الدولار يجري والفراخ من ورائه! حالة غريبة يعيشها المصرين خلال الساعات الأخيرة والكل يضرب كف علي كف: فكيف أن يتعدي كيلو الفراخ 60 جنيه؟ وما اخر هذا الجنون في السعار، وهل ستستمر السعار في الصعود ام ستنخفض؟ كل هذا سنتعرف عليه من خلال التقرير التالي:
من امتى والفراخ أسعارها بتنط كده؟ سؤال غالبا هتسمعه اليومين دول وانت ماشي في الشارع، واللي كان ميخطرش على بال المصريين دلوقتي أصبح حقيقية.
واهو بقالنا فترة بنشوف زيادة شبه يومية في اسعار الفراخ والناس بدأت تتكلم عن وصول سعر الكيلو ل60 جنيه وأكتر كمان.
ادخل على جروبات التجار هتلاقيه بيشتكوا من رفع أصحاب المزارع لسعر الكيلو 13 جنيه في يوم، يعني لو فرخة 2 كيلو سعرها زاد 26 جنيه مرة واحدة، ومحدش عارف الحقيقة فين
ولو كنا في 2022 بنقول ان السبب نقص الأعلاف، فالمفروض ان الحكومة أفرجت عن كميات كبيرة منها بداية من ديسمبر لغاية دلوقتي، فازاي بقى الأسعار في ارتفاع؟
زمان كان سعر الفراخ بيتحدد حسب العرض والطلب، يعني لو السوق فيه عرض كفاية هتلاقي السعر مقبول ولو الموجود مش مكفي احتياجات الناس هتلاقي السعر في العالي.
لكن دلوقتي بقى عندنا مشكلة تانية وهي ارتفاع سعر الدولار والاعلاف مع بعض، وللاسف مع زيادة قيمة الدولار في البنوك متوقع استمرار ارتفاع أسعار الفراخ.
ده اللي قاله محمود العناني، رئيس الاتحاد العام لمنتجى الدواجن، لما وضح ان السيناريو الوحيد لانخفاض اسعار الدواجن في السوق هو تسهيلات اكتر في الإفراج عن شحنات الأعلاف المحجوزة في الموانئ، مع توفير المواد الخام اللازمة للإنتاج.
وده لو حصل السوق هيراجع الأسعار من نفسه وهنوصل لنقطة توازن تحقق السعر عادل للمواطن.
يعني بنلف نلف ونرجع تاني للأعلاف، فحسب عبدالعزيز السيد رئيس شعبة الدواجن، في تعطيل في الإفراج عن شحنات الأعلاف من «الذرة والصويا» وضيف على كده كمان ارتفاع الطلب والاستهلاك الفترة دي بسبب احتفالات عيد الميلاد.
والفكرة هنا ان الإفراج عن كميات زيادة من الاعلاف لو كان الخل في الأول دلوقتي مبقاش كفاية، لأن اتحاد الدواجن بيشتكي إن كميات الأعلاف اللي بتفرج عنها الحكومة بتروح لعدد معين من التجار بيدخلوها السوق السودة، وبعد ماكان التاجر بيكسبله 500 جنيه في الطن، دلوقتي مكسبه 4 الاف جنيه ويعدي كمان.
وعشان كده، سامح السيد من غرفة صناعة الدواجن طالب بتشديد الرقابة وزيادة الحملات على مصانع العلف خلال الفترة الجاية وكمان ربط مجازر الدواجن بمزارع الدواجن مباشرة.
ومش بس كده، ضروري اي حد شغال في منظومة الفراخ يبقي شغال ضمن البورصة السلعية المصرية زي السماسرة كده.
الخطوات دي المفروض انها تجمع السوق كله تحت مظلة واحدة وبكده نقدر نوصل لسعر الفراخ الحقيقي ، كمان تقليل المراحل اللي بتمر بيها الدواجن من ساعة متطلع من أرض المزرعة لغاية ماتوصل لايد المستهلك هيوفر على المواطن حوالي 8 أو 10 جنيه.
فهل تفتكروا ان الخطوات دي هتحل الأزمة فعلا؟ طيب آخر سعر سمعتوه للفراخ في منطقتكم كان كام؟ ولو انت تاجر أو عندك مزارع تقدر تقولنا المشكلة فين بالظبط؟
