هل من رفض أن يشتري ذهب في 2022 على أمل أن سعره ينزل في السنة الجديدة حسبها صح أم ضيع الفرصة من ايديه؟ وإلى أين تذهب اسعار الدهب وهل ستزيد أم تقل؟ تابعوا معنا في التقرير التالي سنوضح حركة الذهب في الشهور القادمة.
لما تقعد شهر ورا شهر، وسنة ورا سنة تحط القرش جنب اخوه هتقدر أوي قيمة المبلغ اللي معاك وقبل متاخد اي خطوة هتحسبها بدل المرة ألف.
وفي أزمة زي اللي بنعيشها كتير مننا فكر يحول فلوسه دهب اهو يحافظ على قيمتها بعد تعويم الجنيه، بس للاسف الدهب في 2022 كان عامل زي القطر، واخد في وشه والأسعار كل شوية بتزيد.
عشان كده في ناس خافت تشتريه بالغالي وبعدين سعره ينزل يبقى خسروا فلوسهم، فهل في فرصة للي استنوا يشتروا في السنة الجديدة؟
هاني ميلاد رئيس شعبة الذهب شايف إن الدهب سعره طالع نازل وصعب أوي حد يعرف الأيام الحاية هيبقى بكام، وحتى لما الدهب سعره انخفض في مصر على فترات كانت برضه أقل من الانخفاضات في السعر العالمي.
ونصيحته للمصريين: اشتروا دهب ومتخافوش سعره ينزل، الدهب هيفضل حل امان ومضمون عشان فلوسك قيمتها متقلش.
بس أشرف غراب الخبير الاقتصادي قال إن سعر الدهب لسة موصلش لمرحلة الاستقرار وكلنا شفنا ايه اللي حصله في أواخر 2022.
في أول نوفمبر كان سعر الجرام يقارب الـ 1250 جنيه وبعدين فجأة لاقيناه بيزيد كل يوم تقريبا عشان يعدي 1800 جنيه.
وطبعا ده لما حصل الناس جريت تشتريه قبل ماسعره يزيد تاني لدرجة ان في حالات سحبت فلوسها من البنوك عشان تحولها لدهب، لكن بص علي سهره في آخر كام يوم هتلاقيه نزل لتحت مستوى ال1700 جنيه للجرام.
وحسب الخبير الاقتصادي الدهب مكمل رحلة الهبوط واحتمال يسجل سعر أقل من 1300 جنيه للجرام، عشان كده نصح الناس يأجلوا شراء الدهب خلال الفترة الحالية لحين الوصول لسعر مستقر.
بس خد بالك، أسعار الدهب مش هتفضل في النازل للأبد ولما الاحتياطي الفيدرالي الأمريكي يوقف رفع الفايدة، هيبدأ المعدن الأصفر يشم نفسه وسعره يزيد، وده وارد جدا يحصل بعد مرور اول 6 شهور من 2023.
وعشان حالة التذبذب اللي بتودينا وتجيبنا دي، الأفضل أنك متشتريش دهب بكل المبلغ اللي معاك مرة واحدة.
يعني الأحسن تراقب السوق وكل متلاقي السعر نزل تشتري حاجة، وبكده تبقى قللت الخسارة من تفاوت الأسعار بين كل فترة والتانية على قد ماتقدر.
وطبعا لازم تبقى عامل حسابك: الدهب استثمار عمره طويل يعني متشتريش النهاردة وتيجي بعد شهر ولا اتنين عاوز تبيع، لأ انسى الفلوس سنتين تلاتة.
وعموما لما تيجي تشتري اشتري سبايك أو جنيهات دهب، إوعي تشتري مشغولات زي الغوايش والخواتم، لان سعر المصنعية عليها بيبقى عالي وطبعا لما تيجي تبيع هتخسر المبلغ ده وفي الاول والاخر القرار ليك فقولنا بقى هتعمل ايه؟
