هل هذا إعلان سيارة رسالة مشفرة؟ فهل يوجد شخص عاقل ينزل إعلان في أكبر جرائد مصر يبيع سيارة مستعملة!؟
ده اللي خلي الناس تستغرب من إعلان الأهرام اللي قلب الدنيا، وخصوصا انه مكتوب بطريقة غريبة، فياتري مين صاحب الإعلان؟ وليه عمل كده؟
إعلان منشور في الصفحة الأولى من جريدة الأهرام الرسمية بتاريخ 1 أبريل، كان المفروض يمر على الناس مرور الكرام، زيه زي غيره من الإعلانات الموجودة في كل حتة حوالينا.
بس المصريين طلعوه تريند والكل مستغرب من طريقة كتابته، طيب ليه؟
احنا بنتكلم عن الصفحة الاولي في الأهرام، ودي بينزل فيها دايما اعلانات حكومية او شركات كبيرة او اراضي غالية زي ارض ع النيل او فندق بيتباع ب ٤٠٠ او ٥٠٠ مليون جنيه، لكن واحد بيبيع عربية و كمان عربية عادية سعرها ٣٠٠ الف جنيه مثلا يبقى في حاجة مش منطقية!!!
وده يخلينا نسال إيه مواصفات العربية؟الإعلان ياسيدي بيقولك إن دي عربية جيب رانجلر امريكي ميلتري ستايل، بمواصفات خليجية، كمان موديل التسعينات بس فيها شوية تعديلات وفيها محرك رئيسي لستة سلندر 4.1cc،.
كمان صاحبها عدل مركز الثقل فيها لمنع الانقلاب على السرعات العالية، واستخدم فرامل M.B.S لضمان درجة أكبر من الثبات.
أما بقى أغرب معلومة في الاعلان، فدي مرتبطة بالاستبن الاحتياطي، لأن الإعلان بيأكدلك ان الاستبن الاحتياطي لم ولن يلمس الأرض، طب هو عرف المستقبل منين؟
ومش بس كده … ده فيها جهاز تعقب وتتبع، عليها تأمين شامل لكل الحوادث المرورية وحوادث القضاء والقدر لغاية نوفمبر 2024.
عشان كده الناس شككت في الغرض الحقيقي من الإعلان وقالك ده مش تصرف واحد طبيعي عاوز يبيع عربية، ده كفاية سعر الإعلان اللي هيكلفه كتير جدا، يمكن اكتر من تمن العربية نفسها.
عشان كده الناس بتسأل ايه ده؟ ومين سمح بنشره في الصفحة الاولي من الاهرام الجريدة الرسمية المصرية الكبري وفي الصفحة الاولي ؟ ولا يمكن دي رسالة مشفرة؟
وبعد الجدل ده كله، أخيرا في مصدر كشف اللغز وهي دي الحقيقة: ده إعلان عادي خالص لا فيه أرقام سرية ولا وسائل مشفرة، وخد المفاجأة بقى صاحبه مغني معروف وليه صفحة على الفيسبوك.
والحكاية ومافيها ياسيدي ان معاه عربية تمنها بالتعديلات اللي فيها يعمل اكتر من مليون جنيه، وكل التفاصيل مسجلة عند جريدة الأهرام.
بس يمكن اللي خلي الناس تستغرب اكتر واكتر هي وسيلة التواصل مع صاحب الإعلان، لأنه مكتبش تليفو ولا واتساب، وكل اللي سايبه ايميل غريب جدا اسمه random reaction، يعني بالعربي ردود افعال عشوائية، وخصوصا ان الايميل لسة معمول جديد بتاريخ 26 مارس.
لكن دلوقتي اللغز اتحل خلاص، فهل انتوا مقتنعين، وايه رأيكم في الشوشرة اللي حصلت بسبب الإعلان؟ شاركونا في التعليقات؟
