مبروك لكل العاملين في الحكومة، أكيد عرفتوا قرار الريس بزيادة مرتبات من اول أبريل، فياتري هتقبضوا كام؟ وهل الزيادة دي كفاية أم محتاجين اكثر؟
طيب إيه رأي الريس في مرتبات مصر؟ وليه متزيدش اكتر من كده انتوا اكيد شايفين غلاء الأسعار وصل بينا لفين؟ خليكم معانا في التقرير التالي، عشان تعرف هتقبض كام بالظبط في شهر 4، وايه اللي هيحصل في مرتبات القطاع الخاص.
مجموعة قرارات جديدة أعلنها الرئيس السيسي خلال الساعات الأخيرة بخصوص المرتبات والمعاشات، بعد ما أكد إن هدف الدولة الوحيد هو المواطن المصري و تحسين جودة حياته.
وعشان المصريين يقدروا يواجهوا ارتفاع الأسعار، وبعد ماسجل معدل التضخم في مصر أعلى مستوى ليه من 5 سنين، قررت الدولة زيادة الحد الادني للأجور بعد ساعات من رفع أسعار البنزين وتثبيت السولار.
وحسب جدول مرتبات العاملين في الجهاز الإداري للدولة ده النظام الجديد للقبض:
الحد الأدنى لموظفي الدرجة السادسة زاد من 3 آلاف إلى 3 آلاف و500 جنيه. والحد الأدنى لموظفي الدرجة التالتة ارتفع 5 آلاف جنيه.
والحد الأدنى لمرتبات الموظفين حاملي درجة الماجستير أصبح 6 آلاف جنيه شهريا، و7 آلاف جنيه لحاملي الدكتوراة.وطبعا الزيادة مكنتش بس للموظفين اللي لسة في الخدمة، كمان أصحاب المعاشات ليهم نصيب بزيادة 15%
وده معناه ان المعاشات المقدرة بـ 1300 جنيه أصبحت 1495 جنيه.واللي كان بياخد معاش 2300 جنيه في شهر أبريل هيقبص 2645 جنيه.
والمعاشات المقدرة بـ 3500 زادت إلى 4025 جنيه،والمعاشات المقدرة بـ 4300 جنيه ارتفعت إلى 4945. المعاشات المقدرة بـ 5300 جنيه، بقت 6095 جنيه، والمعاشات المقدرة بـ 6500 جنيه هتكون 7475.
ولو بتسأل الزيادات دي كفاية ولا لأ؟
فالريس سبق واتكلم عن المرتبات في مصر وقال انها مرتبات تعبانة، ايوة تعبانة والحكومة شغالة بكل جهدها عشان تحسن حياة الناس بس الالتزامات كتير ومينفعش نصرف على الأكل والشرب بس.
الريس قال للمصريين : والله العظيم باكلمكم من قلبي، أقل من 10 آلاف جنيه لأي حد، مايعيش، هتقولي طب انت بتعمل ميناء بـ40 مليار جنيه.. لازم أكون متوازن، غيري أكل وشرب وسابها على الحديدة، المسار الحالي أكبر من أي حد، لازم أشتغل على كل قطاعات الدولة، حد يقول لي مهتم بالحديد والأسمنت، طب والبشر؟ مهتم بكله.
أما بقى لو انت شغال في القطاع الخاص، فالحد الأدنى ليك لسة 2700 جنيه، بس المجلس القومي للأجور وعد باجتماعات مع رؤساء الشركات الفترة الجاية لزيادة الحد الأدنى لأجور القطاع الخاص، عشان يعرفوا يعيشوا كويس.
انت بقى قولنا بتقبض قد إيه ، والمرتب بيكفيك لغاية يوم كام في الشهر، ولو انت شغال في القطاع الخاص قولنا صاحب الشركة زودكم الفترة الأخيرة ولا لأ؟
