مثلما دعم الفنان رامي جمال موهبة المطرب النقاش، وكان يجهز له اغنية جديدة، عندما عرف بالهجوم ضده وإنه منع من الاوبرا، هو أيضا أول من دافع عنه وعن موهبته، ووقف ضد الموسيقار حلمي بكر لأجله.
الايام اللي فاتت حصلت ضجة كبيرة على السوشيال ميديا، بعد منع احمد سالم المعروف بـ “المطرب النقاش” من الغناء على مسرح دار الاوبرا في حفل ختام مهرجان الموسيقى العربية، رغم انه حضر البروفة مع الفنانة أصالة.
وحسب كلام الناقد الفني طارق الشناوي، إن ملحن كبير في اللجنة العليا للمهرجان هو السبب في ده، وطلع قرار بمنعه
ده اللي خلاه يهاجمه، ويقول إن الملحن بص للموضوع بنظرة استعلاء، وان عامل النقاشة يتناقض مع برستيج الاوبرا
وفي نفس الوقت خرج الموسيقار حلمي بكر، عضو اللجنة العليا لمهرجان الموسيقى العربية، وأيّد القرار وهاجم طارق الشناوي، وقال: “إنه مش بيعترض على المطرب، لكن مش أي حد يقف على خشبة الاوبرا
بمعنى على أي أساس اجيب شخص لا يمارس المهنة بمهرجان.. نفترض إنه غِلط في الغنا، المسئولية كلها هتقع على الجهة المنظمة، فكل واحد يحط لسانه في بقه ويسكت”.وقال إن الناس بتدافع عن الغلط.
ده التصريح اللي خلى الفنان رامي جمال يطلع يرد على حلمي بكر ويدافع عن أحمد سالم، وقاله: “حضرتك قيمة طبعًا بس أنا حاسس بريحة طبقية لأن الفن شروطه موهبة، وأحمد موهبته لا يستطيع أحد أن يختلف عليها”
وده عشان رامي جمال اول واحد دعم موهبة النقاش، ووعده إن هيبقى في دويتو ليهم مع بعض، والمفترض إنه هينزل قريب
وكمان مكتبه هيتولى إدارة أعماله لكن من غير ما يمضي على أي عقود احتكار.
بس كان لازم احمد سالم يطلع بنفسه ويوضح سبب منعه، في البداية نشر فيديو على حسابة على الفيس بوك، وقال إنه اتمنع من الغناء عشان الورق مكملش بسبب ضيق الوقت بس موضحش بالظبط ورق إيه..
لكن بعد الضجة اللي حصلت والهجوم على الملحن، طلع في برنامج اخر النهار، وقال انه جاله مكالمة من مكتب الفنانة أصاله وقالوله عايزينك تحضر معانا، والفنانة عايزاك تحضر الحفلة، وفعلا راح وحضر معاها البروفة
لكن قبل الحفلة بيوم واحد اتصل بيه حد تاني من مكتبها وقاله أنت عندك مشكلة مع الأوبرا، ومش هينفع تطلع على المسرح بكرة.
ولما حاول يسأل عن حقيقة الموضوع قالوله المهرجان هيبقى فيه الوزيرة وشخصيات كبيرة، ومش هينفع تطلع عشان أنت اسمك مش مصرح بيك تدخل.
لكن هو فاهم كويس إن اصالة مكنتش تعرف إن لازم يبقى معاه تصريح، بالعكس هي وقفت جمبه ودفعت عنه على المسرح وقالت هنشوف احمد سالم قريب على المسرح في حفلة تعلي من قيمة موهبته.
باين كدا حلمي بكر هيتعرض لهجوم كتير من الفنانين بسبب تصريحاته عن المطرب النقاش.
لكن في النهاية أحمد سالم محدش يقدر يختلف على موهبته.. وأي موهوب في بدايته بيقابل صعوبات تعطله شوية، لكن في النهاية موهبته بتوصل للمكان الصح.
