أثارت أم جدلا واسعا خلال الساعات الماضية ،بعد نشرها لفيديو نجلها الصغير أثناء لعبه في منطقة الألعاب “الكيدز أريا”‘ في رحلة ترفيهية مع إحدى الحضانات، حيث ظهر الطفل في الفيديو وهو معلق من رقبته أثناء اللعب ويحاول التخلص من هذا الأمر لكنه فقد الوعي لمدة دقائق.
ونشرت الأم ما حدث معها عبر حسابها الشخصي على موقع التواصل الاجتماعي فيسبوك، قائلة “الفيديو اللي قدامكوا ده انا هحكيلكوا فيه كل اللي حصل بالتفاصيل، يوم الخميس 21/11 ابني اللي عنده سنتين ونص ولسه كلامه بسيط راح كيدز اريا مع الحضانة وبالنسبالي انا كنت واثقه في الحضانة جدا وكمان الكيدز اريا دي روحناها كذا مره يعني المكان كله لعب تناسب سنه”.
وتابعت الأم في صدمة كبيرة، “الساعه 3 الا ربع باباه راح يجيبه من الحضانة صاحبة الحضانة ألفت موضوع و قالت لباباه سليم تعب وودوه المستشفي بسبب انه كان مدروخ شويه من اللعب وخوفنا يكون جاتله ضربت شمس و الحمدلله الولد طلع كويس وباباه فضل يقولها ومكلمتناش ليه تقوله محبتش اقلقكوا والموضوع عدي وانا لما عرفت كلمتها وسألتها قالت نفس الكلام وقعدت تحلفلي ان ابني محصلوش حاجة النهاردة وكانت بتسال اللي حواليها بتقولها هو سليم حصله حاجه النهاردة قالتلها لا الولد محصلوش أي حاجة وقفلنا المكالمة على كده وصدقت ”.
واستكملت حديثها عن الواقعة، “بس بعد ما ركزت مع ابني لقيت رقبته عليها علامه حمره بارزه من قدام شكلها واضح اوي كلمتها تاني مره سالتها ابني اتخبط او وقع تقولي لا ونفس الكلام برضه سألتها ورقبته مالها تقولي ابنك شد رباط السويت شيرت جامد وابقي شيليه قفلت معاها وحاسه غن برضه في حاجه غلط، ابص الاقي رقبته من ورا كمان نفس العلامه و السويت شيرت كان مقطوع حسيت ان لا مش طبيعي روحنا انا وباباه ع الحضانة تاني كنا متاكدين ان في حاجه مش طبيعية باباه اللي اتكلم قالها انا عايز اعرف ابني حصله ايه النهاردة”.
وأضافت: “قالتله انا منهاره بجد وهقولكوا اللي حصل ابنك وهو بيتزحلق رباط السويت شيرت مسك في الزوحليقه و اتعلق من رقبته بس احنا لحقناه و جرينا بيه بس والموضوع مكملش ثواني وده مش اهمال وفضلت تحلف إنها مأهملتش فيه وشافته ع طول سألناها والكيدز اريا فيها كاميرات قالت للأسف لا ..باباه في وقتها راح عمل محضر إهمال وراح المستشفي قابل الدكتور وعرف إنها اصلا محكتش للدكتور اللي حصل لابني هي قالتله نفس اللي قالتهولنا انه فرهد من اللعب انتوا متخلين انها حتي الدكتور مقلتلهوش الحقيقة”.
واستكملت “تاني يوم اللي هو الجمعه كلمنا الكيدز اريا وعرفنا إن فيها كاميرات عادي و روحنا هناك الحمدلله الناس هناك كانت أمينة جدا وورونا الكاميرات وصورنا كمان الفيدييو وصاحب المكان كان متعاون جدا هو وكل الاستف الفيديو قدامكوا اهو، انا ابني اتساب اكتر من 3 دقايق متعلق من رقبته فضل يعافر دقيقه لحد ما غاب عن الوعي خالص و لمدة دقيقتين مغمي عليه ولا حد شايفه رايحين جايين وماحدش بص عليه لولا ستر ربنا إن طفلة صغيرة هي اللي تشوفه انتوا متخيلين اتشاف بعد قد ايه، و شايفين المدرسات واقفين بيعملوا ايه يعني مش مركزين مع أطفال تانيه مثلا ف مشافهوش لا هما واقفين بيتكلموا مع بعض وماخدوش بالهم إن في طفل من ضمن الأطفال اللي معاهم غاب عن عينهم لمده 4 دقايق بالتقريب يعني الموضوع محصلش ف ثواني زي ما الأستاذة قالت لا وكمان بعد تأليف موقف غير اللي حصل وإنها استغلت إنه مش هيقدر ييجي يحكي بس لا انا ابني كان بيموت وكان بيعافر لحد ما خلاص مقدرش واستسلم ابني بينام يعيط و بيحلم بكوابيس ومش عارف ينام حسبي الله ونعم الوكيل في أي حد مسؤل عن اللي حصل لابني واحنا مش هنسامح في حق ابننا ولا هنسكت غير لما كل الناس تعرف باللي حصل”.
