نفسيتى تعبت قسما بالله وجالى عمى ألوان ..هو إحنا علينا ذنب علشان نسيب العماير والأسفلت والمولات والعيشة دى ونجى نقعد هنا فى الرملة؟ ما حكاية الشاب المصرى اللى حظه وشغله جه فى صحرا السعودية؟ وبطريقة عجيبة وطريفة لن تصدقها وصف حاله وماذا قال إي؟ وفوق هذا كله بيقول السعودية جميلة وفى أماكن ممتعة ومستغرب ليه أهلها بيعشقوا البر؟ ما المميز فى البر؟إن ما فى ميزة تخليهم يحبوا الصحرا كده!
يبقى مجهز نفسه يسافر السعودية ،وفاكر ياما هنا يا ما هناك،خروجات وفسح والأهم من ده كله هيحوش فلوس ،ماهى المرتبات هناك غير ..
يبقى راسم فى خياله أحلام كده وردية وإن الحياة فى السعودية مفيش بعد كده !..لحد ما يتصطدم بالواقع ..وكل حاجة تبقى ضده وبدل الفسح والخروجات والنفسية الحلوة ..جاله عمى ألوان ومش شايف غير لون واحد بس .. اللون الأصفر لون الجبل والرملة محوطاه من كل حته .
فين الوناسة ..مع كامل أحترامى للشعب السعودى والعادات والتقاليد السعودية ..نلاقى السعودين بيقولوا لبعض فى الشتا والله إن الحق بر ..طيب أنا فى البر اهو فين الوناسة؟ مشوفتش وناسة قسما برب الكعبة ،شايفين شكلى والله بقيت عامل زى اللى بيطلع النخل!
دى كانت كلمات الشاب المصرى فى فيديو له صوره وهو فى الصحرا فى السعودية وبيتعجب: اهلنا فى السعودية بيحبوا البر ليه؟ الفيديو حقق نسب مشاهدات عالية على تويتر الساعات اللى فاتت لما نشرته صفحة شارمينج..
فى السعودية بيقولوا على الصحراء البعيدة عن اى عمار كلمة البر ..ويقصدوا بالوناسة الجو اللى فى بهجة وونس وهيصة وناس ..
طيب لما الشاب المصرى ده راح البر لاقاه صحراء فعلا مكدبوش ..إنما فين الوناسة اللى بيقولوا عليها ..جبال من كل حته حواليه ومنه للسما لحد ما قرب يجيله ضربة شمس ..كل اللى بيعمله فى يومه يبص للسما والارض .
الحقيقة إن كلام السعوديين صح ..علشان هم كل شتاء بيجهزوا نفسهم ،وياخدوا كل اللى يحتاجوه على عربيات كبيرة من اللى بنتقل العفش ويروحوا يقضوا كذا يوم وخاصة فى صحراء الرياض .
وبيقولوا على الرحلات دى رحلات البر،وبيختاروا فصل الشتا علشان المطر بيخلى الجو رطب والأرض مندية ، وطبعا الخضار يبقى محاوطهم من كل حتة .
الشاب ده بيقول إن مش اول مرة يجى البر ..جه قبل كده حوالى يوم21 ، وجاله عمى ألوان من كتر ماهو مش شايف حاجة غير الشمس والسما والرملة .
وقال أنا حاسس أنى قاعد على كوكب المريخ ،360 درجة صحرا ،علينا ذنب طيب؟،فى حاجات كتير حلوة فى السعودية وأماكن تهبل .
ووجه كلامه لأى حد سعودى بيسمعه ،وقالهم أنا مصرى ردوا عليا ناخد وندى مع بعض فى الكلام ، ليه البر؟ ليه الصحرا؟فين الوناسة فى المكان اللى أنا فيه ده ..مخى هيتقسم نصين قالك البر وناسة .طيب أنا فى البر أهو والله ما شوفت وناسة ..يارب لو فى وناسة وانا بكدب عليكوا الله لا يوفقنى .. فواضح اللى هو شافه غير اللى كل السعوديين متعودين عليه وبيعملوه فى الشتا .
من أنشطة ترفيهية وليوم واحد مش مقيم بشهور زى أخينا المصرى ده !
لو فكرنا فى كلام الشاب المصرى ده ..واللى يقصده السعوديين ..هنلاقى إنها نفس الفكرة عندنا هنا فى مصر فى رحلات السفارى والحقيقة لها ناسها ،فى ناس تحب الجو ده وجو الهدوء والرملة والسما والشمس وحلو اوى كده مش عايزين حاجة من الدنيا ..بالنهار على الرملة وبليل تعد النجوم فى السما ..
هنا بقى هنلاقى رأيين ..هو حد لاقى قاعدة زى دى بدائية وبدوية بعيدة كل البعد عن وش وزحام المدينة والهيصة اللى ملهاش لازمة ..ياريت يا أخى نقعد قعدتك دى..ولكن الحقيقة دى لو رحلة للترفيه لمدة يومين مش أكتر ..محدش يقدر يقعد أكتر من كده فى المكان ده ..لكن لما يبقى شغلك هنا ،وإنت كنت راسم خطة مينة وتطلع على فاشوش الموضوع بيكون صعب ولا إيه؟
وفى اللى مع الشاب المصرى ده وبيسأل نفس السؤال فين الوناسة؟مش شايفين إن وناسة فى الصحرا زى ما السعوديين بيقولوا..
أهالينا المصريين المقييمن فى السعودية ..إنتوا مع اللى الشاب ده بيقوله فعلا مفيش وناسة ؟وهل سبق وجربتوا تروحوا البر وتجربتكوا كانت إيه ؟ شاركونا فى التعليقات .
