سيدة تسرق كيس هامبورج من السوبر ماركت؟ تشعل مواقع التواصل الاجتماعي وتعاطف معها الكثير، فكيف فعلت ذلك ولماذا، سوف نوضح من خلال هذا التقرير تفاصيل عن أغرب واقعة سرقة فى مصر.
في نيابة الأميرية قابلت ست متهمة بسرقة كيس هامبورجر من سوبر ماركت.. دى كانت الجملة اللى كتبها المحامى محمد فتحى على صفحته الشخصية الفيسبوك وبعدها بشوية عملت تحديث للمنشور وكتب إن النيابة أخلت سبيلها..
ومن لحظة ما كتب البوست وخلال الساعات اللى فاتت قصة الست دى بقيت حديث الناس على السوشيال ميديا،والكل بيتكلم عن واقعة سرقتها لكيس هامبورج من السوبر ماركت ،أغلب جماهير السوشيال ميديا إتعاطفوا معاها ،تخيل سرقت وإتعاطفوا معاها.. وده لأسباب كتير
الكل شارب الأيام دى من كاس الحالة الإقتصادية الصعبة ،والأسعاربقيت مش فى متناول إيدينا خالص ،وكتير إتنازل عن رفاهيات وسلع وإحتياجات كتير وقال الاولى فى الأولى،وفى بردوا على الجانب التانى اللى زى ماهو ويمكن أكتر كمان وبيشترى بشراهة يمكن السلع تخلص من الأسواق ولا حاجة ..
وفى بقى اللى مش لاقى الاحتياجات العادية اليومية،اللى تمشى اليوم،مش معاها زى ما بيقولوا كده اللضا،اللى يعيشهم بس.. ودى الست اللى سرقت كيس الهامبورج من السوبر ماركت..
كنا بنشوف المشاهد دى فى الأفلام والمسلسلات،إن ست تتنازل عن مبدأ فى حياتها،ومستحيل تعمل كده ،ونلاقيها عملت الفعل ده فى سبيل إنها متحسسش ولاها بالعجز اللى هى فيه..
تخيل إبنها يشوف بن الجيران بياكل شاندوتش برجر ،بشئ وشويات مش أقل من 300 جنيه،ولا زميله فى المدرسة اللى أمه مدياله لانش بوكس تمنه يأكل عيله،وهو لا حول له ولا قوة ..وكل شوية يطلب من أمه عايز كذا وكذا زى فلان هتعمل إيه الام فى الحالة دى؟ طبعا أنا مش ببرر لها فعل السرقة ،ولا ممكن يكون ده التصرف الأمثل فى حالة الإحتياج ،ولكن يكون فى رحمة فى قلوب الأخرين تجاه الست دى واللى زيها..
كلنا عارفين إن دلوقتى أغلب الاماكن فيها كاميرات،هل الست دى مكانتش تعرف؟ أكيد عارفة،ولكن ما باليد حيله،اتقبض عليها وهى بتسرق بطريقة ما، تفتكروا ده سبب يخلى إدارة السوبر ماركت تاخد إجراء زى ده ضد الست دى؟ولا مكانش قدامهم حل غير كده؟
الأراء على السوشيال ميديا كانت بين تعاطف مع الست ،وعايزين يتواصلوا معاها ويدلوها بدل الكيس 100،وبيطلبوا بياناتها وبيانات السوبر ماركت كمان،والموضوع هنا إتقلب بين الجماهير وهجوم من الطرفين عن إزاى لما تحتاج حاجة ومش معاك فلوس تشتريها إنك تسرقها،ولو كان صاحب السوبر ماركت كبر دماغه وعدى الموضوع كانت الست دى كررت نفس الفعل معاه ومع غيره،وكل اللى نفسه فى حاجة يسرقها .
وفى طبعا اللى بيقول إن دى متعتبرش سرقة،واللى يسرق أكل أو شرب علشان الجوع حكمه مفيش إثم عليه.
حقيقى بنشوف نماذج كتير لأم بتكون واخدة إبنها تأكله فى أغلى الأماكن وتلاقى ولد صغير بلا مأوى،مقطوع من شجرة لا ليه أب ولا أم ، قاعد بيتفرج عليهم من إزاز المطعم والتصرف هنا بيختلف إما بدخله وبيحصل مشكلة من إدارة المطعم إزاى بياع مناديل فى الإشارة يدخل هنا؟ وإما بتعمل نفسها مش واخدة بالها رغم إن عينها فى عين الولد ده ودموعه نازلة على خده..
شاركونا برأيكوا فى التعليقات، شايفين تصرف الست دى إزاى؟ هل إتعاطفتوا معاها ولا شايفين تصرفها مينفعش وإنها ممكن تشتغل أو تقعد فى بيتها معززة مكرمة ورزقها يجلها لحد عندها؟ تفتكروا إيه اللى يخلى السيدة دى او غيرها يلجأ لكده هل هى فعلا محتاجة؟ ولا ده داء السرقة عندها وممكن تكون مش محتاجة كيس الهمبورجر أصلا؟
