هل مصر تقدر تصنع كاوتشات العربيات؟ لما لا وخاصة بعد أن أثرت الأزمة الروسية الأوكرانية على الاستيراد ولجأت العديد من الدول إلى التصنيع لحل أزمة نقص السلع فهل ممكن أن تتخذ مصر هذا القرار؟
بيقولك ده حصل فعلا وفي شركة طرحت إطارات سيارات ملاكي صناعة مصرية بأسعار رخيصة، ياترى الكلام ده حقيقى وهيأثر إزاي على أسعار قطع غيار السيارات في مصر؟
الايام دي انتشرت على مواقع السوشيال ميديا قائمة لـ إطارات مُصنعة محليًا في مصر، داخل مصنع بيراميدز بالمنطقة الصناعة في بورسعيد
طبعا كل المصريين فروحوا جدا وده لأن أسعار الإطارات كانت بتبدأ من 370 جنيهًا فقط، وبالشكل ده فأزمة نقص المعروض من إطارات السيارات هتنتهي واللي عانى منها الناس بعد وقف الاسيتراد.
لكن على عكس اللي توقعه رواد السوشيال ميديا، فـ قايمة أسعار الإطارات المنشورة كانت مخصصة للدراجات النارية وملهاش أي علاقة بالسيارات، واللي أكد ده إن مقاسات الإطارات اللي كانت موجودة في قائمة الأسعار كانت صغيره جدا ومش مناسبة خالص للعربيات.
لكن طبعا كل اللي نشروا قايمة الاسعار دي موضحوش المقاسات للناس وده عشان يقدروا يحصلوا على تفاعل أكبر على المنشورات دي، رغم انهم عارفين المقاسات كويس.
والقائمة دي كانت لـ مصنع بيراميدز واللي موجود بالمنطقة الصناعية جنوب بورسعيد، وبينتج إطارات الدراجات النارية والجرارات الزراعية واللوادر والقاطرات الزراعية والتمنايه “الفان”، بإجمالي استثمارات 3 مليارات جنيه تقريبًا.
وبدأ مصنع بيراميدز الإنتاج في مارس 2020، ووصل إنتاجه لـ 10 آلاف إطار يوميًا، وبيقدر يصدر منتجاته لكتير من الأسواق العالمية.
يعني المصنع ده مش بيصنع إطارات سيارات خالص؟ هقولك ياسيدي، في تصريحات لـ المهندس إبراهيم جودة، رئيس مجلس إدارة شركة بيراميدز لإنتاج الكاوتش ببورسعيد، قال إن قائمة الأسعار المتداولة للإطارات صحيحة فعلا وتابعة لمصنعهم.
قال كمان إن المقاسات المُوضحة في القوائم السعرية المتداولة على منصات التواصل الاجتماعي؛ تخص إطارات الدراجات النارية، والجرارات الزاعية، لكن في مقاس واحد بس يخص إطارات المركبة السوزوكي الفان.
لكن أكد إن إطارات السيارات الملاكي المصنع بيحاول العمل على إنتاجها الفترة اللي جايه، عشان تكون أول منتج مصري من النوع ده يتم طرحه في الأٍسواق وبنافس المستورد.
وعن معاد طرح إطارات السيارات للسوق المصري، قال إنه هيتم طرحها للمستهلك في نهاية العام الجاري 2023، وإن إطارات السيارات الملاكي المصرية هتكون مُنافسة وأرخص من المستورد.
طيب إزاي ده ممكن يأثر على السوق ؟لو انت عندك عربية أو متابع الأسعار فـ سوق قطع غيار السيارات بيعاني من أزمة كبيرة من 2022 ، وده وفقًا لخبراء بسبب القرارات الاقتصادية اللي صعبت استيراد بعض السلع.
والأزمة زادت مع نهاية السنة اللي فاتت وده لأن قطع الغيار مبقتش أصلًا متوفرة والمستهلك بقى بيواجه أسعار جنونية وصلت لـ 100% مقارنة بالأسعار قبل الأزمة وده بسبب وجود نقص شديد في إطارات السيارات .
قولولنا رأيكم في فكرة تصينع الإطارات محلياً وهل هنقدر ننافس الأسواق العالمية؟
