أحداث وقصص كثيرة مرت علينا في 2022، وكلنا تأثرنا برفع الأسعار، خصوصا اللحمة والفراخ والبيض. لكن هناك كشههد سيظل عالق بأذهاننا دائما وهو مشهد التخلص من الكتاكيت، الذي قلب مصر، فهل سيتكرر هذا المشهد مرة أخرى في 2023 وما هي التوقعات للأسعار في 2023؟ تابعونا لمعرفة التفاصيل من خلال التقرير التالي:
2022 كان سنة غريبة بالنسبة للفراخ والبيض، عدوا بأزمات كتير الشهور اللي فاتت ولسه مش عارفين الأيام الجاية مخبيالهم ايه، يعني من أول شهر 8 لما الوزارة كانت بتحاول تقلل من سعر كرتونة البيض، وتطرح بيض وزارة الزراعة بسعر أقل، ساعتها قالوا ان احتمال كبير نشتري كرتونة البيض دي بـ 50 جنيه.
لكن الصدمة كانت ان ده محصلش، وعلى العكس سعر البيض زاد أكتر والكرتونة عدت ال80 جنيه، وبقينا نشتري البيضة ب3 جنيه، واتخضينا لما لاقينا المربين والتجار بيرموا الكتاكيت في الشارع، أو بينهوا حياتهم عشان مش عارفين يربوهم ومفيش اعلاف، والناس مش عايزة تشتريهم، ودي كانت الطريقة اللي بيعبروا بيها عن مشاكلتهم مع نقص الأعلاف.
وفجأة نسمع عن حاجة اسمها البيض المخصب، وان البيض ده بدأت المزارع توزعه بشكل اكبر من الاول وبسعر قليل للمستهلك عشان يحل الازمة، بس كل المتخصصين قالوا ان البيض ده مفيش منه أي ضرر، وكمان هو موجود من زمان.
ولو عايز تفرق بينه وبين البيض العادي، فهو لونه بيج وبيبقى واضح عن البيض الاحمر والابيض اللي عارفينه، بس السؤال هنا هل الوضع ده هيفضل مستمر وسعر كرتونة البيض العادية هيروح فين تاني؟
هو حسب الخطط للسنة الجديدة وكلام الدكتور رفيق قاسم، مدير عام الدواجن بوزارة الزراعة، في كمية كبيرة من اعلاف الذرة وفول الصويا، الدولة هتفرج عنها قريب.
كمان في آخر يومين الأسواق سجلت انخفاض في اسعار الاعلاف، وسعر الذرة قل من 15 ألف جنيه للطن لـ 13500 جنيه، وبرضو سعر فول الصويا انخفض ووصل لـ 35 الف جنيه للطن.
والخبر الحلو، إن رفيق قاسم أكد استمرار تراجع الأعلاف في الايام الجاية، لغاية ما الاسعار في السوق تستقر وترجع طبيعية تاني.
وبكده المربين مش هيبقى عندهم حجة عشان يرموا الكتاكيت، والمفروض بقى مع انخفاض أسعار الخامات يطلعوا دورات جديدة ويرجعوا يربوا من تاني، وبالتالي هيحصل تراجع في أسعار البيض والدواجن.
ولغاية دلوقتي سعر البيض في المزرعة مسجل 85 جنيه للطبق، وكل ما الدولة تفرج عن كميات اكتر كل ما الازمة هتتحل، وهنرجع تشتري تاني براحتنا.
يعني مش بعيد اننا نشوف في اوائل السنة الجديدة البيضة والفرخة سعرهم بيقل، بس قولولنا لغاية دلوقتي بتشتروهم بكام؟
