تحرك ملحوظ في أسعار الذهب خلال الأيام الماضية. وبعد أسابيع من الهبوط الآن المعدن الأصفر يتجه في سكة الصعود.
فهل لسة الفرصة مناسبة للشراء ولا ده وقت البيع؟ وهل فعلا جرام الدهب في مصر هيوصل ل2000 جنيه؟ طيب ليه الكل عامل حساب ليوم 22 مارس تحديدا؟في 2022. الدهب كان حصان الاستثمار الرابح بعد تسجيل مكاسب كبيرة وفي نفس الوقت انخفاض قيمة الجنيه.
عشان كده شفنا إقبال تاريخي من المصريين على الشراء وده تسبب في زيادة الطلب ومعاه ارتفاع الأسعار لدرجة ان سعر الدهب في مصر بقى أعلى من السعر العالمي.
لكن من بداية 2023 السوق اختلف شوية لان الدهب بمصر سعره في النازل، فهل الانخفاض مستمر؟
لو انت متابع، اكيد لاحظت ارتفاع سعر الدهب في الساعات الأخيرة، وده سببه ارتفاع الأوقية في البورصة العالمية بقيمة 50 دولار، حسب تحليل الدكتور ناجي فرج مستشار وزير التموين لصناعات الدخل.
ومستقبل الدهب هنا مربوط ب3 عوامل: سعر الفايدة الأمريكية ، وسعر الدولار في مصر، وحجم الإقبال في السوق واقتصاديا، لو حصل زياده في أي واحد منهم، ده هينعكس على ارتفاع اسعار ادهب وطبعا العكس صحيح.
ومن خلال تقديره للموقف، مستشار وزير التموين بيتوقع وصول سعر الأوقية عالميا إلى 2500 دولار، خصوصا مع الكلام عن تصاعد التوترات بين روسيا وأوكرانيا مع بداية فصل الربيع، وده معناه وصول سعر الجرام في مصر إلى 2000 جنيه.
وخد بالك كمان إن الفترة اللي فاتت الإقبال على شراء الدهب قل خصوصا مع طرح شهادات ال25% اللي سحبت السيولة من السوق.
وده ياخدنا ليوم 22 مارس، بداية من التاريخ ده المفروض بنكي الأهلي ومصر هيبدأوا في صرف شهادات ال18٪ بعد انتهاء مدتها، ودي حصيلتها 750 مليار جنيه، يعني مبلغ كبير مش قليل.
وعشان كده، لو نسبة كبيرة من أصحاب الشهادات دي فضلوا يشتروا بفلوسهم دهب، هتلاقي الطلب عليه زاد واحتمال سعره هو كمان يزيد.
وللسبب ده الكل مستنى يشوف البنك المركزي بقيادة حسن عبد الله هيعمل إيه؟ هل هيطرح شهادة ادخار جديدة بفايدة مرتفعة عشان يمنع رجوع السيولة دي للسوق ولا لأ؟
في نفس الوقت هاني ميلاد، رئيس شعبة الدهب شايف إن الوقت الحالي مناسب جدا للشراء لان سعر الاونصة رخيص.ومن وجهة نظر أمير رزق، خبير المشغولات الذهبية، في تذبذب حاليا في سعر الذهب داخل الصاغة المصرية، وده سببه استقرار سعر الدولار في البنوك.
وعلى العكس تماما، توقع استمرار انخفاض أسعار الدهب الفترة الحاية والشراء في رمضان هيبقي اختيار مناسب.ونصيحة أخيرة بقي، وانت بتشتري دهب اتأكد انك مش هتحتاج الفلوس قبل سنتين على الاقل، لأن ده استثمار متوسط الأجل، وعشان تكسب فيه محتاج تصبر شوية.
فهل انتوا شايفين اتجاه الدهب رايح على فين: صعود ولا هبوط؟
