تشتري كيلو الفراخ من منطقتك بكم؟، أيا كانت إجابتك فهي لن تتخطى الـ 120 جنيه للكيلو الواحد، تخيل إن قلت لك أنه يوجد فراخ يصل سعر الواحدة فقط إلى نحو 3000 جنيه، إن في فراخ سعرها بيوصل لـ 3 آلاف جنيه للكيلو، أيوة زي ما سمعت كدة بظبط، ودي طبعا مش فراخ عادية دي حاجة كده للناس الرايقة واللي ممكن تدفع مبلغ زي ده عشان بس تشتري سلالة نادرة.
لو مش مصدقين خليكو معانا في التقرير ده وإحنا نقولكم إيه حكاية الفراخ دى وياترى الفراخ دي للأكل ولا للزينة وليه سعرها غالي كدة:
احنا قاعدين شاغلين بالنا بالفراخ البيضا والبلدي والبرازيلي بس في ناس تانية راحة تشتري الفراخ السودا ايوة ده اسمها ودي بتكون سلالة نادرة والطلب عليها بيبقى من ناس معنية.
والفراخ السودا دي ياسيدي أغلى فرخة في مصر ومش فـ مصر بس لأ في العالم كله ومشهورة بأسم لمبورغيني، وريشها بيكون لونه أسود ولحمها كمان لونه أسود وطعمها بيكون مفضل لكتير من الناس الأغنيا خاصة اللي عايشين في الصين .
العلماء بقى اكتشفوا إن السبب في لونها الأسود اللي بيغطيها من جوه ومن بره هو طفرة جينية، معروفة باسم الورم الليفي، وده معناه ببساطة ان الفرخة دي بتنتج حوالي 10 أضعاف الميلانين وده المسئول الأول عن صبغة الجسم وألوانه.
وحسب مربين للدواجن فـ الفراخ اللي لونها اسود قيمتها الغذائية عالية جدا يعني تقريبا الواحدة منهم بتعادل 100 فرخة بيضا وعشان كده سعرها بيكون غالي جدا.
ولو انت مش عارف فـ الفراخ السودا دي بتكون مربحة جدا بالنسبة للتجار وده لأنها بتاكل نفس اعلاف الفراخ العادية، وبيكون ليها زبونها الخاص واللي بيكون مزاجه رايق على الأخر.يعني مش بتكلف المربين حاجة لأ وكمان بيبيعوها بسعر عالي وبيحقووا منها مكاسب خيالية.
أما بقى سعر الكتكوت اللي في الفراخ العادية بيوصل لـ 20 جنيه بس أما سعر الكتكوت في الفراخ السودا فـ بيوصل لـ 300 جنيه وده لأن الفرخة دي تقدر تبيض حوالي من 20 لـ 40 بيضة كل أربع شهور بمعدل 300 بيضة كل سنة وده بيحقق أرباح توصل لـ 600 ألف جنيه انتوا متخيلين.
الجميل بقى إن أسعار الفراخ السوداء في مصر انخفضت بشكل كبير وبعد ما كانت الفرخة بتعمل حوالي 3 آلاف جنيه من حوالي سنة النهاردة سعر الفرخة الواحدة ألفين جنيه بس،والله يابلاش!
وده اللي أكده أحمد أنور، واحد من مربي الدواجن السوداء في مصر، وقال في تصريحات ليه إن الفراخ السوداء انخفض سعرها بشكل كبير عن زمان، وبعد ما كانت الفرخة بتتباع بـ 3 آلاف جنيه، بقت دلوقتي بألفين جنيه بس، وقال إن التراجع الكبير في الأسعار ده بسبب قلة الإقبال حاليا عليها.
قال كمان إنه عنده مزرعة صغيرة للدواجن السوداء، وكان في إقبال كبير من المواطنين عليها والفنادق كمان وده لأنها بتحتوي على فوائد غذائية كبيرة.
كمان اتكلم عن استيراد الفراخ دي وقال إنه بيتم استقدام البيض من إندونيسيا وبيتم تفريخه في مصر، وإنه يسعى الفترة دي إنه يشتري سلالات جديدة منها خاصة بعد إقبال ناس كتير عليها.
وهناك بيقوموا بتربية الفراخ دي مربين متخصصين وبيبيعوها بسعر خيالي بالنسبة للأنواع العادية .دلوقتي قولنا بصراحة هل جربت مرة تاكل الفراخ السودا دي وهل ممكن تدفع الرقم ده في فرخه ولا صعب ؟
