للسنة الثانية على التوالي يجمع حفل Joy Awards في السعودية نجوم من كل مكان، أسماء عالمية لا نراها غير في الرياض، وأسماء عربية لم نكن نتخيل أن نراهم مجتمعين في مكان واحد جمعه هذا الحفل العملاق، فماذا حدث كواليس Joy Awards لسنة 2023.، تابعونا لمعرفة الأسرار.
ميل جيبسون ومروان حامد على مسرح Joy Awards
شهد حفل Joy Awards حضور عدد كبير من النجوم والمشاهير سواء في العالم العربي أو في العالم كله.. لأول مرة نشوف نجم هوليوود ميل جيبسون في الوطن العربي.. لا وكمان بيسلم جائزة أحسن مخرج لمروان حامد عن فيلم كيرة والجن.. يا ترى شافه اصلا؟
لا ومش بس كده.. بيمر نجم بوليوود الشهير أميتاب باتشان.. اللي عرفنا منه يعني ايه سينما هندية.. وبيعتبروه في بلده أسطورة كبيرة.. وهو بيقول أنا مكنتش فاكر إن أفلامي بتتشاف في الوطن العربي والناس عرفاني وكده.. بس لما بدرية طلبة قالتله I love you بدأ يصدق تقريبا.
مش بس بدرية طلبة.. ده كل الممثلين اتلموا حواليه وقعدوا يتصورا معاه في الكواليس.. إلهام شاهين مسابتوش في حاله.. حسن الرداد حالف ما يطلع من الحفلة غير وهو متعاقد معاه على الفيلم اللي جاي.. وغيرهم كتير.. ده انت محبوب أوي يا عم أميتاب.
أول ظهور لجورج وسوف في Joy Awards
Joy Awards كمان شهد شوية مفارقات غريبة.. زي ظهور جورج وسوف لأول مرة في الحفل بعد أقل من شهر على وفاة ابنه وديع.. والصدمة اللي الناس كلها كانت متخيلة إنه مش هيقوم بعدها.. وناوي يعتزل كمان.. بس هو قرر يتخطى أحزانه ويجي يحتفل وسط أخواته
تلقيح أنغام وأصالة في حفل Joy Awards
أزمة أصالة وأنغام شكلها كده مش هتخلص على خير.. وكل ما نقول أصالة لمت لسانها وبدأت تجر ناعم.. ترجع تعمل مشكلة جديدة.. أنغام خدت جائزة أحسن مطربة وطلعت على المسرح وشكرت مصر وشكرت السعودية وطولت في كلمتها شوية
تطلع أصالة تاخد جائزة أحسن أغنية “شكرا للي مشرفنا”.. فا بدل ما تقول كلمتين حلوين وتنزل تقعد مكانها والحفلة تكمل عادي جدا.. قالت أنا مش ماليش في اللت والعجن والكلام الكتير.. ناقص تقولها سمعاني يا أنغام
طب خدتوا بالكوا نانسي عجرم اتصدمت ازاي لما أنغام خدت جائزة أحسن مطربة وهي كانت خلاص بتستعد إنها تطلع على المسرح واسمها يتنده؟.. صدمة وحشة أوي.. المرة الجاية بقى يا قمر
حضن رامز جلال ومايا دياب في Joy Awards
وطبعا فاكهة الحفلة كانت رامز جلال.. اللي دايما بيعمل حركات مش منطقية.. والناس بقت بتخاف تسلم عليه أصلا.. زي مايا دياب اللي قالها والنبي لازم أصور الحضن اللي بينا ده.. وعمرو أديب اللي مسابوش في حاله و”حفل” عليه بعد ما ماتش الأهلي والزمالك خلص.. وطبعا عمرو أديب كان زعلان عشان الزمالك خسر.
