“طلبت 8 مليون جنيه عشان تتجوز” هذا ما قاله شاب امريكي عندما طلب الزواج من صديقة مصرية، وطبعا استغرب من المبلغ المطلوب منه ومن طبيعة الزواج هنا في مصر!
بس ياترى الشاب الامريكي ده قال ايه تاني؟ وعمل ايه مع البنت دي؟ وتكاليف الجواز هنا في مصر وصلت لكام؟
كلنا عارفين إن عادات الجواز في مصر غير اي بلد تانيه وده لأن تكاليف الجواز هنا ممكن توصل لملايين عشان المهر والشبكة والشقة وخلافه عكس اي بلد تانيه خصوصا لو دولة اوروبية: الجواز عندهم ماشي بمبدأ على قد لحافك مد رجليك، لكن هنا في مصر الدنيا مختلفة خالص.
عشان كده استغرب مواطن امريكي من تكاليف الجواز هنا في مصر، وده حصل لما قرر انه يخطب بنت مصرية عرفها عن طريق السوشيال ميديا، بس يا ترى ايه اللي حصل؟
بص يا سيدي، حسب المصري اليوم، الحكاية بدأت لما نشر الشاب الامريكي ده منشور على الفيسبوك عشان يسأل عن طبيعة الجواز هنا في مصر.
الشاب ده قال انه على علاقة بصديقة من مصر من 3سنين والبنت دي عندها 26 سنة وخريجة طب وهو مهندس برمجيات وعنده 27 سنة.
المهم اتفقوا على الجواز لكن اتفاجئ بطلباتها اللي كان مبالغ فيها جدا من وجهة نظره وده لأنها طلبت 260 الف دولار يعني 8 مليون جنيه عشان يتمموا الجواز.
وقال كمان إن المبلغ ده قسمته ما بين شرا العفش اللي سبق واشتراه الدها وكمان تكلفةالشبكة والمهر وشهر العسل وتكاليف الفرح.
وقال إنه من بعد ما سمع المبلغ المطلوب اتفاجئ وحس بالحزن، ولما قالها ان المبلغ ده كبيرا جدا قالتله ان دي عاداتنا في الجواز وده طبيعي.
وكمل وقال انا مش فقير وبكسب كويس جدا وبجمع في المتوسط 80 الف دولار ومعايا مدخرات بحوالي 16 الف دولار لكن مقدرش ادفع المبلغ ده كله في جوازة، ده غير انها قالتلي إني هدفع كل فلوس البيت لما توصل لامريكا
وفي الاخر وجه سؤال لمتابعين وقال هل اللي بيحصل ده طبيعي؟ و أرد عليها ازاي؟ وبتتعاملوا ازاي في الحالة دي؟ المنشور ده بعد ما نزل انتشر بشكل واسع ورواد الفيسبوك اندهشوا من طلبات صديقته دي
بس انت عارف تكاليف الجواز بتزيد الضعف تقريبا كل سنة والتانية وده حسب تصريحات منى بدير استاذ الاجتماع لروز اليوسف اللي قالت إن في سنة 2006 تكلفة الجواز كانت فى المتوسط 60.50 ألف جنيه، والرقم ده ارتفع ل 200.61 ألف جنيه مصرى فى عام 2012.
وانهاردة بقت تكاليف الجواز من 300 إلى 500 ألف جنيه، وده غير الشقة، وطبعا ده مش مناسب للقدرات المادية للشباب وبيضطرهم للانتظار سنوات طويلة أو العزوف عن الزواج، عشان كده بقى كتير من الناس دلوقتي بيطلقوا مبادرات لتيسير الجواز زي مبادرة بلاها نيش وغيره.
وكانت آخر المبادرات مبادرة تيسير الجواز اللي أطلقها مجموعة من الشباب في محافظة الاقصر وبالفعل تم تطبيق المبادرة وأول واحد تطبقها هو اللي أطلقها اللي قال للوطن إن الهدف من المبادرة دي هو تخفيف الكاهل عن العريس والعروسة يعني العريس مثلا عليه دبلة الخطوبة و20 ألف جنيه مهر، أما العروسة فهي غير مطالبة بنيش أو ترابيزة سفرة أو أوضة أطفال
ودلوقتي قولنا رأيك في تكاليف الجواز في مصر؟
