معك ذهب؟ من الغد تذهب وتبيعه على الفور لان الوقت يمر وإن انتظرت ستضيع على نفسك فرصة كبيرة ، فما الأمر وما السر وراء نصيحة تجار الذهب للمواطنين ؟ هذا ما ينتعرف عليه من طيب من بكره تنزل تبيعه لان الوقت بيعدي ولو استنيت هتضيع على نفسك فرصة مش هتكرر تاني!
دلوقتي اي حد معاه قرشين قدامه اختيارين اما يشتري بيهم دهب أو يحطهم في شهادة الادخار الجديدة من بنك مصر والبنك الأهلي.
وبراحة كده خلينا نشوف مع بعض كل اختيار فيهم نظامه إيه ونبدأ بالدهب. لو بصيت على التعاملات في سوق الصاغة، هتلاقي المعدن الأصفر طالع نازل خصوصا مع ارتفاع الدولار رسمي في البنوك
بس في الغالب سعر الدهب بيزيد وحسب آخر التحديثات عيار 21 الأكثر مبيعا في مصر مسجل 1800 جنيه للجرام، وخد الكبيرة بقى:
عالميا، كل التوقعات بتقول ان سعر الدهب هيزيد في 2023، ونادي نجيب، سكرتير شعبة الذهب بغرفة القاهرة التجارية، قال إنّ سعر المعدن الأصفر خلال الفترة الحالية ما بين مناسب ومتوسط، سواء كنا بنتكلم عن بيع أو شراء.
وعموما المعدن الأصفر يعتبر الملاذ الآمن للأفراد، ودايمًا بنقول للناس متبيعوش الدهب اللي معاكم، لأنّ في أي وقت هتبيعه عمرك ما هتخسر فيه».
بس في نفس الوقت نجيب أكد انه مع أوقات انخفاض الأسعار أو ارتفاعها؛ الغرفة متقدرش تدي نصيحة محددة بالبيع أو الشراء خاصة أنّها عملية شخصية بحتة بترجع لظروف العميل نفسه يعني لو محتاج سيولة مادية حتى في أوقات الانخفاض مقدرش أقوله متبيعش الدهب اللي معاك».
ودا ياخدنا للشهادات الجديدة بفايدة 25%، نصيحة نجيب للمواطنين بتقول «طالما مبتستعملش الدهب اللي عندك، بيعه واشتري الشهادة واستفيد بالفايدة 25% حتى لو مدتها سنة واحدة، يعني ممكن تبيع أي قطعة من عندك بقيمة شراء الشهادة من غير ما تخسر فيه».
وعموما عشان تبقى ضامن الكفتين وفي الأمان ممكن تبيع جزء من الدهب مش كله، وتشتري بيه الشهادة وتاخد عائد شهري لو هتربطها بعائد 22.5% ، أو 25% لو هتاخد العائد في نهاية السنة.
وعشان تشتريها لازم تفتح حساب في البنك الأهلي أو بنك مصر والحد الأدنى للشراء هو ألف جنيه ومتقدرش تكسرها إلا بعد 6 شهور من تاريخ الشراء.
ولو خايف من زحمة البنك والطوابير الطويلة تقدر تشتريها اون لاين، وكل اللي عليك تشارك في خدمة الموبايل البنكي.
وبعدين تختار شراء شهادات من التطبيق، وتسجل البيانات المطلوبة، وتحدد قيمة الشهادة ونوعها، واخيرا الضغط على تأكيد لسحب قيمة الشهادة من الحساب.
وعشان تبقى عارف محمد الاتربي رئيس بنك مصر قال إن مدة طرح الشهادة محدودة مس هتعدي ال30 يوم وحسب آخر البيانات الشهادة لغاية دلوقتي جمعت 114.5 مليار جنيه.
فهل خدت قرار شراء الشهادة الجديدة خلاص ولا بتختلف مع التجار وهتحتفظ بالدهب اللي معاك؟
