الفراخ منذ فترة وأسعارها مرتفعة ، ولكن مع اقتراب شعر رمضان بدأت تظهر بوادر انفراج الأزمة وبدات الاسعار تتراجع بالتزامن من استيراد الفراخ البرازيلية والافراج عن الاعلاف.
واليوم سنكشف مفاجأة وهي إن أسعار الدواجن بدأت تستقر وسجلت انخفاض 12 جنيه في الكيلو الواحد!طيب إزاي ده حصل وهل كدة الأسعار هتقل قبل رمضان؟، خليكم معانا في الفيديو ده واحنا نقولكم كل التفاصيل:
أسعار الدواجن النهاردة انخفضت بشكل كبير ونزل سعر الكيلو 12 جنيه مرة واحدة، و سجلت سعر الفراخ البيضاء النهاردة في المزرعة حوالي 70 جنيهً وده اللي خلاها توصل للمستهلك بـ 79 و 81 جنيهً تقريبًا.
مش بس كدة ده كمان وصلت أسعار الدواجن الأمهات الأبيض لـ 59 جنيه للكيلو في المزارع، ووصلت لـ المستهلك بحوالي 68 و 70 جنيها للكيلو.
أما بقى أسعار الدواجن الساسو “اللي هي الفراخ الحمراء يعني فسجلت ٨١ جنيه للكيلو في المزرعة ووصل سعرها للمستهلك بحوالي 90 و 93 جنيه تقريبا
طبعا كلكم هتقولوا طيب وسعر البيض نزل ولا زي ما هو؟بص يا سيدي سعر البيض الأبيض سجل النهاردة 96 جنيه للطبق ووصل للمستهلك بحوالي 106 جنيه تقريبا للطبق.
وكمان ارتفع سعر طبق البيض الأحمر بحوالي جنيه واحد ووصل سعره لـ 100 جنيهً في المزرعة ووصل للمستهلك بحوالي 110 جنيه.
وسجّل سعر البيض البلدي النهاردة 107 جنيه ووصل للمستهلك في المحلات بسعر 117 جنيه للطبق
طيب تفتكروا الأسعار هتنزل عن كدة الأيام الجاية؟ والفراخ ممكن تنزل تاني لسعرها القديم لما كانت ب 39 جنيه؟
حسب تصريحات حسين أبوصدام، نقيب الفلاحين، فقال إن الأسعار بتزيد في كل العالم مش في مصر بس زي ما في ناس بتقول!، بس مصر عندها عجز بنسبة 40% من اللحوم الحمراء، واللحوم المتوفرة من الإنتاج المحلي تكفي المواطنين بنسبة 60% فقط.
وقال كمان أن مصر في اكتفاء ذاتي في الدواجن واللي حصل الفترة اللي فاتت و ارتفاع أسعارها كان بسبب أزمة استيراد الأعلاف وخلاص الأزمة اتحلت من الحكومة وعشان كدة بدأت الأسعار ترجع بشكل تدريجي لوضعها الطبيعي.
وأكد إن أسعار الدواجن واللحوم والأسماك هتنخفض خلال الفترة الجاية القريبة بسبب أن الأخوة المسيحيين صايمين ومش بياكلوا الدواجن والأسماك، غير كمان الجهود الحكومية الكبيرة اللي بتتعمل عشان تساعد في توفير اللحوم بأسعار مخفضة
وطبعا لو بتسأل عن تراجع أسعار الدواجن الفترة دي فده بسبب الكميات اللي طرحتها الحكومة م الفراخ البرازيلي بسعر 65 جنيه للكيلو في الأسواق.
وطبعا منقدرش ننكر إن الفراخ البرازيلي عملت زلزال في أسعار الفراخ خلال الأيام اللي فاتت خاصة إن الناس اشترتها وشافت إن سعرها مناسب أكتر للميزانية.
و كلنا شفنا ازاي اسعار الفراخ البيضا نزلت مرة واحدة لدرجة ان الكيلو اللي كان وصل لـ100 جنيه رجع بيتباع ب70 جنيه.
مش بس كدة ده كمان سعر كرتونة البيض قل من 130 إلى 110 و 100 جنيه، حتى البانيه اللي كان بينافس اللحمة وكان سعره أزيد من 220 جنيه، سعر الكيلو فيه نزل وبقى بيتباع دلوقتي من 150 لـ 180 جنيه .
وصحيح الأسعار لسة غالية مقارنة بنفس الفترة من السنة اللي فاتت لما كان الكيلو بيسجل 39 جنيه وشوية، لكن الناس فرحت بالخطوة اللي أخدتها الحكومة وشافت إن بكده الأسعار ممكن تقل فعلا تدريجي.
دلوقتي قولولنا بتشتروا الفراخ البيضا في منطقتكم بكام؟ وشايفين الأسعار رايحة على فين مع دخول رمضان: ارتفاع ولا انخفاض؟
