انخفضت قيمة الـ 200 جنيه، وإن كنت تشتري بها سلع كثيرة خلال السنوات الماضية، فإن الوضع تغير كثيرا الآن فهل لهذا علاقة بالتضخم، وكيف سيؤثر ذلك علينا؟ وكيف سيتصرف البنك المركزي من أجل مواجهة تلك الأزمة؟ تابعونا من خلال التقرير التالي لمعرفة المفاجأة.
الجهاز المركزي للتعبئة والإحصاء أعلن مؤخرًا إن معدل التضخم السنوي الإجمالي لمصر زاد لـ 26.5% واللي بيعتبر أعلى معدل مصر وصلتله من 5 سنين.طيب هو ليه التضخم بيزيد وده هيأثر علينا إزاي ؟
في البداية لازم تعرف هو يعني إيه تضخم؟ بص يا سيدي ارتفاع التضخم ده معناه إن أسعار السلع بتزيد قدامك زي الأكل والشرب وتكلفة المعيشة بشكل كامل، وفي نفس الوقت الفلوس اللي في جيبك قيمتها بتقل ومش بتكفي زي زمان.
يعني لو معاك 200 جنيه فـ مش هتقدر تشتري نفس الحاجات اللي كنت متعود تجبها بالسعر ده وهتلاقي إنها تسوى أقل من قيمتها بكتير.
وهنا بقى كل الناس بتلجأ إنها تحط فلوسها في دهب أو شهادات أو أي حاجة تحافظ بيها على فلوسها من خطر التضخم لحد ما موجة التضخم دي تستقر.
وعشان كدة ناس كتير بتسأل دلوقتي ياترى الحكومة هتعمل إيه وهل ممكن تطرح شهادات جديدة بفايدة مرتفعه عشان تواجه ارتفاع التضخم.
ولازم تعرف إن البنوك عشان تاخد قرار إصدار شهادات جديدة بتعتمد فيه على تطورات معدلات التضخم
يعني بتشوف هل هو فعلا زاد بشكل كبير فعلا ووقتها بتتدخل عشان تصدر شهادات تقلل من التضخم .
وده اللي قالته الدكتورة سهر الدماطي، الخبيرة المصرفية وقالت إن القطاع المصرفي ممكن يدخل مرة تانيه عشان يقلل مستويات التضخم عن طريق إصدار شهادات ادخارية جديدة بفايدة عالية
بس مش هيعمل ده لوحده لأنه قبل قرار زي ده بيرجع للبنك المركزي وهو اللي بيدي التعليمات بنزول شهادات أو لأ؟
لكن قالت إنه الأكيد إن البنك المركزي هيحط 3 نقط مهمة قدامه قبل ما ياخد قرار زي ده وهو سعر صرف الجنيه قدام الدولار، ومعدل التضخم، وقرار تسعير لجنة المواد البترولية الأخير.
وحسب كلام رضوى السويفي رئيسة البحوث في “فاروس المالية” فـ الأكيد إن زيادة التضخم بالشكل ده بتزود احتمالية رفع الفايدة في البنك المركزي وخلي بالك اجتماع البنك المركزي اللي جاي هيكون يوم 30 سبتمبر الجاي.
وقالت إن ارتفاع التضخم ده هيجبر البنك المركزي يرفع الفايدة 200 نقطة أساس.
وتوقع خبراء الاقتصاد إن البنوك تطرح شهادات جديدة بفايدة تتراوح ما بين 27 و30 %، خاصة بعد ارتفاع معدل التضخم السنوي في مصر.
ولو انت مش عارف فـ البنك المركزي الشهر اللي فات حرك سعر صرف الجنيه، وده اللي خلى سعر صرف الجنيه يتراجع نهاية يناير اللي فات وسجل حوالي 30 جنيها لكل دولار، وده طبعا انخفاض كبير في سعر الجنيه اللي كان سجل حوالي 15.7 جنيه في يناير 2021.
.
وفـ اجتماعه الأخير قرر البنك المركزي المصري تثبيت سعر الفايده ، وكان القرار ده في نفس وقت قرار وقف طرح شهادات 25% اللي ناس كتير شافت إنه بيأكد نجاح البنك المركزي في سحب السيولة اللي كان محتاج يسحبها من السوق.
دلوقتي قولنا إيه رأيك في خطوة طرح البنوك شهادات جديدة وهل ممكن تستثمر فلوسك فيها؟
