تخيل إن معظم المواد الغذائية ومنتجات الألبان التي تدخل في أكلك بشكل يومي فيها مادة مصنوعة من حشرة الخنفسة.
ايوه بظبط زي ما سمعت كدة المصريين اكتشفوا إنهم كل السنين اللي فاتت دي كان بيضحك عليهم وبياكلوا مواد غريبة ممكن تتسبب في كارثة بتهدد حياتهم بشكل يومي
طيب ياترى الكلام ده بجد ولا متفبرك؟، ولو صح ازاي نخلي بالنا ونبعد عن المواد دي ، وهل اللي بيحصل ده ممكن يأثر على أسعار المواد الغذائية خليك معانا فى الفيديو ده واحنا نقولك كل التفاصيل:
الناس ماشية تكلم نفسها من الغلا اللي بقى بيحاوطنا من كل ناحية وبمجرد ما تدخل السوبر ماركت بأي مبلغ تحس إنه مش مكفي حاجة، لكن طبعا في منتجات اساسية لازم كل بيت في مصر يشتريها زي منتجات الألبان والزبادي واللبن المعلب والعصاير والمربى.
بس المفاجأة إن المصريين اتصدموا الأيام دي بعد ما انتشرت صورة لبعض المنتجات الغذائية اللي بيستخدموها بشكل يومي مرسوم عليها حشرة الخنفسه.
أيوة زي ما سمعت بظبط والصورة دي كانت مرتبطة بمواد غذائية معروفة زي الألبان والزبادي السادة والفواكهة والمربى والجيلي واللبن.
وكل المنتجات دي كان مرسوم عليها نفس الصورة وهي الخنفسه، مش بس كده ده كمان بعدها انتشرت اخبار بتقول إن المواد الغذائية دي بيتضاف ليها مادة وصبغة بتستخرج من حشرة الخنفسة.
وطبعا المصريين أول ما سمعوا الكلام ده كان عندهم حالة من الغضب كبيرة جدا وبدأوا يتداولوا الصور دي على مواقع التواصل الاجتماعي.
وده لأنه المعروف إن منتجات الألبان بيكون عليها إقبال كبير خصوصا في رمضان وتحديدا في وجبة السحور أو بعد وجبة الإفطار وده عشان يساعد على الهضم، وعشان الناس متحسش بالعطش طول فترة الصيام.
طيب هل الكلام ده حقيقي ولا متفبرك ؟ الدكتورة شيرين زكي وكيل نقابة الأطباء البيطريين ورئيس لجنة سلامة الغذاء كشفت إنه بيحصل كارثة في تصنيع المنتجات الغذائية في مصر خاصة منتجات الألبان.
وقالت شيرين ذكي في منشور ليها على صفحتها في فيس بوك إنها مستغربة ردود الأفعال على الأخبار اللي انتشرت على مواقع التواصل الاجتماعي واللي كانت بتأكد إن الزبادى بالفواكه مصنوع من الخنافس.
وده لأنها حذرت من الحاجات دي قبل كده بس لا حياة لمن تنادي، دي كمان أكدت إنها حذرت من وجود صبغة الكارمين اللي مكتوب عليها رمز E120 ودي بتكون من خنفساء الكوشونيل واللي بيتم تربيتها في مزارع وتجفيفها وطحنها عشان يستخدموها بعد كده.
وقالت إن في ماركات معينة بدأت تدور على بدايل للصبغة دي وتستخدم حاجات طبيعية، زي شركة المراغي في السعودية، واللي استبدلتها بمستخلص الفجل في زبادى الفراولة بتاعها،كمان ستار بكس من فترة قال إنه وقف استخدامها في منتجاته.
وقالت إن اللبن بالفواكه والزبادي بالفواكه والزبادو ومصنعات اللحوم كلهم بيدخل فيهم صبغة الخنفساء. مش بس كده دي الدكتورة شرين زكي أكدت إن مربي الفراولة والجيلي فيهم نفس الصبعة وإن ليبيا من فترة قريبة رفضت شحنة مربى فيتراك وعصير تانج بسبب الصبغة دي وده لأنها محرمة.
والمفاجأة بقى إنها اكدت إن الصبغة دي موجودة في اقلام الروج وأدوات التجميل ومورد الخدود اللي انتشر من فترة وبتستخدمه البنات وأسمه التنت.
وقالت أن المشكلة في أثار الصبغة دي واللي بتسبب حساسية خاصة إنها بتدخل في تصنيع كتير من اللحوم المصنعة زي اللانشون والبسطرمة والبرجر.
عشان كده بنشوف حالات كتيرة لأطفال بيجيلها حساسية وطفح جلدي بمجرد تناول ساندوتش برجر أو لانشون، وقتها الأم بتستغرب لأنها معتقدة إن الحساسية من الفراولة والبيض والموز وبس.
والغريبة إن منتجات اللبن والزبادي في الاسواق في مصر رفعت أسعارها الفترة اللي فاتت، وعندك مثلا علبة الزبادي العادي الطبيبي بتبدأ من 6 جنيه أنا الزبادي بالفراولة فوصل سعره لـ 6.85 جنيه.
أما مشروب الزبادي بالفراولة فبيبدأ من 8.75 جنيه. واللبن الرايب الـ 900 ملي بـ25.25 جينيه ، واللتر بـ 23.55 جنيه،
دلوقتي بعد كل اللي عرفته ده قولنا ممكن تشتري لبن وزبادي حتى بعد ما عرفت إنه معمول بـ بودرة الخنافس ؟
