هو التعويم مفيد؟ كيف يكون تحرير سعر الصرف مفيد في الوقت التي قيمة الجنيه المصري فيه بتقل، فعلى الرغم من أن سعر الدولار تخطى الآن الـ22 جنيه في البنوك إلا أن الناس تقول إن التعويم مفيد، تخيل إنه ممكن يبقى مفيد ويكون هذا القرار هو السبب في انفراجة كبيرة في أسعار سلع كثيرة مثل السيارات والأعلاف وغيرها من السلع، فماذا يحدث وكيف يكون التعويم مفيد؟ تفاصيل كثيرة سنتعرف عليها من خلال التالي:
خلال الساعات اللي فاتت أعلن البنك المركزي المصري عن القرار اللي الناس كلها كانت بتتكلم فيه الفترة الجاية وهو تحرير سعر الصرف.. وسط الكلام الكتير عن أيه اللي هيحصل في السوق المصري الفترة الجاية.
القرار اللي أصدره البنك المركزي المصري بالاعتماد على سعر صرف مرن وفقا للعرض والطلب يعني هيكون سعر الجنيه قدام العملات الأجنبية في البنوك وفقا للعرض والطلب.. مش بس كده كمان البنك المركزي أعلن عن رفع نسبة الفائدة على الإيداع والإقراض بنسبة 2%.
القرار ده اللي كلنا نعرفه باسم التعويم كان السبب في قفزة تاريخي عشان يتخطى سعر الدولار بعد القرار على طول الـ22 جنيه ولسه مازال في الارتفاع كل شوية وسط حالة من الارتباك الكبير في الأسواق والكل منتظر الزيادة الكبيرة في الأسعار اللي ممكن تحصل الفترة الجاية.
لكن الأمر ده مش كله شر.. لأن التعويم ممكن يكون مفيد ويفيد الاقتصاد المصري مش يضره.. طب إزاي؟
وفقا لكل التوقعات اللي كانت حاصلة الفترة الجاية فالتجار بالفعل في الأسواق كانوا بيحسبوا سعر الدولار بأكتر من 23 جنيه في السوق السوداء أو السوق التجارية وبالتالي فالزيادة دي مش هتكون السبب في ارتفاع الأسعار بصورة كبيرة لأن الأسعار أصلا مرتفعة.
مش بس كده البنك المركزي المصري أعلن عن أنه هيتفح الاعتمادات المستندية الفترة الجاية عشان يفتح الاستيراد في الفترة الجاية وبالتالي ده معناه أن هيكون فيه انفراجة في جميع السلع، خاصة السلع زي العربيات اللي متخزنة في الموانئ واللي هيتم فكها الفترة الجاية.. وده اللي أكده المستشار أسامة أبو المجد رئيس رابطة تجار السيارات في مصر.
مش بس كده كمان الأعلاف هيتم الإفراج عنها الفترة الجاية بعد توفير العملة الصعبة وبالتالي ده هيكون معناه أن هيكون في انفراجة في أسعار السلع زي البيض والدواجن واللحوم وغيرها بعد توفير الأعلاف
هاني أبوالفتوح الخبير المصرفي قال إن قرار تحرير سعر الصرف الهدف منه هو امتصاص الصدمات الخارجية بحيث إن الأهم للاقتصاد هو مش سعر الصرف لكن إزاي يكون فيه سيطرة على التضخم وده معناه استقرار الأسعار على المدى المتوسط.
الخبير المصرفي قال كمان إن تحرير سعر الصرف هيفيد في عدم ارتفاع الأسعار بصورة مبالغ فيها زي ما بيحصل في الأسواق المصرية لأنه هيكون في انفتاح للاستيراد وبالتالي هتكون كل السلع متوفرة من الأساس.
كمان قال إن معدل السيولة المرتفع في الأسواق المصرية هيفيد بأن يكون فيه تنافسية داخل الاقتصاد المصري مع توفير السلع.. وده اللي هيكون الفترة الجاية في ظل السيطرة على الأسواق عشان الأسعار مش تغلى بصورة كبيرة.
