لـ 120 يوم.
وحسب تصريحات سابقة لـ أحمد المنصوري، مدير العام لمجمع الملك عبد العزيز لقناة العربية، أن بيتم تفكيك الكسوة من المذهبات ظهر يوم التامن من ذي الحجة وده حسب الخطة التشغيلية والفنية لتبديل الثوب القديم بالجديد فجر يوم عرفة
وقال كمان إن الكسوة بتستهلك تقريبا 670 كيلو جرام من الحرير الخام اللي بيتم صباغته داخل المجمع باللون الأسود، وإنها بتتزين بكسوة من الحرير المبطن بقطن ومنسوج فوقها آيات قرآنية مشغولة بخيوط من الدهب والفضة.
وحسب موقع فيتو، حجم ارتفاع ثوب الكعبة بيوصل لـ 14 متر، موجود بالثلث الأعلى منه حزام عرضه 95 سم وطوله 47 متر فيه 16 قطعة محاطة بشكل مربع من الزخارف الاسلامية.
وعلى فكرة كسوة الكعبة بتتكون من 5 قطع ، منهم 4 قطع بيغطوا وجه من أوجه الكعبة المشرفة أما القطعة الخامسة فهي الستارة اللي بتتحط على باب الكعبة.
بس السؤال هنا: هي الكسوة القديمة بتروح فين؟
شوف يا سيدي، حسب موقع فيتو، الكسوة القديمة للكعبة بتتسلم للجنة من الحكومة السعودية واللي بدورها بتقطع الكسوة دي لقطع صغيرة جدا، وبتتوزع كهدايا تذكارية لكبار الشخصيات وللدول والسفارات في المملكة العربية السعودية، وأحيانا بتعرضها في المتاحف الوطنية في السعودية
ودلوقتي قولنا رايك في كسوة الكعبة الجديدة؟
