تحول من موظف بسيط لمليونير،هذا ما حدث لواحد من المواطنين عندما ذهب ليصرف فلوس من البنك لكن اكتشف عندما عاد إلى بيته أنه أصبح لديه ملايين يقدر يحقق بها أحلامه ويعيش بها أحلى عيشة، لكن اللي حصل كان مفاجأة.
بس ياترى هو الشخص ده عمل إيه بالفلوس؟ والمبلغ اللي اتحوله كان كام؟ وجاله منين؟هو ممكن حد يلاقي ملايين ويرجعها لصحابها خصوصا في الظروف الاقتصادية اللي أحنا فيها دي؟ طيب ممكن حد يتحول ليه مبلغ كبير بالغلط ويرجعه ؟
طبعا ممكن، وفي ناس كتير اتعرضت للمواقف زي دي وقدروا أنهم يثبتوا أمانتهم ويرجعوا مبالغ ضخم جدا لأصحابها رغم ظروفهم الصعبة، وكان أخر مثال للناس دي هو صبري محمد
بس مين صبري محمد وياترى عمل إيه؟
شوف يا سيدي، حسب جريدة الوطن، صبري ده من أسوان وشغال مدير في الجمعية النوبية وكمان عنده مراكب صيد في محافظة البحيرة بيأجرها أو بيشتغل عليه جنب وظيفته عشان يقدر يوفر حياة كريمة لبناته الأربعة كل ده طبيعي وعادي
لكن اللي مش عادي الموقف اللي اتعرض ليه صبري لما كان رايح البنك عشان يصرف مبلغ الايجار واللي كان قيمته 26 ألف و500 جنيه لكنه لما مشي من البنك اكتشف أنه خد 2 مليون و650 ألف جنيه
وبحسب صبري، أنه رجع لموظف البنك وقاله أنك غلط في الحساب لأن المفروض اخد 26 ألف بس واللي حصل أنك وردتلي 2 مليون و650 ألف
طبعا الموظف استغرب من موقف صابر وفعلا اتاكد من الغلط ورجع الفلوس، والغريب أن صبري رجع بيته ومحكاش لحد اللي حصل غير لصاحبه اللي نشر قصته على مواقع التواصل الاجتماعي لدرجة أن حتى عياله معرفوش اللي حصل غير من الفيسبوك
صبري مكنش أول شخص لاقي مبلغ ضخم ويرجعه للبنك وده لأن من فترة حصل لشخص نفس اللي حصل تقريبا لصبري، لكن ياترى إيه اللي حصل للشخص ده؟
أنا أقولك، حسب جريدة الوطن إن الشخص ده اسمه محمد نوح من مدينة الغردقة، وبحسب نوح أنه لما راح يسحب مبلغ من ماكينة الصراف الآلي اتفاجئ بمبلغ ضخم جدا قرب من المليون جنيه في حسابه
وقال إن بعد ما اكتشف أن حسابه فيه المبلغ ده راح على طول للبنك وبلغ الموظف هناك باللي حصل، والموظف قاله ان المبلغ ده هو 785ألف جنيه اتحولو من بريد الغردقة لواحد من العملا ودخلو حسابه بالغلط
وقال كمان إنه من غير ما يفكر رد المبلغ لصحابه، وقال ” أنا بخاف ربنا ومش باخد أي فلوس مش من حقي”
ده كمان كان في واقعة طريفة جدا حصلت من شهور وانتشرت على مواقع التواصل الاجتماعي بشكل كبير جدا لما سواق تاكسي في المنوفيه قال إن في واحد من الركاب نسي مبلغ 40 ألف جنيه في التاكسي بتاعه ولما صاحب الفلوس رجع الموقف اللي بيركن فيه التاكسي عشان ياخد فلوس السواق طمنه ورجعله الفلوس
المفاجأة بقى كانت في رد فعل صاحب الفلوس لما أدى للسواق 20 جنيه مكافأة وقاله هاتلك علبة سجاير، وده اللي أثار سخرية رواد مواقع التواصل الاجتماعي من الواقعة دي
ودلوقتي قولنا أكبر مبلغ لاقيته كان كام؟
