ضحك عليا بكلمتين حلوين واوهمني انه رجل أعمال كبير عنده فلل و وعربات بالملايين.. استغل أنى موديل وبلوجر واتجوزني عشان يستغل جسمي ويعمل من ورايا شغل.. هذا جزء بسيط من حديث البلوجر الشهيرة سونيا تحكى عن معاناتها مع زوجها السابق.
إيه اللى حصل بالظبط مع البلوجر سونيا؟ وإزاى كشفت خداع زوجها ليها بعد ما عيشها في الوهم شهور؟.. كل ده وأكتر هنعرفه مع بعض في التقرير التالي:
اللى بيحصل مع المشاهير والبلوجر دلوقتى غريب جدا، كل يوم والتانى ونسمع عن مشكلة جديدة مع بلوجر شكل، كل اللى فاتوا كانوا هما الظالمين وواقفين قدام المحكمة بتهم شكل، دلوقتى والحالة اللى موجوده معانا النهارده هي المظلومة على حسب كلامها ومظلومة من مين، ده من أقرب واحد ليها بعد أبوها وأمها، مظلومة من زوجها.
البلوجر “سونيا” وزى مابيقول موقع صدى البلد في تقرير ليه حصلها صدمة كبيرة قوى الفترة اللى فاتت، مره واحده البنت اكتشفت ان جوزها وحبيبها طلع بيضحك عليها وبيستغلها لصالح رغباته اللى مش تمام، و الأكتر من كده أنه كان معيشها الوهم طول فترة معرفتها بيه، ضاحك عليها ومفهمها أنه عنده عربيات كتير وفلل في التجمع الخامس وفلوس في البنك تكفيهم يعيشوا طول عمرهم مرتاحين، وللأسف على حد كلامها طلع كل ده في الفاضي، طلع بيخدعها، وبيعيشها الوهم، لأجل رغباته اللى مش تمام.
موقع صدى البلد بينقل عن محامية البلوجر سونيا كلامها، المحامية نهى الجندى، الأستاذة نهى بتقول أن اللى حصل من زوج البلوجر سونيا لايمكن السكوت عنه نهائي، بتقول أنه طلب منها قبل كده أنها تلبس لبس مكشوف وشفاف بغرض أن جسمها يبان منه، عشان يظهر ده للرجاله أصحابه في الحفلات اللى كانوا بيروحوها سوى، كان عايز يستغل جمالها ده في أنه يشغلها موديل تعمل إعلانات وجلسات تصوير وحفلات وهوا ياخد الفلوس ويلم النقطة من وراها، كان عايز يستفيد منها ماديا يعنى.
هوا فعلا وعلى حسب كلام المحامية استفاد على الأخر وعمل فلوس زى الرز على كلامها يعنى، بس في الأخر انكشف، وأنكشف بالصدفة البحتة لما كان الزوج والبلوجر الشهيرة سونيا راكبين عربيتهم رايحين حفله من إياهم وبالصدفة قابلهم عدوا على كمين شرطة فا الظابط بتاع الكمين بيعمل تحرياته عليهم وهنا كانت المفاجأة الكبيرة لسونيا، أكتشفت أن جوزها نصاب وعليه شيكات وإيصالات أمانة لطوب الأرض، ودخل الحبس أكثر من مرة، من الأخر طلع بينصب عليها محلتوش أي فلوس.
المهم وبعد اللى حصل ده سونيا راحت تسأل عن الفيلا اللى كان مقعدها فيها زوجها، وأكتشفت أن الفيلا على نظام التأجير، طلعت متأجرة، زوجها طلع مأجرها من صاحبها وبالنسبة للعربيات اللى كانت معاهم طلع كان سارقها بردوا، وعايش معاها ببطاقة مزورة.
الأزمة بقى مع سونيا دلوقتى أنها لما طلبت الطلاق من زوجها ساومها انها تدفعله فلوس كتير، مبلغ ضخم وصفته بالملايين، بس هي ماسمعتش الكلام ورفعت عليه قضية خلع عن طريق المحامية نهى الجندى.
ودلوقتى بعد ما حكينا ليكم واقعة النصب البشعة على البلوجر الشهيرة، وأنتم كمان عارفين أن حال عدد كبير من البلوجر اليومين دول سئ جدا وبيحصل معاهم حاجات مش تمام، تفتكروا دلوقتى ليه بيحصل معاهم كده، هل لأنهم في الأصل مش كويسين ولا ايه السبب بالظبط ؟ .. الكل يكتب رأيه في التعليقات.
