في الوقت الذي تحاول فيه الحكومة أن تخفف على المواطنين وتقدم المساعدات للفئات المستحقة للدعم، تطلع إشاعات تحاول تهدم كل المجهود التي تقوم بها الدولةومع الأسف فيه ناس تصدق.
زي الإشاعة اللي طلعت وانتشرت عن برنامج “تكافل وكرامة”.. وأن هيكون في تعديل في قيمة المستحقات لبعض الفئات ومنعها بالكامل عن فئات تانية.
تفتكروا أيه حقيقة الإشاعة دي؟ وكام واحد في مصر يستحق الدعم؟ وأيه الميعاد الرسمي لصرف الفلوس؟ تابعونا عشان تعرفوا كل التفاصيل.
تخفيض المستحقات
كل يوم والتاني تطلع إشاعة تحاول تعمل قلق ما بين المصريين.. زي الإشاعة المنتشرة اليومين دول عن تخفيض قيمة مستحقات برنامج الدعم “تكافل وكرامة” ومنعها بالكامل عن بعض الفئات بسبب الأزمة الاقتصادية العالمية.. بس احنا هنا عشان نعرفكم الحقيقة الكاملة ومن المصادر الرسمية.
المركز الإعلامي لمجلس الوزراء طلّع بيان وقال فيه إن تم التواصل مع وزارة التضامن الاجتماعي لأنها المسؤولة عن البرنامج وصرف الفلوس.. والوزارة قالت إن كل الكلام المنتشر ده عبارة عن إشاعات مالهاش أي أساس من الصحة.. وبرنامج الدعم النقدي “تكافل وكرامة” زي ما هو.. ومفيش أي تغيير نهائي.
صرف بانتظام
الوزارة كمان قالت إن عملية صرف الفلوس ومستحقات تكافل وكرامة لكل المستفيدين ماشية بمنتهى الانتظام ولكل المستفيدين.. وبيان الوزارة قال كمان إن قيمة المستحقات زي ما هيّ بدون أي نقصان أو تخفيض أو الكلام المنتشر ده.
والوزارة قالت إن صرف المستحقات بيتم كل شهر من نفس منافذ الصرف اللي الناس متعودة تصرف منها من غير أي تعديل.
عدد المستفيدين
ده كمان عدد المستفيدين في الفترة الأخيرة زاد بشكل كبير.. لدرجة أن العدد وصل أكتر من 5 مليون أسرة.. يعني حوالي 22 مليون مواطن بيستفيدوا من الدعم ده.
وتمويل مشروع تكافل وكرامة متقسم ما بين الدولة والجمعيات الأهلية.. وموازنة الدولة بتموّل حوالي 4 مليون و600 ألف أسرة من العدد الإجمالي.. وبيتم التنسيق مع التحالف الوطني للعمل الأهلي التنموي اللي بيتحمل تكاليف 600 ألف أسرة بالتعاون مع الجمعيات الأهلية اللي بتدعم أنشطة الدعم النقدي.
والتمويل النقدي بيوصل لحوالي 28 مليار جنيه.. منهم حوالي 25 مليار جنيه من خزانة الدولة.. والـ 3 مليار التانيين من التحالف الوطني للعمل الأهلي التنموي.
موعد صرف المستحقات
وبالنسبة لمستحقات تكافل وكرامة لشهر فبراير.. فالصرف شغال بالفعل من يوم 15 في الشهر.. وكل المستفيدين اللي معاهم بطاقات “ميزة” البنكية يقدروا يصرفوا الفلوس من مكاتب البريد المصري الموجودة في كل حتة في مصر.. أو من أي ماكينة صرف آلي في الشوارع.
وعشان تبقى عارف.. لازم تحدث البطاقة الزرقا اللي كنت بتستخدمها لصرف المستحقات.. ودلوقتي لازم الصرف من خلال كارت “ميزة” الجديد.
وتقدر تستبدل البطاقة الزرقا بكارت ميزة من مكاتب الوحدة الاجتماعية اللي في مختلف المناطق على مستوى الجمهورية.. وتقدم صورة من بطاقة الرقم القومي والرقم السري.. وعلى طول هتستلم بطاقة “ميزة”.. وبيتم تفعيلها من خلال الإدارات الاجتماعية برضو.
