لأول مرة في مصر.. الأرز المصري لن يكون صاحب الكلمة الوحيدة في السوق فهل تتخيلوا الحكومة ستقبل عرض الصين بزراعة الأرز عندنا؟
وإيه اللي يخلي الرز الصيني مميز عن الرز المصري؟وهل ده معناه ان الإنتاج المحلي مش مكفينا؟ طيب هل الاستيراد مش كفاية؟
في الوقت اللي بتدور فيه الحكومة ازاي تحل أزمة الرز، الصين داخلة بتقلها وقدمت عرضها: مساعدة مصر من خلال زراعة الرز الصيني في الصحرا الغربية باعتباره واحد من الأصناف اللي بتتحمل درجات الجفاف العالية.
ده اللي طرحه السفير الصيني في القاهرة، لياو ليتشانج، على وزير الزراعة خلال الأيام اللي فاتت واتكلم عنه خلال اجتماعه برجال الأعمال المصريين، لمناقشة تعزيز الاستثمارات المشتركة بين مصر والصين.
السفير قال إن الصين عاوزة توسع الشراكة الاستراتيجية والاقتصادية مع مصر خلال 2023، لتشكيل قوة اقتصادية رئيسية في المنطقة. وفي سبيل ده، بلده مستعدة للتعاون مع مصر في صناعة السيارات وزراعة الأرز الصيني.
طيب هي مصر عندها نقص في الإنتاج؟ حسب أرقام الحكومة، الإجابة لأ، ده احنا بنستهلك سنويا 3.2 مليون طن أرز، وفوق ده كله عندنا فائض بحوالي 400 ألف طن.
و الأزمة هنا مش في محصول الرز خالص، الأزمة في بعض الفلاحين والتجار اللي بيخزنوا المحصول عشان سعره يزيد.
وخد بالك ان الأرقام دي بعد قرار الحكومة من سنوات بتقليص المساحة المزروعة من الأرز بسبب استهلاكه لكميات كبيرة من المياه.
وفي 2022 ، سمحت الحكومة ل9 محافظات بزراعة الرز، وهي محافظات الإسكندرية والبحيرة والغربية وكفر الشيخ والدقهلية ودمياط والشرقية والإسماعيلية وبورسعيد، بمساحة 725 ألف فدان، مع حوالي 350 ألف فدان.
وحاليا قررت الحكومه تستورد 25 الف طن من بره، وقالت إن مخزون في وزارة التموين يكفينا 3 شهور، والاستيراد هدفه استمرار زيادة المخزون، خصوصا ان الحكومة بتطرح الرز على بطاقات التموين لحوالي 64 مليون مواطن، وكمان في منافذ المجمعات الاستهلاكية وفروع معارض اهلا رمضان المنتشرة على مستوى محافظات الجمهورية .
وحاليا سعر الارز في التموين حوالي 10 جنيه ، وفي معارض اهلا رمضان ب14.5 جنيه تقريبا، وده بفارق كبير عن الأسعار المتدوالة في السوق.
والسؤال الاخير بقى هل دي اول مره تستورد فيها مصر الرز؟ خلال السنوات الاخيره استوردت مصر الرز لاكتر من مرة، والبداية كانت من سنة 2018 ومن اكتر من بلد زي الصين والهند فيتنام لتغطية الاحتياج المحلي.
لكن بعدها تم وقف الاستيراد والاعتماد على الأرز المصري بس، لغاية ماوصلنا 2022 ورجعنا للاستيراد تاني عن طريق التعاقد على شراء 50 الف طن رز من الهند.
ولغايه دلوقتي ما طلعتش الحكومه رد رسمي بالموافقه او الرفض على اقتراح الصين، انتم بقى موافقين على زراعة الرز الصيني في مصر؟ وهل ده هيقلل الاسعار ويحمي المستهلك؟ ولا هيضر الرز المصري؟
