خلال السنين الأخيرة ظهرت أميرة الدهب واحدة من التجار اللي لفتت الأنظار ليها بشكل كبير من خلال فيديوهاتها التي كسرت الدنيا، وهذا لأنها تجذب ناس كثير بكميات الذهب التي ترتديها وممكن تصل لأكتر من 2 كيلو.
لكن مين أميرة الدهب؟ وإيه هو شغلها الأساسي؟ وإيه نصايحها لكل اللي بيشتري دهب؟ وإيه هي حكاية العصاية الدهب؟
مين فينا ميعرفش أميرة الدهب اللي مكسرة الدنيا على الفيس بوك وكتير من مواقع التواصل التانية، وده لأن فيديوهاتها ليها جاذبية في شد المتابعين ليها بشكل كبير جدا.
من هي أميرة الدهب؟
هتصدق لو قولتلك إن أميرة الدهب دي كانت مهندسة معمارية، أيوة أميرة الدهب أو أميرة حسان خريجة هندسة معمارية، وبحسب جريدة الوطن، أميرة الدهب سابت مجال دراستها في الهندسة عشان تشتغل في المشغولات الدهبية لحد ما بقت من أشهر تجار الصاغة وبقى عندها محل وأتنين وتالتة وأربعة كمان
لكن السؤال هنا إيه اللي خلاها تسيب الهندسة وتشتغل في الدهب؟
بحسب تصريحات أميرة حسان في جريدة الوطن، إن من صغرها حبت مجال الدهب، لكن كانت بتتحرج لما تدخل أي محل عشان تشتري قطع الدهب اللي نفسها فيها، عشان كده قررت أنها تسيب شغلها وتشتغل في الدهب.
وقالت كمان لما اشتغلت في الدهب ناس كتير كانت شايفة أن المجال ده مش مناسب للستات، وقالت أنها واجهت مشاكل كتير أوي في بدايتها لكن قدرت في الأخر تثبت أنها مساوية للراجل.
وقدرت تثبت نفسها من خلال دراستها للمشغولات الدهبية بداية من التصنيع والورش لحد ما توصل للشكل النهائي، دي كمان خلت اللي شغالين معاها من الستات وده لأنهم أفضل في فهم ذوق البنات و السيدات اللي بيشتروا الدهب
وعشان تتميز في المجال ده قالت أنها بدأت بتصنيع المشغولات التقيلة لأنها بتجذب ناس كتير أوي من اللي مهتمين بالدهب، وعلى فكرة أميرة الدهب مش بس شغالة في المشغولات الدهبية دي كمان بتعمل تماثيل دهبية أو مطلية بالدهب وده الهدف منه أن المصنوعية تكون أقل على العميل.
وكان من بين الحاجات لأميرة الدهب اللي بقت ترند بسببها في الشهور الأخيرة، ظهورها بكمامة دهب وهي في واحد من المحلات الكبيرة وكمان عرضها لتيتنيا أطفال مصنوعة كلها من الدهب.
دي كمان ظهرت في فيديو مع عمدة قرية في سوهاج وهي بتبعله عصاية رأسها مطلية بالكامل من الدهب، الفيديو وقتها حقق ملايين المشاهدات وانتشر بشكل كبير جدا.
نصائح أميرة الذهب للشراء والاستثمار في الذهب
ردت وقالت إن الدهب يعتبر خزينة مهما كان في أزمات أو مشاكل إقتصادية في العالم عشان كده لو معاك كاش اشتري دهب بأي كمية لأنها بتزيد قيمة الفلوس.
وقالت كمان لما تيجي تستثمر في الدهب أشتري الدهب الخالص وده موجود في السبايك، لكن لو عايز تشتري مشغولات أشتري اللي مش عليها فصوص أو أحجار كريمة لأنها بتقلل من قيمة الدهب. وقالت إن أفضل إستثمار بيكون في عيار 24 في السبايك، وعيار 21 في المشغولات.
كمان أنت لازم تعرف أن أميرة الدهب مش مجرد تاجرة وخلاص، لأ دي على طول بتعمل مبادرات هدفها التيسير على المقبلين على الجواز، وده أصلا سبب شهرتها.
وكان من ضمن المبادرات دي مبادرة الدبلة اللي بوزن جرام اللي أعلنت عنها خلال الشهور الأخيرة بعد الارتفاع الجنوني لأسعار الدهب.
وساعتها المبادرة دي قلبت الدنيا، ومدير أعمالها قالت وقتها لموقع مصراوي إن أميرة الدهب اتجهت للمبادرة دي تيسيرا للزواج وعشان تناسب محدود الدخل.
ده قال كمان إن ممكن الناس تشتري شبكة كاملة تبدء من 4000 و 5000 جنيه بتتكون من دبلة وخاتم وحلق وإنسيال
ودلوقتي قولنا رايك في مبادرات أميرة الدهب؟
