ازمة الدولار مازالت مكملة معنا، وهذا لأن أسعاره مقابل الجنيه مازالت في حالة صعود وكل يوم في زيادة وهو وما جعل الحكومة المصرية تحاول تأن تبحث عن بدائل للدولار في تعاملتها مع الدول الأجنبيه لكي تخفف من الضغط على العملة المحلية.
والفترة دي روسيا بتستعد عشان تاخد قرار مهم جدًا هيقلب كل الموازين وهيساعد مصر إنها تخفف من حد أزمة الدولار، ياترى إيه هو القرار وهل هيكون ليه علاقة بصادرتنا الروسية، وإزاي ده ممكن ياثر على مستقبل الجنيه في مصر؟
طبعا كلنا عارفين إن مصر تعتبر واحدة من أكبر مستوردي القمح في العالم و بقت معتمدة بشكل كبير على الحبوب الروسية والأوكرانية في السنين اللي فاتت.
ولأننا دولة مستوردة في الأساس أثرت علينا بشكل كبير أزمة الدولار الفترة اللي فاتت، وعشان كدة دلوقتي الحكومة بتحاول تدور على بدائل وتبعد عن الدلار خالص في تعاملتها التجارية مع الدول.
المفاجأة بقى إن روسيا بتتفاوض دلوقتي مع بعض البلاد الإفريقية عشان تكون التجارة ما بينهم بالعملات الوطنية وعلى رأسهم الدولة المصرية.
وده على فكرة الكلام اللي أكدته نائبة رئيس الوزراء الروسي، فيكتوريا أبرامشينكو، وقالت إن تركيا دفعت مقابل تزويدها بالحبوب الروسية بالروبل، وإن روسيا بتدرس الفترة دي تصدير القمح لمصر بنفس الطريقة.
وحسب تصريحاتها روسيا حاليا بتتفاوض مع البنوك المركزية لبعض الدول عشان تنظم عمليات التجارة ما بينهم، وده مش هيكون للإمدادات الغذائية زي القمح والزيوت بس لكن هيكون في مجالات تانيه كتيرة.
طيب هل ممكن مصر تستورد القمح بالجنيه ولا لازم الروبل؟
الحقيقة إنه مصر هتقدر تستورد القمح من روسيا بالجنيه كمان مش بس بالروبل، لأنه من فترة أعلن البنك المركزي الروسي عن قائمة العملات الأجنبية الجديدة واللي بيتعامل بيها وكانت القائمة دي من ضمنها الجنيه المصري واللي بيساوي دلوقتي حوالي 2 روبل روسي.
والقرار ده فرح ناس كتير وقابل ترحاب من المصريين على كل مواقع السوشيال ميديا، وده لأنه بيثبت إن الجانب الروسي هو كمان عايز يخلص من أزمة ارتفاع الدولار وده بانه يتعامل بالروبل وعملات تانيه ويلغي الدولار خالص.
طيب القرارات دي كلها معناها إيه؟هقولك يا سيدي، القرار اللي أخده المركزي الروسي وإنه أدرج الجنيه ضمن تعاملاته المالية هيسمح لمصر وروسيا باستخدام الروبل والجنيه في المعاملات التجارية بين البلدين وده هيكون بدل الدولار.
ولو انت مش عارف فـ حجم التبادل التجاري بين مصر وروسيا حوالي 4.7 مليار دولار وده كان أخر رقم لسنة 2021.وطبعا خبراء الاقتصاد رحبوا بالخطوة دي واعتبروها خطوة كويسه هتكون في مصلحة مصر، وهتساهم في استقرار سعر الدولار، وقالوا كمان إننا لو استوردنا القمح بالروبل الأسعار هتقل لأنه التكلفة هتكون أقل بكتير .
دول كمان اتمنوا إن الصين تعمل نفس الخطوة دي وده لأن السوق المصري مليان بالبضائع الصينية.وقالوا إن مصر لو دفعت بالروبل أو الجنية مقابل واردتها من روسيا هتكون هي الكسبانة لأنه في حالة استوردت بـ الروبل هتكون عندها مخزون منه كويس وده لأن السياحة الروسية بتمثل نسبة كبيرة من السياحة الأجنبية الوافدة لمصر.
وده الكلام اللي أكده الدكتور علاء عز، الأمين العام لاتحاد الغرف التجارية، وقال إن دخول الجنيه المصري ضمن العملات المعتمدة في البنك المركزي الروسي هيكون ليه تأثير كبير في تعاملات الجنيه العالمية.
قولنا دلوقتي رأيك في قرارات الحكومة الروسية وهل شايف إن التجارة بالروبل والجنيه هتساعدنا نتخطى أزمة الدولار؟
