جميعنا نرى الحالة المادية الصعبة ،والظروف الإقتصادية التى نمر بها،والشباب تنحت فى الصخر لكي يكملوا نصف دينهم، ويتزوجوا، ولكن كيف سيتزوجون في ظل المغالاة في الزواج ، ولكن أهل الصعيد قرروا أن يضعوا حد للأمر ووضعوا شروط وبنود لتسيير الجواز على الطرفين،ياترى إيه الشروط دى؟ وهل مناسبة للعروسين أم لا؟ وهل هيلتزموا بها أم لا؟ تفاصيل كثيرة عن المبادرة سنعرفها من خلال التقرير التالي:
أعباء من كل ناحية على العريس شبكة بالشى الفلانى هى مش أقل من بنت خالتها،شقة فى منطقة معينة زى أختها،مهر نفس مهر صاحبتها،ده غير تجهيزات الشقة والفرح ،طبعا لازم الفرح يبقى على أعلى مستوى عايز الناس تاكل وشنا.
ولما يتجوز يبقى مداين لطوب الأرض وبدل ما يبدأ حياته الزوجية مرتاح نفسيا وماديا ،لا يتجوز ويبدأ يسدد أقساط جوازه،والمشكلة الأكبر لا قدر الله لو حصل الإنفصال .
وبالنسبة للعروسة ،وخاصة فى الأرياف والصعيد الأم بتجهز بنتها وتدفع دم قلبها، وتصبح من الغرامات بسبب التجهيزات الأوفر اللى فوق التوقعات .
أيوة جايبة 3 شاشات ليه؟جايبة لحماتك غسالة ليه؟ حاجات فعلا بيعجز اللسان عن النطق لما بيشوفها أو يسمع عنها..
أخر مبادرة بين أهالى الصعيد وخاصة فى أسيوط، لما إنتشر على السوشيال ميديا صورة فيها شروط وبنود ومطلوب من الأهالى يلتزموا بها علشان يسهلوا الجواز للطرفين مش العريس بس..
بص ياسيدى الوثيقة دى بدأت بجملة تيسير الزواج بمحافظة أسيوط ومراكزها بشكل خاص والصعيد بشكل عام وتحتها من يسر زواج عسر أى تصرف غير لائق ممكن يحصل.
هقولكوا الأول قائمة الحاجات الملغية اللى مش هتتتعمل خالص :وهى نيش مفيش وطبعا لا تقولولى صينى ولا كريستال هم كام حاجة كده على قد الإيد تقضى الغرض .
وطبعا سفرة مفيش ،مالها لما تاكل قدام التليفزيون على ترابيزة على قدكوا؟وده فعلا اللى بيحصل فى أغلب البيوت المصرية .العشيان هتتغلى،مفيش بقى 100 جوز حمام للعروسة ولا التبزير فى الأكل والشرب وكأنهم أول وأخر زادهم.
الصباحية بقى،مفيش صباحيات وهيكتفوا بالمباركة بس صباحية مباركة يا عرسان،وطبعا إحنا بنشوف صور على السوشيال ميديا لصباحيات تكفى لإنعاش إقتصاد دولة بجد ونرجع نقول سبب الأزمة إيه؟
كله كوم بقى وإن والعروسة رايحة تفرش شقتها لازم البلد كلها تعرف إن فلانة هتتجوز وبتفرش شقتها وده طبعا لازم أسطول عربيات ومش بس كده الدجى يرج المنطقة ،ده هيتلغى مفيش دى جى ولا عربيات كتير أخرك يا عروسة 3 عربيات.
الغريبة إن ممكن ميكونش حاجات العروسة كتير وتتلم فى عربية واحدة،ولكن ليه عربية واحدة لما ممكن يبقوا 5 وأهو الصيت ولا الغنا.
ومن ناحية العفش بقى إنتو إتنين لسة متجوزين ليه تجيبوا أوضة أطفال؟لا وتتفرش كمان،ويجيبوا مستلزماتها كمان.نيجى بقى اللى مطلوب من العريس:
يجيب سكن للزوجية مناسب والعروسة متتدخلش فى تفاصيله،والشبكة تكون على قد العريس ،الفرح بلاش أفراح باهظة فى السعر والتفاصيل وعلى قد العريس وملهوش علاقة بحد من قرايب العروسة وعلى قد لحافه هيمد رجليه،
العريس هيجيب أوضة النوم والصالون وعلى قد فلوسه ،وعشا الفرح هيقتصر على العريس بس،لا حماتك ولا أهله هياكلوا من العشاء ده.
أما بقى العروسة هتجيب الأجهزة الكهربائية على قدر المستطاع،واللى محتاجاه بس وحماتك ملهاش لا تلاجة ولا غسالة ولا بوتوجاز تمام؟ ،وهتجيبى ياعروسة الرفايع على قد مطبخك بدل ما تتضطرى تخزنيهم فوق الدولاب وتحت السرير تمام؟
السجاد والستاير طبعا على العروسة فبلاش 3 سجاجيد للأوضة الواحدة .أما بقى ملابس العروسة الشخصية،بالمعقول إنتى مش هتفتحى محل ،ومع الوقت مش هتبطلى شراء لبس يعنى،كل مرحلة لها إستايل معين ولا إنتوا شايفين إيه؟
سمعنا عن مبادرات كتير فى الصعيد والأرياف الفترة اللى فاتت،بس لا بتتنفذ ولا حد بيلتزم بها والمبرر بيكون كل واحد على قده اللى عايز يجيب أكتر أو أقل يجيب ولكن المقارنات بتكون قوية زى مأنتوا عارفين والتنافس بيزيد وترجع ريما لعادتها القديمة ولا كأن فى مبادرة ولا غيره.إنتو أيه رأيكوا فى المباردة دى وهل ممكن تتعمم على كل المحاقظات،وهل هيلتزموا بها ولا مجرد كلام وبس؟
