100 جنيه فقط وليس 30 ألف جنيه كما انتشر الفترة الماضية..صورة لقسيمة زواج انتشرت على الفيسبوك كشفت الحقيقة وقال صاحبها أن 100 جنيه فقط هي قيمة الرسوم الحقيقية لصندوق دعم الأسرة. فهل هذه الصورة حقيقية تابعنا لتعرف التفاصيل والحقيقة الكاملة.
خلال الساعات الأخيرة انتشرت صورة لقسيمة جواز حديثة، باين فيها إن رسوم صندوق دعم الأسرة 100 جنيه بس، وصاحبها كاتب عليها مش عارف اقول ايه ..لبتوع 30 الف الصراحه!
وبما ان اشتراك صندوق دعم الأسرة شاغل بال المصريين والكل عاوز يعرف تفاصيله، الصورة دي انتشرت جدا على الفيسبوك.
ولما دورنا على الحساب اللي منزل الصورة لاقيناه كاتب على صفحته: بنجيب سفره تعمل 30 الف وبنحط فيها اطباق وكاسات تعمل 30 ألف، وجبس وديكور واضاءة يعملوا 20 الف وبيفضلوا في البيت للزينه وبس، نيجي عند صندوق دعم المطلقات بـ 1000ج يا سيدي نقعد نعيط .
لا وفي ناس بتقولك اصلها مش ناقصه، انا اعرف ناس عاملين جبس بورد بس في الشقه ..يتخطي الـ 100 ألف.
بس المفاجأة بقى ان قسيمة الجواز كانت بتاريخ 12/16/ 2022 زي ماقال صاحبها، وده اللي خلي الناس تعلق على الصورة المنشورة وتقول ان الرسوم دي قديمة واصلا فكرة صندوق دعم الأسرة لسة متنفذتش، فمممكن جدا اشتراكه يزيد الفترة الجاية ومحدش عارف هيبقى كام.
أما بقى حكاية مبلغ ال30 ألف جنيه اللي انتشر بين الناس الأيام الأخيرة، فدى اصلها بوست كتبه واحد اسمه ياسر القرشي باعتباره مأذون ونصح الناس يتجوزوا بسرعة واللي يقدر يقدم معاد كتب كتابه يتحرك فورا بدل مايدفع 30 ألف لصندوق الأسرة وقالها صريحة: اتجوزوا بسرعة ياشباب.
وهنا السلطات بدأت تتحرك عشان تشوف ايه الحكاية وقبضت عليه وكانت المفاجأة: ياسر القرشي اصلا مش مأذون رسمي معترف بيه من الدولة، ده شغال مساعد لمأذون تاني.
أما ياسر فكل دوره انه يكتب البيانات في عقود الزواج وإشهادات الطلاق وإقرار الصيغة الشرعية والإيجاب والقبول، لكن مش من حقه التدوين في المحرَّرات الرسمية من دفاتر وعقود.
وفعلا النيابة اتأكدت من صحة كلامه، وهو كمان اعترف إنه صاحب البوست اللي عمل بلبلة في الشارع وكان هدفه المكسب المادي بعد نشر البوست، لأن الصفحة بتاعته عامة والكل يقدر يشوف محتواها.
عشان كده النيابة العامة أمرت بحبس المتهم ياسر أربعة أيام على ذمة التحقيقات، وإخلاء سبيل المأذون الشرعي المتهم لو دفع ضمانة مالية 5 آلاف جنيه، مع استكمال التحقيقات.
وفي الوقت نفسه، وليد سامى، محامى متخصص فى قضايا الأسرة اتكلم عن مسودة قانون الأحوال الشخصية الجديدة وقال إن القانون حدد موارد صندوق الأسرة كالتالي:
مبلغ 100 جنيه عن كل واقعة زواج بيدفعها العريس، و5 جنيهات عن كل مستخرج من وثيقة الجواز.و100 جنيه عن كل واقعة من واقعات الطلاق أو المراجعة، يدفعها المطلق أو المراجع، و10 جنيه عن كل مستخرج من وثيقة الطلاق.
وكمان 20 جنيه عند استخراج شهادة قيد الميلاد لأول مرة، و5 جنيه على كل المرات اللي بعدها. و5 جنيه على كل مستخرج من شهادة قيد وفاة أو القيد العائلى، وعلى استخراج بطاقة الرقم القومي.
وضيف على كده كمان طابع قيمته 5 جنيه لدعم رعاية الأسرة المصرية على كل الأوراق والمستندات التى تصدرها الجهات والهيئات المختلفة.
وعموما كلها أسابيع والقانون هيوصل البرلمان ونعرف الحقيقية فين، فتابعونا عشان تعرفوا كل جديد اول باول.
