دفعت 9000 جنيه لكي تصبح مثل الملكة يوم فرحها.لكن للأسف الشكل الذى كانت تحلم به والطلة المميزة التى وعدها بها ميكاب أرتيست مشهور كانت وهم ،وأصبحت شبه عروسة المولد! ..المكياب أرتيست خدعها وكسر فرحتها ونكد عليها فى ليلة العمر وأصبحت صدمة العمر !
واقعة صادمة حصلت الساعات اللى فاتت كانت كابوس! وبدل ما تبقى الإبتسامة على وشها ..بان على وش العروسة القهر والكسوف من شكلها..وبانت كإنها فى عمر الأربعينات من تشققات وشها ..مش هتصدق إزاى هان على المكياب ارتيست يطلعها بالشكل ده..
إيه اللى حصل للعروسة ..مش هتصدق الصدمة اللى كانت فيها !إزاى إتحولت كده؟ ورد فعل الماكيير مستفز الحقيقة!
قالها فتحى عينك ..علشان تقول واو تحفة ! بجد إزاى عملت كده ؟إزاى طلعتينى كده..
هى فعلا قالت كده بس كان دموعها على خدها من الحزن ..الأغانى شغالة وهى فى دنيا تانية خالص!بتقول مكنش يومك و100 سيناريو فى دماغها ..والوقت ضيق والعريس مستنى والمعازيم على وصول ،والزفة هتبدأ طيب الفوتو سيشن..كان هيغمى عليها من اللى هى فيه!
فى الأول مكانش الميكاب صعب أوى كده والملامح متغيرة ..لإن العروسة ما شاء الله فى الحقيقة ملامحها حلوة فعلا! لكن بعد نص ساعة بالظبط .. بمجرد ما خرجت لعريسها إتصطدم بس طبعا مكسارش بفرحتها ..حتى صحابها كانوا متفاجئين من شكلها لكن حاولوا يداروا ردود أفعالهم ..
العروسة”صابرين” هاجمت الميكب ارتيست الشهير ده ..وكتبت على جروب خاص بالبنات على الفيسبوك وحسب ما نشر موقع صدى البلد :
“أنا فعلا مش عارفة ابدأ منين لأن يمكن البوست ده متأخر شوية بس ماكنتش اعرف حاجة عن الجروبات دي بالصدفة واحدة صاحبتي وانا بحكيلها اللي حصل معايا قالتلي ع الجروب ده..
انا كنت عروسة شهر 8 اللي فات تحديدآ يوم 28 كنت حاجزة مع ميكب ارتيست، اليوم ده كان أسود يوم في حياتي ولحد دلوقتي بكره أشوف صوري او الفيديو بتاع الفرح من شكلي ومنظري رغم إن أول ما دخل الاوضة قالي: انتي إزاي محافظة على بشرتك كده وكان فاكر اني كاوية شعري.
يعني انا اصلا في الطبيعي مش محتاجة شغل علشان اطلع حلوة لكن هو بوظ شكلي وطلع كل الصور اللي بينزلها علي صفحته دي شغل ايديت ومش حقيقية لاني حجزت ع أساسها والحقيقة طلعت صعبة.
عملي الميك أب،وأنا طبعآ مش شايفة فلما شوفت لما خلص انبهرت وكان تحفة بس ماعداش نص ساعة ووشي شقق زي الأرض الزراعية زي ما يكون عندي ألف سنة ولما بقوله قالي لا ده لازم يبقا الميك اب جاف كده علشان لما تخرجي من التكييف وتعرقي يندمج ويبقا تمام وان صدقت.
بعدها لما فوقت من الكابوس اللي حصل معايا قولتله انا عايزة فلوسي لان انت ماعملتش حاجة في اليوم غير انك خربتهولي كفاية اليوم باظ ..انت واخد ٩٠٠٠ ع الفاضي حرام عليك ..راح عملي بلوك من كل حتة وخلي المساعدين يكلموني انا وجوزي بطريقة زي الزفت وجوزي طبعآ عايز بطاقة صاحبه اللي سايبها تأمين للتاج فمضطر يسكت علشان صاحبه عايز البطاقة..
ده كان كلام العروسة بتحكى معاناتها يوم فرحها وتفاصيل اللوك كامل..من شعر وتاج وطرحة وميكاب طبعا! ..وبدل ما الميكاب أرتيست يعترف بغلطته ويعوضها ولو بالفلوس عن اليوم اللى كانت مستنياه لا ..زى ما شوفتوا كده زودها عليها ،فإضطرت توعى البنات وبكله بالصور ..لا عملت إيديت ولا لعبت فيهم زى ما هو بيعمل ويخدع الناس!
9000 جنيه راحوا على الفاضى ،لا وكمان عيوب فى وشها ظهرت مكانتش باينة فى العادى أصلا!
ده غير طبعا الفستان اللى باظ لما الميكاب ساح عليه وبهدله!
طبعا الصور دى عملت ضجة كبيرة جدا على السوشيال ميديا وسببت حالة خوف لعرايس كتير حاجزين مع الماكيير ده أو غيره ..لإن فعلا كله بيخدع الناس بالميكاب من خلال الصور والفوتوشوب مخلاش!
إنتوا بقى رأيكوا أيه فى الواقعة دى؟ شايفين إن تصرفها صح إنها شهرت به ونشرت صورها ؟ولو مكانها هتعلملوا إيه؟ وهل ممكن تثقوا فى حد وتعملوا ميكاب ولا ممكن بعد الواقعة دى هتقوقوا لا لميكاب الفرح وتستغلوا المبالغ الخيالية دى فى حاجة مفيدة تنفعكوا فى حياتكوا ؟ شاركونا برأيكوا فى التعليقات..
