أعلنت المطربة إيناس عز الدين، عن تعرضها إلى أزمة صحية شديدة من خلال منشور دونته على حسابها الشخصي، عبر موقع تبادل التواصل الاجتماعي فيسبوك.
وقالت إيناس: “مساء الخير أصدقائي الأعزاء ربنا وحده الأعلى والأعلم إني بكتب بالعافية بس كان لازم أطمن وأشكر كل إنسان سأل عليا، أنا من حوالي أسبوعين كنت اتفاجئت بنزول حصى كبيرة متفتتة وتوقعت إن لو فيه حصوة في الكلى أنها خلاص اتفتت ونزلت لوحدها، لحد من 3 أيام ظهر ألم شديد في جنبي اليمين والشمال وكنت باخد حقن مسكنة علشان أقدر أنزل أروح شغلي، وقولت ممكن تغيير الجو أو برد في عضمي لحد أول إمبارح الفجر لقيتني حرفياً بصرخ وببكي وبعض في الفرش من شدة الألم لدرجة خلتني أعتقد إنها الزايدة وبتنفجر”.
وتابعت: “وأنا بالذات مش بصرخ وأبكي بسهولة مهما كانت شدة الألم لأني تعودت على العمليات وحاجات كتير فعلشان أوصل للمرحلة دي كان الألم بشع، نزلت بوست أسأل فيه عن مستشفى كويسة قريبة من الحدائق، ناس كتير كتر ألف خيرهم ربنا يجازيهم خير رشحولي مستشفى عظيمة بمعنى الكلمة، روحت هناك وبالأشعة المقطعية والسونار والتحاليل اكتشفنا سبب اللي أنا فيه”.
وأضافت: “أولاً بعد ٣٥ سنة عايشاهم في الدنيا اكتشفت إن الكليتين ملتصقين، نوع من أنواع التشوهات في الكلى اسمه الكلى الحذوية أو حدوة الحصان، المشكلة إن أي شيء بيصيب الكلية دي بتتأثر بيه التانية وده اللي خلى الألم مضاعف ولا يحتمل، اكتشفت طبعاً وجود حصوات ونسبة صديد كبيرة جداً عملت التهابات شديدة جداً في الكلى والمثانة”.
