منذ فترة طويلة، ولم نسمع أخبار من خلالها تكون غادة عبد الرازق تريند،طول الفترة الماضية كانت تريند بفنها فقط! حتى انتشر خبر انفصالها عن الزوج رقم 12 في حياتها، فما قصة انفصالها وما هي الاسباب؟ تفاصيل كثيرة سنتعرف عليها من خلال التقرير التالي:
غادة عبد الرازق طول مشوراها الفنى عاملة قلق فى الوسط من خلافات وجوازات وإنفصالات،ده غير أعمالها الفنية اللى البعض بيصنفها إنها جريئة شوية ،ومنها بتبقى تريند.
وزى ما يكون الفترة اللى فاتت هو الهدوء اللى بيسبق العاصفة،وراحت هوب حذفت الصور اللى بتجمعها بزوجها هيثم زنيتا رقم 12،أيوة إتجوزت 12 مرة بجد.
وأعلنت غادة إنفصالها من خلال برنامج إيه تى بالعربى ،بعد جواز إستمر حوالى لسنين من وقت عرض مسلسل حكاية حياة فى 2013 ورفضت تقول الأسباب،وأكدت إن الأنفصال حصل بكل رقى وهدوء.
غادة إتعرفت على هيثم زى ما تقول كده فريق العمل بتاعها لما كان مدير تصوير مسلسل حكاية حياة فى 2013،اللى هى كانت بطولته،وإتجوزوا ولكن حصل الإنفصال بسرعة وبعد 6 سنين جمعهم القدر مرة تانية فى لوكيشن تصوير مسلسل سلطانة المعز فى 2020 وتحديدا فى مشهد الحنة ، واللى شهد على الزواج المؤلف والمخرج،وقالك خير البر عاجله.
يقال إن هيثم كان سبب الخلاف بينها وبين المخرج محمد سامى، لما هى شغلته مدير تصوير لمسلسل لها،ده غير خلافه الأساسى معاه لما وقف تصوير فجأة.
غادة عبد الرازق كانت حريصة دايما إنها تشارك الجمهور كل الللحظات الرومانسية اللى بتجمعها بزوجها على حسابها الشخصى إنستجرام، لحد ما كانت أخر رسايلها أخبرنى العالم إن كان أكتر من اللازم أو لا يكفى ،لإنك جعلتنى أشعر أننى على حق.
مش هتصدق رد فعل بنتها روتانا على خبر إنفصال أمها..كل الجمهور فضل يتابعها ممكن تنشر حاجة كده ولا كده أو تقول حاجة، لكن للأسف هى تجاهلت الموضوع خالص وخرجت نفسها منه وزى ما يكون قالت حياتها وهى حرة فيها تتجوز تنفضل ميشغلنيش.
الحقيقة إن غادة صرحت قبل كده فى حوارات لها إن سنها 50 سنة ،إتجوزت 12 مرة ،ومنهم هيثم زنيتا ياترى مين ال11 التانيين؟
أول زيجة لها كانت من رجل الأعمال السعوجى عادل القزاز ،وكان سنها وقتها 17 سنة ،وإستمرت أكتر من 7 سنين،وإنجبت بنتها الوحيدة روتانا،وقالت إن سبب إنفصالها خلافات بينهم.
أما الزيجة الثانية كانت من رجل أعمال بردوا بس مصرى بورسعيدي، ومستمرش كتير وحصل الإنفصال
وعن السبب قالت فرق السن كان كبير،وكانت بتعتبره زى أبوها مش جوزها.
كمان إعترفت غادة أنها إتجوزت من المحامي حلمي سرحان فى 2001 وأستمر الزواج أقل من سنة وانفصلوا على أول 2002 ،بسبب الغيرة الزيادة عليها.
وبردوا من أبرز الزيجات لغادة زواجها من المنتج وليد التابعى فى 2008 واللى أنتج لها خلال فترة الجواز فيلمين 90 دقيقة وأزمة شرف، وحصل الإنفصال بينهم فى 2009 بعد خلافات كبيرة.
وحاولوا يرجعوا لبعض أكتر من مرة ولكن التالتة كانت تابتة،وحصل الطلاق بلا رجعة.
وبعد فترة إتجوزت غادة من الإعلامى محمد فودة،واللى صرحت فى لقاءات لها قبل كده وقالت إن بينهم قصة حب كبيرة ،ولكن كل حاجة حلوة عمرها قصير وإنفصلت عنه وساعتها قالت إنه خانها.
ولإن غادة مش بتستغنى بسرعة،وبتدى الفرض كاملة ،وبتعمل الواجب وزيادة ،معاك ل3 طلاقات وبعد كده كل واحد يروح لحاله وده اللى حصل فعلا مع فودة رجعت وإنفصلت ورجعت تالت وإنفصلت وقالته شكرا معطلكش.
ها وبعدين فين باقى الزيجات؟ الحقيقة إن دول اللى صرحت بهم غادة،وشكلهم كانوا فى العلن،جايز يكون باقى الزيجات من اللى كده وكده الله أعلم!
تفتكروا سبب إختفاء غادة عن الفن والسينما تحديدا الفترة اللى فاتت يكون جوازها من هيثم زنيتا؟ خاصة إن بقالها حوالى 3 سنين مش بتشارك فى أى أعمال فنية،وكمان مش هتشارك فى السباق الرمضانى 2023.
وعن سبب إمتنعها عن السباق الرمضانى قالت لإنها مشغولة بتصوير فيلمها جوازة بالعافية.
ياترى ممكن غادة تدى فرصة تانية لهيثم زى باقى أزواجها وترجعله تانى؟ولا هتقول كفاية عليه وعليا كده؟وهل هيكون هيكون فى الزواج ال13 ولا هتعتزل الزواج شوية وتفكر فى الفن وبس؟
