الزمالك على صفيح ساخن، مرتضى منصور خارج الملاعب وخناقاته لا تنتهى، وشيكابالا داخل الملاعب ولا يترك لاعب فى حاله فى أى مباراة سواء من الفريق المنافس وجماهيره لما استفز جمهور الأهلى فى مباراة القمة من الدورى المصرى.
أو مع زملايله اللاعبين من فريق الزمالك زى اللى حصل فى المباراة الأخيرة للزماك أمام شباب بلوزداد في دوري أبطال إفريقيا،واللى إنتهت بخسارة الزمالك 1-0 .
خناقته دى كانت مع محمد عواد ،واللى عمله فيه فى غرفة خلع الملابس خلى فيريرا ياخد قرار حازم ضده لدرجة تجميده .. ياترى حصل إيه وليه كان العقاب للدرجادى؟
إتعرفت خلاص ، والجمهور مبقاش يتفاجئ بعد كل مباراة للزمالك ،وخاصة لو إنتهت بالهزيمة عينك ما تشوف الإ النور بعدها، خناقات ومناوشات ومحدش بيعرف يسيطر على الموقف خالص.
من كام ساعة بقى كده ،إنتشرت الأخبار إن فيريرا بيدرس القرار بخصوص تجميد شيكابالا،وإن فيريرا مضايق منه جدا وعلى أخره بسبب تصرف شيكابالا بعد الخسارة أمام شباب بلوزداد في دوري أبطال إفريقيا.
الدنيا مقلوبة فى الزمالك بعد المباراة ومش بسبب الخسارة بس لا ده زى ما يكون بقى العادى الفترة الأخيرة للزمالك ،ولكن بسبب خناقة الشوارع بين شيكابالا مع محمد عواد.
علشان كده فيريرا بيفكر فى عدم مشاركة شيكابالا مع الزمالك في الفترة الجاية وتجميده لنهاية الموسم كنوع من أنواع العقاب له.
طيب هو إيه اللى حصل يخلى فيريرا يعاقب شيكابالا بالطريقة دى؟ أكيد عمل حاجة مش من الباب للطاق كده هيقول لشيكابالا إنت برة الفريق الفترة دى باى باى شيكابالا ولاإيه؟
بص يا سيدى كل الحكاية إن فى شيكابالا أثناء المباراة شد مع عواد شوية بسبب سقوط محمد عواد وطالبه بالاسراع فى إنه يقوم علشان يسجل هدف التعادل،وده اللى خلى أيمن طاهر يتكبم مع شيكابالا ويهديه ويفهمه ويقوله براحه عليه شوية إصابته ممكن تكون قوية.
وده اللى أكده طارق يحيى نجم نادي الزمالك السابق ومقدم الاستوديو التحليلي لمباراة، وهنا جماهير الزمالك شنت هجوم كبير على الزمالك الفارس بعد الخسارة أمام شباب بلوزداد بسبب تراجع المستوى والنتائج السلبية.
فى تقارير صحفية كشفت عن تفاصيل خناقة تمت بين شيكابالا، وعواد بعد الهزيمة أمام شباب بلوزداد،وده متمش قدام الجمهور لا،ده كان فى غرفة خلع الملابس بسبب إضاعته للوقت في العلاج بعد احتكاكه مع مهاجم فريق شباب بلوزداد،وإتهمه إنه هو السبب فى هزيمتهم فى المباراة.
شيكابالا أكد للحارس أن سقوطه ده أضاع عددا من الدقائق كان الفريق بحاجة إليها، في ظل استمرار لاعبي بلوزداد في إضاعة الوقت.
مش ب كده لكنهم مسكوا في بعض وشيكابالا اتعصب وزعق وقاله بالنسبة للكدمة اللى إتعرضت لها مكانتش قوية ولا حاجة،إنت بتتلكك، وكان ممكن تشارك وتأدى بشكل طيعى بدل ما تضيع الوقت بالشكل كده .
كمان شيكابالا أكد لعواد ، أن أي حكم في إفريقيا مش بيحسب أكتر من خمس دقائق، وبالتالي فهو وقت قصير، خاصة في ظل إضاعة لاعبي شباب بلوزداد الجزائري للوقت، وكان من الأولى عليه إنه ميضيعش الوقت في الدقايق دى اللى كان ممكن يستغلوها ويجيبوا هدف التعادل بدل الهزيمة دى .
هل ياترى هتكون عقوبة شيكابالا إيقافه فعلا عن المشاركة فى المباريات اللى جاية؟ ولا هتكون مجرد كلام زيها زى عقوبته بعد مباراة القمة فى الدورى المصرى لما قالوا إن شيكابالا هيتم إيقافه 4 مباريات ومفيش اى إيقاف حصل ولا عقوبة أطبقت ..
انتوا بقى رأيكوا إيه؟ شايفين إنه يستحق العقوبة دى ولا عواد هو السبب فعلا فى الخسارة زى ما شيكابالا إتهمه؟
