على مدار يومين ومازال الجماهير على السوشيال ميديا تحتفل بفوزلا الأهلى بثلاثية نظيفة على الزمالك ،وليس أى إحتفال، بل أنه احتفال تسبب ف غضب جماهير الزمالك، وقد دخل ك.مدحت شلبي على الخط واحتفل بعباراته غير العادية.
لكن الجملة دى تحديدا عملت جدل كبير جدا على تويتر يا ليلة ريد على المستبد،ما تيجوا نعرف كواليس الجملة دى وليه شلبى قال كده وكان يقصد إيه؟ مش هتصدق رد فعل مرتضى منصور إيه؟
هو المباراة تكمل من غير إرتجالات وإيفيهات مدحت شلبى على الهوا،المباريات إيه عير هتاف وتشجيع وجمل شلبى الى بتطلع من القلب وتوصل القلب؟
ده كان رد جمهور الأهلى على جملته اللى بقيت تريند الساعات اللى فاتت يا ليلة رد على المستبد،اللى قالها مدحت شلبى أثناء التعليق على مباراة القمة بين الأهلى والزمالك فى مباريات الدورى المصرى..
بقالنا يومين الجملة دى مكتسحة السوشيال ميديا،مش بس كده بقيت تدخل الشغل على زمايلك مبتقولش صباح الخير لا بتقول صباحكوا ريد على المستبد ولا إيه؟
مدحت شلبى لما لقى هجوم كبير عليه الساعات اللى فاتت وخاصة من جمهور الزمالك ،برر جملته دى فى برنامج مساء دى إم سى.
شلبى قال إن هدفه الأول والأخير إن الناس تستمتع بالمباراة على قد ما تقدر وتتبسط فى البيوت وتزقطط ،وإن الشوط الأول كان هادى شوية منزوع الدسم ،على عكس الشوط التانى كان مولع وكله حيوية ،بغض النظر عن غضب الزمالك وفرحة الأهلى،ولكن هى دى كرة القدم .
شلبى قال إنه كتير بيعلق على مباريات القمة،ولو سألنا أى حد منصف هيقول إن شلبى عمره ما إنحاز لفريق بالعكس فى مباريات قمة قبل كده قولت يا ليلة زرقا لما كان الزمالك لابس أزرق وكسب الأهلى والجملة دى كسرت الدنيا ساعتها .
شلبى قال كمان إنه بيكون قدامه إختيارين للتعليق ،هل الجمهور عايز تعليق تقليدى ولا عايز يتبسط،لو عايزين تتبسطوا سبونى أنطلق اللى فاز نديله إيفيهات واللى خسر مش هاجى عليه بالعكس بشجعه وأقوله هارد لاك وتتعوض ،وخلاص الناس فهمت ده .
شلبى ماشى بمبدأ إنك ممكن تزعل منى بس مش هتعرف تكرهنى ،وإنه بيعمل شغله بكل مهنية،وأكد كمان أنا دائما أقول يا ليلة حمراء أو يا ليلة بيضاء، على حسب لون اللبس سواء للأهلي أو الزمالك ،وفي مباراة القمة دى قلت أغير شويه بدل ما أقول يا ليلة حمراء أقول يا ليلة Red على المستبد وأنت يا أهلي مستبد،وده أجتهاد منى بيطلع على الهوا.
الغريب إن مش ده الإيفيه بس بتاع شلبى اللى قاله فى المباراة،شبلى مع كل جول من ال3 كان بيقول إيفيه زى مثلا لما كهربا جاب الجول الأول اللى كان فاتحة الخير ، قال بس إتعملت له دواء.
كهربا جاب الجول وخرج،وسلم العداد لمحمد شريف وبعدها شريف حاب الهدف التانى، ولما محمد شريف دخل الجول التانى قال محمد شريف كفارة يا شريف
ومع الجول التالت ، شلبى علق وقال تلاتة تلاتة بس يا شريف علمنى الرقص ،الفرويد فرويد الهداف هداف القناص قناص ،شريف عاد لموقعه الحريف.
حتى إنه علق على هدف شريف فى مداخلته الهاتفية وقال إن شريف عنده مشاعر متضاربة ،لإن كولر المدير الفنى للأهلى كان صرح قبل كده وقال إنه مش مقتنع بالمهاجمين اللى عنده ،وشريف واحد منهم فهو قال كإن شريف بيقول لكولر أقعد غنت وسيبنى ألعب ،وإنه قدر يعبر عن نفسه تعبير جميل جدا فى الشوط التانى،وده هو جمال الشوط التانى من المباراة ،وإن الأهداف هى اللى بتدى المتعة للمباراة..
الغريب بقى رد فعل مرتضى منصور على إيفيهات وتعليق شلبى،منصور تجاهل الموضوع على غير العادة بعد هزيمة الزمالك.
وكانت أخر الخلاف ده لما منصور قاله بردوا بعد مباراة قمة وفوز للأهلى هو إحنا نخلص من شوبير تطلعلنا انت؟ وبردوا بعد تعليق شلبى على مباراة الفريق الأول لكرة القدم بنادي الزمالك مع الهلال السعودي، في بطولة كأس سوبر لوسيل،منصور قاله هتستفاد إيه لما تتجاهل رئيس البعثة اللى بيمثل مصر فى قطرأمير منصور؟ للأسف انت مش محترم وكبرت في السن وده السبب الرئيسي انك بتعمل كدا، أرجو من الجميع مقاطعة الاستماع لهذا الشخص .
تفتكروا ليه عمل كده فى عز ما السوشيال ميديا بيحصل فيها هجوم كبير عليه وجدل كبير بين جماهير الأهلى والزمالك؟ شاركونا برأيكوا فى التعليقات.
